2 Manguüa25
1Zedekia chowm mang mih taku ning khe kowh hamüt la kowi hamüt ni khe Babulawn pren mang Nebuknezar dow aia kowh siphai hawmh maten kowi pawla now Jerusalem marow nakowrumta hüah kownkow tarü khai. Now aia dow Jerusalem marow uat kowi krawi khup tangbung khai, now marow riaret kowi dow akroma aia krawi chun pe bawn khai.2Zedekia chowm mang mih lailowk ning mowr Jerusalem marow dow rumta hüah khai.3Nami ning tali la kowi kowh taku ni mih ni khe Jerusalem marow kowi kowh khown dow uang hu ngamlam khai. Naiawng rakowi marowchakuüa kowh dow chakkham hing uowi dowi bowt chekhai.4Akung kowi Babulawnuüa mih Jerusalem marow tap nowng khue parah khai. Nakhowk khe paw Babulawn siphaiuüa dow Jerusalem marow mih rumta hüah reng tak chekhai. Nachenganchepaw Juda siphaiuüa maten dow iak-e khe mang bakan re-e kowh alak kowi kowh tap hai uat kowi kowh tap takra kowi kowh tapplawt iawng ku powt khai. Now amatni dow Jawrdan lawngrawi kowi kowpowt khai.5Nami khin khe Babulawn siphaiuüa dow mang Zedekia kung kowi kawikrawi khai, now aia kowi dow Jeriko dowm kowi krawi ka khümta khai. Nami khin khe mang Zedekia kowh siphai hawmh maten dow powt hanow cham taset plawt khai.6Now amatni dow aia kowi khümla hanow Ribla marow kowi Babulawn mang tut-e kowpawla khai. Now nakowi dow Babulawn mang mih aia kowh aprek phuang pe khai.7Nami kung kowi dow siphaiuüa mih mang Zedekia pur kowi achapauüa kowi saiah khai. Nami kung kowi aia kowh mik pre buk trui paw laita pe khai, now aia kowi dow kri leng hown tawmla hanow Babulawn pren kowi pawla khai.8Babulawn pren kowi Nebuknezar chowm mang mih laitaku ning khe tanga la kowi kowh ranit ni khe mang chawng mih aluchow Nebuzardan dow Jerusalem marow kowi uang khai.9Now Nebuzardan dow CHAKRAMANG kim, mang kim hai Jerusalem marow kowi kowh kim maten krawi towkta khai. Nami klen kowi marow kowi kowh akri akrima mih kim maten paw aia krawi towkta bowk khai.10Nebuzardan nimkrüa kowi kowh uowi mih Babulawn siphai hawmh maten dow Jerusalem marow tap mih khueta khai.11Marow kowi kowh ta uowi miuüa hai Babulawn pren mang prakowi tawi tangila miuüa maten kowi mang chawng mih Nebuzardan mih Babulawn pren kowi pawla khai.12Nachenganchepaw Juda pren kowi kowh grep krum natamingkhet kownkow hai nata chang laih nata chang üa kownkow ngaraima miuüa kowi dow pren kowi aia ta towla ne khai.13Now Babulawn siphaiuüa dow CHAKRAMANG kim kowi kowh kri hown kowh thawpah mih kimchüng pre buk, kri hown kowh bia chowm müa hai tui nungra kri hown kowh bia iukma mih ün theuta naknak khai. Now naiawngün uanh dow Babulawn pren kowi pawla büah khai.14Nami klen kowi amatni dow puh, plawi kuak müi uaibak, maibu kowi kowh bawthi kep müa kaingkep hai Thurai chup kim kowi kowh tawngah kengah mih kri uanh maten pawla büah bowk khai.15Nami klen kowi kuh hai tai hown kowh akeng mih uanh maten paw Nebuzardan pawla bowk khai. Naiawngün uanh kowi dow mairing towk müa puh hai biatum paw uowi chekhai.16Mang Sawlawmawn dow CHAKRAMANG kim vüi kimchüng pre buk, tui nungra kri hown kowh bia iukma mih hai achowm müa ün kri hown thawpah khai. Naiawngün kri dow di lai bowt rakowi ia khaiah dowi bowt chekhai.17Now naiawngün kimchüng dow pachüng kowi aklang lairaiat muk chi chekhai, now naiawngün kimchüng luk kowi alu klang dow sum muk chi chekhai. Nami kimchüng lu kowi dow kri leng tapat lut chekhai, now nami kimchüng lu dow dalim uih iawng kri hown thawpah khai.
