2 Manguüa22
1Juda pren kowi Josia chowm mang mih dow raiat ning khe chekhai. Aia dow 31 ning mowr Jerusalem marow mih kruitownla khai. A-u dow Bawzkat marowchak Adaia kowh chama Jedida chekhai.2Josia dow CHAKRAMANG mik kowi aiungma mih lup chang reng chekhai. Aia dow akeng mih tiama pra cham powt dowi kowi a-pu David chang iawng chang reng chekhai.3Aia chowm mang mih lairaiat ning khe Josia dow Azalia kowh chapa (Masulam kowh chu) Safan kowi mih Thurai chupra kim kowi kowchinah khai. Safan dow mang kowh cha rui mih chekhai. Safan kowi mang Josia tek pe mih,4“Uamow lang kri mih Hilkia tut-e en kowkowi diah, now CHAKRAMANG kim kowi kowh maru kawmuüa uang pawla mih tangka pawisa kimplawt chawng miuüa hawt pawah mih dow aia narüaah kaneu kown mih kowtek pe diah.5Nami tangka pawisa dow Thurai chup kim rawk miuüa luk kowi kowh towah mih mingkhet miuüa kowi aia pacham peah lah. Now singh hai hua hown kowh kim chang sarauüa kowi pacham peah sukkri kha lah. Nami klen kowi Thurai chup kim rawk müa phen hai hua bawp ia mih pacham ranla büah lah.7Nami mingkhet miuüa luk kowi kowh napeah kown mih tangka pawisa dow amatni ingsap pe takla dowi tham. Tawngplawng kowchow panow amatni dow kaah sakowm iawng chang lup reng chekhai,” pakhai.8Nakhowk khe mang kowh cha rui mih Safan kowi uamow Hilkia tek pe mih, “CHAKRAMANG kim kowi kowh rirow bowih ang ka khowk,” pakhai. Now nami bowih dow Hilkia mih Safan kowi peah khai, now Safan dow nami bowih mih phatah khai.9Nami kung kowi Safan tek pe mang mih, “Thurai chup kim kowi kowh tangka pawisa dow en kowh naruüa mih uang pawla khowk. Now nami tangka pawisa dow Thurai chup kim chang miuüa luk kowi kowh mingkhet miuüa rut kowi apta khowk,” pakhai.10Nami klen kowi Safan plan tek pe mang mih, “Uamow Hilkia krawi pe ang chabowih lowk,” pakhai. Nahanow aia dow nami chabowih mih mang kowi phat pe khai.11Now mang dow nami ari arow bowih kowi kowh arui uowi mih laiklow tata hanow aia khupah mih tawnguat thekta khai.12Now mang Josia dow uamow Hilkia, Safan kowh chapa Ahikam, Mikaia kowh chapa Akbawr, Safan hai mang kowh maru iuk Asai büah kowi peah ana mih,13“Mami kata khowk mih ari arow bowih kowi kowh arui uowi mih lawnguan dow ang vüi hai makowi kowh Judauüa vüi CHAKRAMANG tut-e kowkowiah now kowlünta büa diah. CHAKRAMANG dow a-i luk kowi kunmarau mih lün pluplup towbowt. Tawngplawng kowchow panow a-i kowh pipu-uüa dow mami bowih kowi kowh arui uowi iawng chün dowi chekhai, now nachünah kownkow mami bowih kowi kowh arui uowi iawng amatni dow chang büah dowi chekhai,” pakhai.14Now nami laiklow tata hanow uamow Hilkia, Ahikam, Akbawr, Safan hai Asai büah dow masiuüa risi Hulda kowi kowphowk pe khai. Hulda dow Thurai chup kim kowi kowh tawnguat mingkhet mih Salum kowh masi chekhai. Now Salum dow Tikva kowh chapa (Harhas kowh chu) chekhai. Hulda uowi mih dow Jerusalem marow lak kowi kowh arah sar kowi chekhai.15Amatni kowi Hulda tek pe mih, “Israeluüa kowh Thurai pe tek ang mih maiawng: Uang chin enni mih maru tut-e kowkowi hanow CHAKRAMANG kowh laiklow kowtek pe diah. CHAKRAMANG tek mih, ‘Mami bowih kowi kowh Juda pren mang phatah mih kowi arui uowi mih maten iawng mami arah kowi hai aia maru-uüa luk kowi phih kraingma ang nauang pawla pe kown.17Tawngplawng kowchow panow amatni dow ang kowi nuata ang hanow akeng mih thuraiuüa vüi kowi cham towk maikhük büah khai, now amatni thawpah mih arup aren hown amatni dow towk ang kunmarau khai. Naiawng rakowi mami arah kowi dow ang kowh kunmarau nalün pluplup kown, now nami dow naia mitah kown nadowi,’ pakhai.18CHAKRAMANG kowh naukrang natukla kownkow uang chin enni mih Juda pren mang kowi kowtek pe büa diah. CHAKRAMANG Israeluüa kowh Thurai tek mih, ‘Mami arah hai aia maru luk kowi kowh piati hai piakra nauang ting kown mih laiklow en ta hanow en kowh sak mih rau khai, now ang CHAKRAMANG pur kowi dow en uang khamsum khai. En matia khupah mih tawnguat dow en thekah khai, now ang pur kowi en uang kar khai. Naiawng rakowi en kowh prasi lük klow dow ang hawt sünta en khowk.20Naiawng rakowi kowng hanow en kowi dow en pipu-uüa tut-e alenma ang napawla en kown, now thaulangma en naka tadupra kown. Mami marow luk kowi phih akraingma ang nauang pawla kown mih dow en natawi khi kown nadowi bowt,’ pakhai,” pape khai.
Nahanow amatni dow kowmang hanow masiuüa risi Hulda krawi tek pe mih naiawngün laiklow mang kowi kowtek pe büah khai.
Nahanow amatni dow kowmang hanow masiuüa risi Hulda krawi tek pe mih naiawngün laiklow mang kowi kowtek pe büah khai.
The Seed Company