2 Samuel6
1Akung kowi dow David mih Israeluüa pungmadawng kowi kowh lang kloah mih maru iun 30,000 ia kowi plan kuaah khai.2Now David hai aia kowh maru maten dow Thurai kowh sangbowk laitawm tawkpla mih Jerusalem marow kowi nauang pawla kownkow Bala-Juda marow kowi kowkowi khai. Nami sangbowk laitawm tawkpla kowi dow lang kri lang kraing mih CHAKRAMANG uowi pahai maru tukah chekhai. Tawngplawng kowchow panow nami sangbowk laitawm tawkpla küm luk kowi kowh Cherup rup pre buk mih takra kowi dow CHAKRAMANG uowi reng chekhai.3Amatni dow nami sangbowk laitawm tawkpla mih hungh kowi kowh Abinadab kim hownia uang lawtla now chia kari sar kowi tangah büah khai. Now nami chia kari dow Abinadab kowh chapa Uza hai Ahiaw iüah kowi pe pawla büah khai.4Uza dow nami chia kari ria kowi krawi takhep rowtrowt se krawi mang khai, now Ahiaw dow nami chia kari pur kowi rik mang khai.5David hai aia kowh maru maten dow meng hown, plai hown, atün ateu hown CHAKRAMANG pur kowi piaw büah khai. Amatni dow taraw hown, tingteng hown, sawkchow hai klingchow hown piaw büah khai.6Nachenganchepaw Nakawn kowh cha thuara re-e uang ting büah khe küngla kari mih chiala pre pum trui mih tatheu khai. Nakhowk khe Thurai kowh sangbowk laitawm tawkpla nadowh pakowh Uza mih haidowkta khai.7Naiawng sangbowk laitawm tawkpla awr dowkta khai rakowi CHAKRAMANG mih Uza kowi lainowmma kunmarauah khai. Naiawng rakowi aia kowi dow CHAKRAMANG pawta pe asak khai. Nahanow Uza dow Thurai kowh sangbowk laitawm tawkpla ria re-e hing kowng khai.8Naiawng Uza kowi CHAKRAMANG pawta pe asak khai rakowi David dow kunmarau khai. Naiawng rakowi nami arah ming dow Perez-Uza pahai aia chap pe khai. (Perez-Uza pami dow “Uza kowh piakra” pami chekhai). Nami arah ming dow kawmat paw Perez-Uza chowreng tak chekhai.9Nami ni khe David dow CHAKRAMANG kowi lainowmma kramah khai. Aia tek mih, “Tawng iawng chow CHAKRAMANG kowh sangbowk laitawm tawkpla ang tut-e ang uang ia pawla kown chow?” pakhai.10Naiawng rakowi David dow CHAKRAMANG kowh sangbowk laitawm tawkpla mih Jerusalem marow kowi kowpawla kown mih nauta dowi chekhai. Now aia dow nami sangbowk laitawm tawkpla mih Gat marow kowi kowh Obed-Edawm kim kowi kowtowla khai.11Now Obed-Edawm kim kowi dow CHAKRAMANG kowh sangbowk laitawm tawkpla mih sum la mowr uowi khai. Nakhowk khe CHAKRAMANG dow Obed-Edawm hai aia kimchakuüa maten kowi peah prasi khai.12Akung kowi maru uang tek pe mang David mih, “Obed-Edawm kim kowi Thurai kowh sangbowk laitawm tawkpla uowi rakowi CHAKRAMANG dow Obed-Edawm kowh kimchakuüa maten hai aia kowh uowi mih srui kowi peah prasi khai,” pakhai. Naiawng rakowi David dow nakowi kowkowiah hanow apiaw apama hown Thurai kowh sangbowk laitawm tawkpla mih Obed-Edawm kim hownia Jerusalem marow kowi uang pawla khai.13Naiawng Jerusalem marow kowi CHAKRAMANG kowh sangbowk laitawm tawkpla uang pawla mih khin khe akawt miuüa rik san taruk khawk now David dow chang phuchua khai. Nami phuchua dow chiala apum hai akauma mih chia chah apum hown aia changah khai.14David dow adipükchow mih la hown kowh kawngah mih ephawd kowrmow khupla now aia kowh kür maten hown CHAKRAMANG pur kowi plai khai.15Naiawng hown David hai Israeluüa maten dow howla sawmlawm se hai tumla nang se apiaw apama hown CHAKRAMANG kowh sangbowk laitawm tawkpla mih Jerusalem marow kowi uang pawla büah khai.16Jerusalem marow kowi CHAKRAMANG kowh sangbowk laitawm tawkpla uang tingla mih khin khe Sawl kowh chama Mikal dow tawngpawk hownia hawt mü khai. Now CHAKRAMANG pur kowi tapowr se mang David plai mih dow Mikal khita khai. Naiawng rakowi aia dow sakdawng hownia David kowi suiah khai.17Maru kawmuüa dow CHAKRAMANG kowh sangbowk laitawm tawkpla mih uang pawla büah khai. Now nami vüi kowi kowh David khupah mih tangbung lak kowi uang towah büah khai. Now David dow CHAKRAMANG vüi tikah mih uanap hai taking tasangra uanap chang khai.18Nami uanap ki chang kung kowi dow David mih lang kri lang kraing mih CHAKRAMANG ming hown maru kawmuüa kowi peah prasi khai.19Nami kung kowi aia dow kachakuüa hai masiuüa uowi mih maten kowi kawm apah chi, chaknga asek chi hai grep uih keu kawm apah chi peah khai. Nami kung kowi dow amatni bowkbowk mih chowlowkkow kim prakowi mang büah khai bowt.20Nami kung kowi dow David mih aia kimchakuüa kowi napeah prasi kownkow kim prakowi haimang khai. Nami khin khe ahua hown nauang takrum kownkow Mikal mih prang kowi uang lawt khai. Now mapaw sak-ih dowi hown aia tek pe David mih, “Ani tarapdow Israel kowh mang mih lainowmma ka ringkawra khai pami kowmatia kowi tatuak khai! Aia dow tawnguat taklüp prang tuk rukrai dowi mih maru iawng aia kowh narmauüa pur kowi uowi khai!” pakhai.21Now David tek pe Mikal mih, “CHAKRAMANG dow aia kowh maru Israeluüa kowi nakruitown kownkow en pa kowi hai enni kimchak mia iawng mih kowi paw kloah dowi kowi ang kowi chowtaih klo ang khai. CHAKRAMANG pur kowi ang plai mih dow naiawng rakowi chekhai. Aia pur kowi chowtaih ang napiaw kown.22Kowmatia kowi dow nami lak-e paw rukraira lang uowi mih iawng ang nauowi kown, now nami lak-e sowm iawng ang nauowi kown. Nachenganchepaw ang kowh narmauüa dow naringkaw ang kown taih,” pape khai.23Sawl kowh chama Mikal dow kowng pat hing kala chah dowi chekhai.
The Seed Company