2 Manguüa18
1Juda pren kowi Ahaz chapa Hezekia chowm mang mih dow Israel pren kowi Ela chapa Hosea chowm mang mih sum ning khe chekhai.2Juda pren kowi Hezekia dow 25 ning khe chowm mang khai. Aia dow 29 ning mowr Jerusalem marow kowi chowmla mang khai. A-u dow Zekaria chama Abija chekhai.3Hezekia dow a-pu David iawng CHAKRAMANG mik kowi aiungma mih lup chang reng chekhai.4Aia dow arah kroma mih kowi kowh chupiiara ün krawi piakta khai, chupiiaah mih hua ün dita pe nak khai, now Asera limpu paw krawi kripta khai. Now kri hown kowh Mosi thawpah mih rua rup paw aia dita naknak khai. Tawngplawng kowchow panow nami khin khe paw Israeluüa dow nami rua rup tut-e chang phuchua reng tak chekhai. Nami rua rup ming dow Nehustan chekhai.5Hezekia dow CHAKRAMANG Israeluüa kowh Thurai luk kowi neplawng nesak khai. Aia iawng mih dow Juda pren manguüa pungmadawng kowi miapaw uowi dowi bowt chekhai; aia dowi rawn paw uowi dowi tak, now aia kung kowi paw uowi dowi bowt chekhai.6Aia dow CHAKRAMANG tut-e asima tatown reng chekhai, now Mosi kowi kowh CHAKRAMANG peah mih ana pek maten aia chün reng chekhai.7Naiawng rakowi CHAKRAMANG dow aia tut-e tawi uowi reng chekhai. Aia changah mih lup maten dow aiungma uang phaw reng chekhai. Aia dow Asuria pren mang kowi kingküaah hanow pe pe mangmu dowi bowt chekhai.8Aia dow Gaza marow hai aria aret kowi kowh süng maten, aiukma mih marow hownia asowmchow mih kua mowr mih Filistinuüa uowi rah kowi krawi senah hanow krawi powngta khai.9Asuria pren mang Salmaneser dow Samari marow kowi uang senah kownkow uang rumta hüah khai. Naiawng phaw mih dow Juda pren kowi Hezekia chowm mang mih tali ning khe chekhai, now Israel pren kowi Ela chapa Hosea chowm mang mih ranit ning khe chekhai.10Sum ning mowr Samari marow rumta kung kowi dow Asuria pren mang mih nami marow powngta khai bowt. Naiawng phaw mih dow Juda pren kowi Hezekia chowm mang mih taruk ning khe chekhai, now Israel pren kowi Ela chapa Hosea chowm mang mih taku ning khe chekhai.11Nami khin khe Asuria pren mang Salmaneser dow Israeluüa kowi khümla hanow Asuria pren kowi pawla khai. Now amatni kowi dow Hala marow, Habawr aw pang kowi kowh Gawzan süng hai Media chenchapuüa kowh marow kowi ün kür hown krawi pe uowiah khai.12Israeluüa luk kowi naiawng uang phaw mih auan dow CHAKRAMANG amatni kowh Thurai laiklow chün büah dowi rakowi chekhai. Amatni dow Mosi hown kowh CHAKRAMANG tatowah mih sangbowk laitawm piakta büah khai. CHAKRAMANG kowh ana pek maten dow sünta büah dowi, now chün paw chün büah dowi chekhai.13Hezekia chowm mang mih laitali ning khe Asuria pren mang Senakerib dow Juda pren kowi kowh tap uowi mih marow maten kowi krawi senah khai, now naiawngün marow dow powngta pe bowk khai.14Nakhowk khe Juda pren mang Hezekia dow Lakhis marow kowi Asuria pren mang tut-e kowchin pe maru hanow krawi tek pe mih, “Ang changta en angak khai. Sakrauma hown taingta tasen bowt diah. En kük ang mih sia ang nape en kown towbowt,” pakhai. Nahanow Asuria pren mang dow Juda pren mang Hezekia kowi tai 260 mawn ngia hai kuh 25 mawn ngia kük pe khai.15Naiawng