2 Manguüa17
1Israel pren kowi kowh Samari marow kowi Ela chapa Hosea chowm mang mih dow Juda pren kowi Ahaz chowm mang mih laipre ning khe chekhai. Aia dow taku ning mowr Samari marow kowi chowmla mang khai.2Aia dow CHAKRAMANG mik kowi angakma mih lup chang khai. Nachenganchepaw Israel pren kowi kowh rik chowm mang miuüa khowt aia dow tawi chang angak dowi chekhai.3Asuria pren mang Salmaneser dow mang Hosea kowi uang senah khai. Naiawng rakowi Hosea dow mang Salmaneser nimkrüa kowi uowi takla khai, now aia dow ning towng mangmu paw Salmaneser kowi pek takla khai.4Akat khe mang Hosea dow Asuria pren mang kowi kingküaah kownkow Aigupta pren mang So tut-e kowlü khowng kown mih kowchin maru khai. Now ning towng kowh mangmu kawk paw Asuria pren mang kowi aia peah dowi bowt chekhai. Naiawng Hosea kuanah mih dow Salmaneser tukta khai bowt. Naiawng rakowi mang Salmaneser dow mang Hosea kowi khümah hanow thawngrum kowi towah khai.5Akung kowi dow Asuria pren mang Salmaneser mih aia kowh siphai hawmh hown Israel pren paprenma kowi krawi senah khai. Now amatni dow nami pren kowi kowh Samari marow mih sum ning mowr rumta büah hüah khai.6Israel pren kowi Hosea chowm mang mih taku ning khe Asuria pren mang Salmaneser dow Samari marow kowpowngta khai. Now nakowi kowh Israeluüa kowi dow Asuria pren kowi pawla khai. Now amatni kowi dow Hala marow, Habawr aw pang kowi kowh Gawzan süng hai Media chenchapuüa kowh marow kowi ün kür hown krawi pe uowiah khai.7Israeluüa luk kowi naiawng uang phaw mih auan dow Aigupta pren hownia hai Aigupta pren kowi kowh Faraw nar lup changra hownia kowh uang lawtla mih CHAKRAMANG amatni kowh Thurai kowi kingküala mih lup ngak chang büah rakowi chekhai. Amatni dow akeng mih thuraiuüa kowi cham chupiia büah khai,8now amatni dow amatni pur hownia kowh CHAKRAMANG prütta mih chenchapuüa iawng tawi chang khai. Nami klen kowi Israel manguüa thawpah mih rirow iawng amatni tawi chün khai.9Israeluüa dow CHAKRAMANG ana pek kowi kingküala mih lup maten kukpa chang reng chekhai. Amatni dow aiukma mih marow kowi chepaw, asowmchow mih kua kowi chepaw amatni cham uowi rah towng kowi arah kroma mih kowi kowh chupiiara krawi thawp büah reng chekhai.10Amatni dow alowngma mih arah towng hai aram chakma mih singh klim towng amatni naphuchuaah kown mih hua hai Asera limpu krawi phük khai.11Amatni dow amatni pur hownia CHAKRAMANG prütta mih chenchapuüa iawng arah kroma mih kowi kowh chupiiara kowi tawi chang phuchua büah reng chekhai. Nami klen kowi CHAKRAMANG kunmaraula mih lup ngak paw ahuma chang büah khai.12Amatni dow CHAKRAMANG hangah khowk chepaw chup arup reng tak chekhai.13Israeluüa hai Judauüa nauowi kaneu kownkow CHAKRAMANG dow aia kowh risiuüa maten hai khi mukmang miuüa maten kowi maiawng uang pe tekah khai, “Angak hownia uang plan büa diah. Now enni pipu-uüa nachünah kownkow ang peah mih ari aiang maten hai ang kowh nar risiuüa naphuang enni kownkow ang peah mih ana pek maten chünah büa