Judauüa kowi Nebuzardan khümla mih
18Now mang chawng mih aluchow Nebuzardan dow Judauüa kowh uamow lang kri mih Seraia, akhowng mih uamow Zefania hai Thurai chup kim kangchawng mih sum ia kowi khümla khai.19Now Jerusalem marow kowi kowh ta tapet miuüa pungmadawng kowi kowh tasen miuüa luk kowi towah mih aluchow hai mang kowh prengia pek mih tanga ia kowi aia khümla khai. Nami klen kowi aia dow hawt paw siphai sar reng mih cha rui mih siphai aluchow kowi khümla khai, now marow kowi kowh krawi ta ka khümah mih maru 60 ia kowi paw pawla khai.20Naiawngün khümla mih maru-uüa maten kowi dow Nebuzardan mih Ribla marow kowi Babulawn mang tut-e kowpawla khai.21Naiawngün maru-uüa kowi dow Babulawn pren mang mih Hamat pren kowi kowh Ribla marow kowi saita bowk khai. Naiawng hai Judauüa kowi dow khümla now amatni pren hownia alakma kowi cham pawla khai.Ta towla mih Judauüa kowi Gedalia ta kruitown mih
22Juda pren kowi kowh aia ta towla mih maru-uüa kowi nakruitownla kownkow Nebuknezar dow Ahikam kowh chapa Gedalia kowi towah khai. (Gedalia dow Safan kowh chu chekhai).23Now nami satang tata hanow Juda pren kowi kowh uowi mih siphai aluchowuüa hai amatni kowh maru-uüa dow Mizpa marow kowi Gidalia tut-e uang khai. Naiawngün maru-uüa dow Nethania kowh chapa Ismael, Karea kowh chapa Johanan, Netofa marow hownia kowh Tanhumet kowh chapa Seraia, Makhathi kowh chapa Jazania hai amatni kowh maru-uüa chekhai.24Now amatni hai amatni kowh maru-uüa tut-e kham sawi se Gedalia tek pe mih, “Babulawn pren kowi kowh kruitown miuüa kowi hangkow kram büa diah. Mami pren kowi uowi büa diah, now Babulawn mang tek iawng chang büa diah. Naiawng che enni chang hanow enni naiung kown,” pakhai.25Tawkchedow ranit la khe mih Nethania kowh chapa Ismael dow pawla maru hamüt ia hanow Mizpa marow kowi kowkowi khai, now Gedalia kowi aia saiah khai. (Ismael dow Elisama kowh chu chekhai). Nami klen kowi Gedalia hown kowh taiua uowi mih Judauüa hai Babulawnuüa maten kowi paw saiah khai. Ismael dow mang krungchak maru chekhai.26Nami kung kowi dow Judauüa mih Babulawnuüa kowi lainowmma kram khai bowt. Naiawng rakowi Judauüa bowkbowk dow maru iuk maru sowm hai siphai aluchowuüa mih Aigupta pren kowi powt khai.27Juda pren mang Jehoiakin kla thawng mih 37 ning khe Evil-Merodak dow Babulawn pren kowi chowm mang khai. Nami ning laipre la kowi kowh lacher 27 ni khe aia dow Jehoiakin kowi thawngrum hownia lawtta khai.28Aia dow Jehoiakin kowi klangiungma klowpah klangah khai. Aia dow Babulawn pren kowi Jehoiakin hown tawi taiua uowi mih akeng pren manguüa kowi lak-e Jehoiakin kowi lang towah asung khai. Aia dow Jehoiakin kowi ringkawma mih chowm rah kowi pe chowmah khai.29Evil-Merodak dow Jehoiakin kowi thawngrum hownia kowh tawnguat pe klüpta hanow pe khupah tawnguat sar khai. Nami hownia bowt now Jehoiakin dow sing uowi mowr atungma mang hown tawi taiua cha chakkham khai.30Aia sing uowi mowr dow mang mih aia kowi ni towng kowh charek peah reng chekhai.The Seed Company