2 Manguüa24
1Now Jehoiakim chowm mang mih khin khe Babulawn mang Nebuknezar dow Juda pren kowi uang senah khai. Now Juda pren mang Jehoiakim dow sum ning mowr mang Nebuknezar nimkrüa kowi tawi uowi khai. Tawkche akung kowi aia dow Nebuknezar kowi kingküaah khai.2Nakhowk khe CHAKRAMANG dow Jehoiakim kowi nakingküaah kownkow Babulawnuüa, Siriauüa, Moabuüa hai Amawn siphaiuüa kowi uang chinah khai. Amatni kowi naiawng CHAKRAMANG uang chinah mih dow aia nar risiuüa kowi aia rik tekta khowk iawng Juda pren napiakta kownkow chekhai.3Judauüa luk kowi naiawng phih uang ting mih dow CHAKRAMANG mih aia ana pek iawng aia pur hownia amatni kowi naprütta kownkow chekhai. Tawngplawng kowchow panow Manase dow lainowmma chang angak khai. Aia dow angak uowi dowi miuüa kowi krawi saiah khai. Naiawngün maru-uüa kowh vi dow Jerusalem marow kowi atekma aia changah khai. Naiawng rakowi CHAKRAMANG dow aia kowh angak lawtta pe dowi chekhai.5Jehoiakim kowh akeng mih lup lawnguan maten dow “Juda Manguüa Lawnguan” pami bowih kowi arui uowi bowk chekhai.6Jehoiakim kowng kung kowi dow achapa Jehoiakin mih ta chowm mang khai.7Aigupta pren mang dow nacham tasen kownkow aia pren hownia lawt dowi bowt chekhai. Tawngplawng kowchow panow Aigupta aw hownia Iufratis aw mowr Aigupta pren mang powngah mih süng dow Babulawn pren mang powngta pe bowk khai.8Juda pren kowi Jehoiakin chowm mang mih dow lairaiat ning khe chekhai. Aia dow sum la mowr Jerusalem marow kowi chowmla mang khai. A-u dow Jerusalem marowchak Elnathan kowh chama Nehusta chekhai.9Jehoiakin dow a-pa iawng CHAKRAMANG mik kowi angakma mih lup chang reng chekhai.10Nami khin khe Babulawn pren mang Nebuknezar kowh siphai hawmh dow Jerusalem marow kowi uang hanow uang umta lut khai.11Now aia kowh siphaiuüa kowrum Jerusalem marow mih khin khe Nebuknezar paw nami marow re-e kowkowi khai.12Nakhowk khe mang Jehoiakhin, a-u, aia kowh prengia pek miuüa, aia kowh siphaiuüa hai aia kowh maru iukuüa maten Nebuknezar tut-e uang taap khai. Now mang Nebuknezar chowm mang mih raiat ning khe aia dow mang Jehoiakhin kowi khümla now pawla khai.13Nebuknezar dow CHAKRAMANG kim kowi kowh dawngthawnguan hai mang kim kowi kowh dawngthawnguan maten pawla bowk khai. Now CHAKRAMANG kim vüi kuh hown kowh Israel mang Sawlawmawn thawpah mih uanh maten dow aia tawpta pe nak khai. Naiawngün dow CHAKRAMANG rik tekta khowk iawng phaw mih chekhai.14Nami klen kowi Jerusalem marow kowi kowh maru iukuüa maten, tasen kiakma miuüa maten, uanh thawp sarauüa maten, plamphaiuüa maten hai marowchakuüa hailawm bowkbowk kowi maru iun 10,000 ia aia khümla now pawla khai. Pren kowi dow ngaraima miuüa klen kowi amiapaw ta uowi dowi bowt chekhai.15Mang Nebuknezar dow Jehoiakin kowi khümla hanow Babulawn pren kowi pawla khai. Aia dow Jerusalem marow hownia Jehoiakin u, amasi hawmh, aia kowh maru iukuüa hai pren kowi kowh maru iukuüa kowi paw khümla khai.16Mang Nebuknezar dow nacham tasenla kownkow tasen kiakma mih siphai hai akürma mih siphaiuüa kowi khümla 7,000 ia khai, now uanh thawp sarauüa hai lup chang miuüa kowi paw khümla 1,000 ia khai. Naiawngün maru-uüa kowi dow Babulawn pren kowi aia pawla khai.17Aia dow Jehoiakin takcha apahi Matania kowi ta pe chowmah mang khai, now Matania kowi dow Zedekia pahai aia rük pe ming sar khai.18Juda pren kowi Zedekia chowm mang mih dow 21 ning khe chekhai. Aia dow lailowk ning mowr Jerusalem marow kowi chowmla mang khai. A-u dow Libna marowchak Jeremia kowh chama Hamutal chekhai.19Zedekia dow Jehoiakin iawng CHAKRAMANG mik kowi angakma mih lup chang khai.20Jerusalem hai Juda maru-uüa rakowi CHAKRAMANG kowh kunmaraura dow lün pluplup khai. Naiawng rakowi CHAKRAMANG dow aia pur hownia amatni kowi prütah khai. Akung kowi mang Zedekia dow Babulawn pren mang Nebuknezar kowi kingküaah khai.
The Seed Company