diah,” pakhai.14Nachenganchepaw Israeluüa dow nami laiklow sünta dowi chekhai. Amatni dow CHAKRAMANG amatni kowh Thurai kowi owm dowi mih pipu-uüa iawng lai üa kürma chekhai.15Amatni dow rirow maten, amatni pipu-uüa vüi CHAKRAMANG tow pe mih sangbowk laitawm hai amatni kowi kowh tek pe mih maten nau chün büah dowi chekhai. Amatni dow asung uowi dowi mih thuraiuüa kowi cham chupiiara kowi amatni kowi paw kaah tawng dowi bowt. Amatni kowi dow amatni riaret kowi kowh chenchapuüa chowm krang uowi krang iawng natawi uowi dowi kownkow CHAKRAMANG hangah khowk chowdiah. Tawkche naiawng tawi uowi büah khai.16Amatni dow CHAKRAMANG amatni kowh Thurai kowh ana pek maten nuata khai. Now amatni dow amatni vüi lawngha hown klai chia chah rup pre buk khai, now Asera limpu thawp büah lowk khai. Amatni dow krek kowi hai Baal thuraiuüa kowi ün chupiia büah khai.17Amatni dow amatni kowh chauüa kowi khowm maih kowi nawmah hanow phuchuala arup khai. Amatni dow cham mü hawra khai, now chang mantan büah khai. Nami klen kowi CHAKRAMANG mik kowi angakma mih lup chang hanow CHAKRAMANG kowi towkah kunmarau büah khai.18Naiawng rakowi CHAKRAMANG dow Israeluüa kowi lainowmma kunmarau khai, now amatni kowi dow aia pur hownia aia prütta khai. Naiawng rakowi ta uowi mih dow Juda krungchakuüa krowngchow towbowt.19Tawkche Juda krungchakuüa paw CHAKRAMANG amatni kowh Thurai ana pek chün dowi kowi Israeluüa tüngla pe mih angak iawng tawi chang büah khai.20Naiawng rakowi CHAKRAMANG dow Israel krungchakuüa maten kowi nuata khai. Amatni kowi dow ransu-uüa rut kowi ap-ah hanow aia towkah ngare khai. Now amatni kowi dow aia pur hownia aia prütta khai.21David kowh pren Juda hownia Israeluüa kowi CHAKRAMANG lang kraah mih khin khe Israeluüa dow Nebat kowh chapa Jeroboam kowi pe chowmah mang khai. Now CHAKRAMANG kowi Israeluüa chupiia mih dow Jeroboam taingta pe hanow akraingma mih lup ngak aia pe changah khai.22Israeluüa dow Jeroboam changah mih angak maten chang reng chekhai. Amatni dow nami angak hownia uang plan dowi chekhai.23Achur kowi CHAKRAMANG dow aia nar risiuüa kowi kowh tek pe iawng aia pur hownia amatni kowi prütta khai bowt. Naiawng rakowi Israeluüa kowi dow amatni pren hownia khümla hanow Asuria pren kowi kowpawla khai bowt. Amatni dow kawmat paw nakowi chowreng tak chekhai.24Asuria pren mang dow Babel marow, Kut marow, Ava marow, Hamat marow hai Sefarvaim marow hownia uang pawla maru hanow Israeluüa kowh uowi rah Samari riaret kowi kowh marow kowi krawi pe uowiah khai. Amatni dow Samari marow hai ariaret kowi kowh kua ün krawi powngta bowk hanow krawi uowi büah khai.25Nakowi uang uown uowi khe amatni dow CHAKRAMANG kowi chupiia dowi chekhai. Naiawng rakowi CHAKRAMANG dow amatni pungmadawng kowi uang chin pe krangsi hawmh khai. Naiawngün krangsi hawmh dow amatni kowi uang makah hanow kowngta sangrum khai.26Nakhowk khe maru lowk ia dow Asuria pren mang kowi maiawng uang phowng pe satang khai, “En khümla hanow Samari marow kowi en pe uowiah