rakowi Hezekia dow CHAKRAMANG kim hai mang kim kowi kowh tai uowi mih maten Asuria pren mang kowi peta bowk khai.16Nami klen kowi CHAKRAMANG kimbüng hai kimplawt mawm kowi kowh sowah mih kuh krawi krüaah hanow Asuria pren mang kowi krawi peah khai.17Asuria pren mang dow Lakhis marow hownia siphai aluchowuüa kowi kowh lang kri mih sum ia kowi siphai thumchak aiukma hown Jerusalem marow kowi nakowsen mang Hezekia kownkow kowchinah khai. Amatni dow Jerusalem marow kowi uang ting hanow aluk kanh hownia kowh tui iu hawrra re-e maru-uüa chuh pe dawnguan mih rah kowi uang tanai büah khai. Nami tui hawrra dow dowm kowi kowh tiama ria kowi chekhai.18Nami kung kowi amatni dow mang Hezekia kowi nakowhaw kownkow kowchin maru khai. Nakhowk khe Hezekia kowh maru iuk sum ia dow uang lawt hanow kowbüah hown uang takrum khai. Naiawngün maru iuk sum ia pungmadawng kowi kowh lowk ia dow mang kim kowi kowh kruitown mih Hilkia chapa Eliakim, alowk mih dow mang kowh cha rui mih Sebna, now alowk mih dow mang kowh ana pek phuang mih Asaf chapa Joa chekhai.19Nakhowk khe nami sum ia kowi lowk ia mih tek pe kowbüah mih, “Lang kri mih Asuria pren mang kowh laiklow mang Hezekia kowi maiawng kowtek pe büa diah, ‘Tawng luk kowi chow en neplawng nesak?20En kowh dow laiklow krowngchow taih; en kowh dow tawngpaw kür uowi dowi chekhai. Sam tek madiah, mia luk kowi chow en sakowmla kowh en uang kingküa ang?21En neplawng nesak mih dow Aigupta pren luk kowi chekhai. Tawkche Aigupta dow aphukma mih uaklung kawng iawng chekhai. Nami uaklung kawng kowi changla raitua mih maru dow chukta rut reng chekhai. Tawngplawng kowchow panow Aigupta pren mang Faraw kowi dow mapaw kaah sakowm dowi chekhai,’ pape diah.22Nakhowk khe, ‘Anging neplawng nesak mih dow CHAKRAMANG anging kowh Thurai luk kowi chekhai,’ padow enni natek ang chepaw naia kown. Tawkche Thurai kowi chowbowt nadowi bow mang Hezekia peah rukrai mih? Arah kroma mih kowi kowh chupiiara hai phuchuara ün Hezekia piakta mih dow nami Thurai kowh chowbowt nadowi bow? Judauüa hai Jerusalem marowchakuüa kowi dow Jerusalem marow kowi kowh phuchuara kowi chowtaih nachupiia kown mih Hezekia tek pe khowk nadowi bow?23“Enni kowh mang kowi kowtek pe diah. Ang kowh chakramang Asuria pren mang mih enni vüi maiawng nachang enni kown nauta. Tuk chowm kawrnga mih maru iun che enni nowng tüng ang 2,000 ia hanow ang nape enni kawrnga 2,000 kown.24Nakhowt chow khowm uowi dowi tak hanow Aigupta pren kowi kowh kawrnga kari hai kawrnga kowi kowh chowm miuüa kowi enni neplawng nesak chepaw Asuria pren mang kowh lang sowm mih maru kowi khowm enni nanowng kown nadowi tak.25CHAKRAMANG tek ang dowi kowi mami pren nauang piak kownkow ang uang sen mih chekhai bow? Mami pren uang senah hanow napiakta kown mih CHAKRAMANG ngengche tek ang khowk chekhai,” pape diah.26Nakhowk khe tasen kowi kowh aluchow kowi amatni tek pe mih, “Chakramang, sakrauma hai Aramaik lai hown klang anging diah. Nami lai anging tukta chow. Hebrai lai hown hauang klang anging diah. Tawngplawng kowchow panow tap luk kowi kowh maru-uüa natawi tukta bowk kown