2 Manguüa21
1Manase dow laipre ning khe chowm mang khai, now aia dow 55 ning mowr Jerusalem marow kowi chowmla mang khai. A-u ming dow Hefziba chekhai.2Mang Manase dow Israeluüa pur hownia kowh CHAKRAMANG prütta mih chenchapuüa iawng CHAKRAMANG mik kowi suiiai kaniaima mih lup tawi chang khai.3Apa Hezekia krawi piakta khowk mih arah kroma mih kowi kowh chupiiara ün aia krawi plan chang khai iawk. Now Israel mang Ahab chang iawng aia paw Baal thuraiuüa vüi thawp phuchuara ün khai, now Asera limpu ün tawi thawp khai. Aia dow kuang dawng kowi kowh krek ün kowi chupiia khai.4“Jerusalem marow kowi ang nauowi kown” pahai CHAKRAMANG tekah mih aia kowh CHAKRAMANG kim kowi Manase dow akeng thuraiuüa vüi thawp phuchuara ün khai.5Aia dow kuang dawng kowi kowh krek maten kowi nachupiiala kownkow CHAKRAMANG kim kowi kowh viadawng pre buk mih kowi thawp phuchuara ün khai.6Aia dow aia kowh chapa kowi khowm maih kowi nawmah hanow phuchuala arup khai. Aia dow chang mantan khai, cham mü hawra khai, now süngnam hai lümla ngak hown taklawp taiua mih maru tut-e cham paw prengia khai. CHAKRAMANG mik kowi angakma mih lup chang hai aia dow CHAKRAMANG kowi towkah kunmarau khai.7Aia thawpah mih Asera limpu dow CHAKRAMANG kim kowi aia towah khai. Nami kim lawnguan kowi David hai achapa Sawlawmawn kowi CHAKRAMANG tek pe mih, “Jerusalem marow kowi kowh ang kowh kim kowi dow maru kawmuüa mih chowngchowng saksakma nauang chupiia ang kown. Nami marow dow Israel laipre chen hownia kowh ang lang kloah mih chekhai.8Israeluüa che ang kowh ana pek hai amatni kowi kowh ang nar Mosi peah mih ari aiang iawng chün khai hanow amatni pipu-uüa kowi kowh ang peah mih pren hownia amatni mih apowt natakla kown nadowi bowt,” pakhai.9Nachenganchepaw maru kawmuüa dow nami laiklow sünta dowi chekhai. Amatni kowi dow Manase pe changla angak khai. Amatni dow amatni pur hownia CHAKRAMANG prütta mih chenchapuüa lak-e lang chang angak khai.10Nakhowk khe CHAKRAMANG dow aia kowh nar risiuüa hownia maiawng tek pe khai,11“Juda pren mang Manase dow maiawngün suiiai kaniaima mih lup maten chang khai. Aia dow mami arah kowi kowh rik uowi mih Amawruüa lak-e lang chang lup ngak khai. Aia dow Israeluüa kowi aia kowh arup ün kowi pe chup pe iiala mih hown pe changah lup ngak khai.12Naiawng rakowi ang CHAKRAMANG Israeluüa kowh Thurai tek khowk: Jerusalem marowchakuüa hai Juda prenchakuüa luk kowi dow phih kraingma ang nauang pawla pe kown. Nami ta miuüa dow kram kowh pikchu narü kown.13Jerusalem marow kowi dow Samari marow hai Ahab krungchakuüa kowi ang ripah iawng ang naripah kown. Nami marowchakuüa kowi dow ki sawkta lawngpan kowh kümta hüah mih iawng asaima ang namata kown.14Nachenganchepaw ta sing uowi ne tak hanow amatni kowi dow ang nanuata kown, now amatni kowi dow ransu-uüa rut kowi ang naap-ah kown. Nahanow naiawngün ransu-uüa dow amatni kowh uowi mih uanh maten kür hown narupta pe kown.15Tawngplawng kowchow panow amatni dow ang mik kowi angakma mih lup chang büah khai, now Aigupta pren hownia amatni kowh pipu-uüa uang lawt mih ni hownia kawmat mowr pat amatni dow towk ang kunmarau khai,” pakhai.16Nami klen kowi Manase dow aprek uowi dowi mih maru-uüa kowi lainowmma krawi sai khai. Naiawngün maru-uüa kowh vi dow Jerusalem marow kowi kowh tiama kowi hing takan nukluk khai. Aia dow Juda maru-uüa kowi pe changah ngak khai. Naiawng rakowi Juda maru-uüa dow CHAKRAMANG mik kowi angakma mih lup chang khai.17Manase kowh akeng mih lup lawnguan maten hai aia kowh angak lawnguan dow “Juda Manguüa Lawnguan” pami bowih kowi arui uowi bowk chekhai.18Akung kowi Manase dow kowng hanow mang kim ria kowi kowh bakan kowi maru dupah khai. Nami bakan dow Uza kowh chekhai. Aia takcha kowi dow achapa Amawn mih ta chowm mang khai.19Juda pren kowi Amawn chowm mang mih dow 22 ning khe chekhai. Aia dow pre ning mowr Jerusalem marow kowi chowmla mang khai. A-u dow Jawtba marowchak Haruz kowh chama Mesulemet chekhai.20Amawn dow a-pa Manase iawng CHAKRAMANG mik kowi angakma mih lup chang khai.21Aia dow a-pa chang iawng tawi chang khai: A-pa chupah mih arup ün kowi aia paw tawi chupiia khai,22aia dow CHAKRAMANG apipu-uüa kowh Thurai kowi nuata khai, now CHAKRAMANG kowh ana pek aia chün kown nau dowi chekhai.23Aia kowh maru iukuüa dow aia kowi nasaita kownkow sangkrang khai, now aia kim kowi aia kowi saita büah khai.24Tawkche mang Amawn kowi sai miuüa maten kowi dow prenchakuüa mih saita bowk khai. Now aia takcha kowi dow achapa Josia kowi amatni ta pe chowmah mang khai.25Amawn kowh akeng mih lup lawnguan maten dow “Juda Manguüa Lawnguan” pami bowih kowi arui uowi bowk chekhai.26Aia kowi dow aia vüi khowmta bowkta mih tadupra Uza kowh bakan kowi dupah khai. Aia takcha kowi dow achapa Josia mih ta chowm mang khai.
The Seed Company