2 Samuel4
1Hebrawn marow kowi Abner kowng mih satang dow Sawl kowh chapa Isboset mih tawi ta khai. Nami satang tata hanow aia dow mapaw ka sakowmra dowi bowt chekhai, now Israeluüa maten paw lainowmma kram khai.2Isboset kowh dow siphai aluchow uowi pre ia. Lowk ia mih ming dow Bana, now alowk mih ming dow Rekab chekhai. Amatchi dow Benjamin krungchak Rimawn kowh chapa chekhai. Rimawn uowi mih dow Berawt marow kowi chekhai. Berawt marow dow Benjaminuüa kowh süng kowi tawi taphang khai.3Tawngplawng kowchow panow Berawt marowchakuüa dow Gitaim marow kowi kowpowt hanow nakowi kowhing uowi khai; kawmat paw prenlang maru iawng hai nakowi uowi büah reng tak chekhai.4Sawl chapa Jonathan kowh dow chapa uowi lowk ia. Aming dow Mefiboset chekhai. Aia tanga ningchow reng tak khe tasenra kowi a-pa Jonathan hai a-pu Sawl iüah kowng mih satang Jezrel marow hownia maru uang phowng pe khai. Nami satang tata hanow aia kowi kowh mingkhet miia dow aia kowi paila now alenma cham powtla khai. Naiawng cham powtla mih khin khe mingkhet miia dow Mefiboset kowi dowta dup khai. Naiawng rakowi nami hownia aia kowh dow klowng hing tabai khai.5Akat khe Rekab hai Bana iüah dow ni ür thüm khe Isboset kim kowi kowkowi khai. Nami khin dow Isboset kowh tanai khin chekhai.6Nami khin khe kimplawt kowi kowh hawt krap püm mih masiuüa dow amüi khai. Naiawng rakowi amatchi dow maru tuk dowi iawng kim lak kowi kownowng kup khai. Now Isboset kowh müi rah towklak kowi kowkup iüah khai. Nakhowk khe Isboset dow sawlawnma kowi hawt amüi khai. Now Isboset mu kowi sawtah hanow kowngta iüah khai. Nami kung kowi dungta pe alu hanow pawla iüah khai. Now Araba pra kowh mangla mih tiama iawng uar prowt mang iüah khai, now amatchi dow nami lu mih Hebrawn marow kowi David tut-e kowpawla iüah khai. Amatchi uang tek pe mih, “Mow, en kowh ransu Sawl kowh chapa Isboset kowh lu! Sawl dow nasai en kown mih sangkrang reng chekhai. Ang kowh mangkri en vüi kowi CHAKRAMANG dow ani mih Sawl hai achapa luk kowi paw pe lu klai khai,” pakhai.9Nachenganchepaw Rekab hai Bana iüah kowi David tek pe mih, “Phih maiow hownia kowh lawng ang mih masing CHAKRAMANG ming lüklau se ang tek khowk.10Maru lowk ia dow Sawl kowng mih ang vüi kowi satang iung pah ka tuak kowh uang phowng ang khai. Nami rakowi aia dow ang napeah awmrawm sung kown padow ka tuak khai. Nachenganchepaw aia kowi dow Ziklak marow kowi ang saita khai. Nami dow aia kowh awmrawm sung chekhai.11Nachenganchepaw enchi ngam dow angak uowi dowi mih maru kowi aiamat kim kowi kowkowiah hanow sawlawnma luk kowi enchi kowsaiah khai! Enchi iawng mih maru ngakuüa kowi ngam dow lainowmma ang narip enchi kown! Enchi kowngta mih maru kowh lu klai dow ang napaw enchi kown, now lusa hownia ang namata enchi kown,” pakhai.12Now Rekab hai Bana iüah kowi nasaita kownkow David mih aia maru-uüa kowi peah ana khai. Now amatni dow kowiüah kowi saita khai. Amatchi kowh rut khawk dow dungta pe büah khai, now abuk dow Hebrawn marow kowi kowh kanh ria kowi tarta hüah khai. Nachenganchepaw Isboset kowh lu dow Hebrawn marow kowi kowh Abner tadupra kowi kowdupah büah khai.
The Seed Company