chekhai,” pakhai.27Nachenganchepaw nami aluchow tek pe kowbüah mih, “Naiawngün laiklow nauang tek kownkow ang kowh chakramang uang chin ang mih enni kowh mang hai enni tut-e krowngchow nadowi chekhai. Naiawngün laiklow dow tap luk kowi kowh maru-uüa vüi paw na chekhai. Tawngplawng kowchow panow mami marow dow anging nauang rumta kown. Nakhowk khe enni kawm iawng amatni paw natawi kawm kown. Amatni paw chakkham sakkrai lai rakowi kowmatia kowh kih nacha kown, now kowmatia kowh iantui nakham kown,” pape khai.28Nami kung kowi dow tasen kowi kowh aluchow mih iowng hanow tap luk kowi kowh maru-uüa ta bowk iawng Hebrai lai hown atün atünma tek mih, “Enni mih Asuria pren kowi kowh mangkri laiklow sünta büa diah,29‘Mang Hezekia nowng kuan enni dowi iawng uowiah büa diah. Aia dow ang kowh kür hownia nowng lawng enni kown nadowi.30CHAKRAMANG kowi enni naowmla kownkow aia dow maiawng natek enni chepaw naia kown, “CHAKRAMANG nalawng a-i ngengche kown. Mami marow dow Asuria pren mang rut kowi naap-ah kown nadowi,” napah kown. Tawkche nami laiklow enni naowm kown nadowi,’ pakhai,” pape khai.31Tasen kowi kowh aluchow plan tek mih, “Asuria pren mang tek mih, ‘Ang hown tatow sangbowk laitawm büa diah, now marow hownia uang lawt hanow ang tut-e uang tawi uowi büa diah. Nahanow enni chowlowkkow kowh grep ruih hownia hai uidut singh hownia enni naka cha uih kown, now kowmatia tuikuam hownia kowh tui enni naka kham kown.32Nami kung kowi dow ang nauang hanow enni kowh pren iawng mih pren kowi ang nacham pawla enni kown. Nakowi dow luprak hownia enni naka kawmdi kown, now grep krum hownia enni naka grep tui sar kown, now kanrawn sau hai kuai tui enni naka kown. Ang laiklow iawng enni chang hanow akhawr hown enni nakowng kown nadowi. CHAKRAMANG nalawng enni kown taih pahai Hezekia tek enni khe hangkow sünta büah. Tawngplawng kowchow panow aia dow nami laiklow hown kuan enni mih chowbowt.33Asuria pren mang kür hownia akeng chenchapuüa kowh thuraiuüa mih amatni kowh pren nowng lawng mih uowi ne khowk bow?34Tawng kowi chow Hamat marow hai Arpad marowchakuüa kowh thuraiuüa? Tawng kowi chow Sefarvaim marow, Hena marow hai Ava marowchakuüa kowh thuraiuüa? Naiawngün thuraiuüa mih ang kowh kür hownia Samari marow kowi nowng lawng tak bow?35Naiawngün pren kowi kowh thuraiuüa maten dow ang kowh kür hownia amatni kowh pren kowi miapaw nowng lawng dowi chekhai. Nami kowi tawng iawng chow CHAKRAMANG mih Jerusalem marow kowi ang kowh kür hownia nowng lawng kown?’ pakhai,” pape khai.36Nachenganchepaw maru kawmuüa dow tawng iawng paw klangah dowi kowi rarimma uowi büah khai. Tawngplawng kowchow panow naklangah dowi kownkow amatni kowi dow mang Hezekia rik tek pe khowk chekhai.37Nami kung kowi dow mang kim kowi kowh kruitown mih Hilkia chapa Eliakim, mang kowh cha rui mih Sebna hai satang phowng mih Asaf chapa Joa büah mih sak piak rakowi amatni kowh tawnguat thekah büah khai. Nami kung kowi dow amatni mih mang kim kowi uang büah khai, now Asuria pren hownia kowh tasen kowi kowh aluchow krawi tek pe mih maten Hezekia kowi uang tek pe büah khai.
The Seed Company