mih maru-uüa maten dow nami pren kowi kowh Thurai kowi tawng iawng chow chupiiaah kown mih tuk büah dowi chekhai. Naiawng rakowi Thurai dow amatni pungmadawng kowi uang chin pe krangsi hawmh hanow amatni kowi kowngta khai,” pakhai.27Nakhowk khe Asuria pren mang dow aia maru-uüa kowi maiawng peah ana khai, “Samari marow hownia kowh enni uang khümla mih uamowuüa pungmadawng hownia nami marow kowi kowchin lowk ia diah. Aia dow nakowi pacham tawi uowi lah, now nakowi kowh maru-uüa kowi Thurai kowi chupiia krang pacham tüngsangah lah,” pakhai.28Naiawng rakowi Samari marow hownia kowh khümla mih uamowuüa pungmadawng hownia Bethel marow kowi kowchin lowk ia khai bowt. Now aia dow maru-uüa kowi tawng iawng chow Thurai kowi chupiiaah kown mih krang krawi tüngsangah khai.29Nachenganchepaw kua hai marow kowi kowh krawi uowi mih maru-uüa dow amatni uowi rah towng kowi chowlowkkow thurai rup thawp büah khai. Now naiawngün arup dow Israeluüa thawpah mih arah kroma mih kowi kowh chupiiara kowi krawi towah büah khai.30Naiawng hai Babel marowchakuüa thawpah mih dow Sukawt-Benawt thurai, Kut marowchakuüa thawpah mih dow Nergal thurai, Hamat marowchakuüa thawpah mih dow Asima thurai,31now Ava marowchakuüa thawpah mih dow Nibhaz hai Tartak thurai chekhai. Now Sefarvaim marowchakuüa dow amatni kowh Adramelek thurai hai Anamelek thurai vüi amatni kowh chauüa kowi maih kowi nawmah hanow changla phuchua khai.32Amatni dow bowkbowk CHAKRAMANG kowi paw chupiiala reng chekhai, now arah kroma mih kowi kowh chupiiara kowi ün nachang uamow lup kownkow amatni pungmadawng hownia achaing achaing mih maru tow büah khai.33Amatni dow CHAKRAMANG kowi chupiiala khai, now Samari marow kowi amatni uang uowi dowi tak khe kowh amatni pren kowi kowh rirow iawng amatni chowlowkkow thuraiuüa kowi paw chupiiala reng chekhai.34Amatni dow kawmat paw naiawngün rirow prim mih chün büah reng tak chekhai. Amatni dow CHAKRAMANG kowi achingma chupiia mih nadowi chekhai, now Jakawb chapauüa tut-e kowh CHAKRAMANG peah mih ari iang hai ana pek chün büah dowi chekhai. Jakawb kowi kowh CHAKRAMANG rük pe ming sar mih dow Israel chekhai.35Israeluüa hown tatow sangbowk laitawm mih khin khe CHAKRAMANG dow maiawng amatni kowi peah ana khai, “Akeng thuraiuüa kowi dow ringkawma hown enni nakram kown nadowi, amatni pur kowi dow enni natabawk kown nadowi, amatni kowi dow enni natawi chupiia kown nadowi, now amatni vüi enni nachang phuchua kown nadowi.36Tawkche Aigupta pren hownia akürma mih rut hown uang lawtla enni mih CHAKRAMANG kowi chowtaih enni nachupiia kown. Aia pur kowi chowtaih enni natabawk kown, now aia vüi kowi chowtaih enni nachang phuchua kown.37Enni vüi kowi kowh aia rui enni mih ari arow, alow pek, ari aiang hai ana pek dow kaneuma enni nachünah kown. Akeng thuraiuüa kowi enni nachup naiia kown nadowi.38Enni hown kowh ang tatowah mih sangbowk laitawm dow sak kowi towah büah reng diah. Akeng thuraiuüa kowi enni nachupiia kown nadowi.39CHAKRAMANG enni kowh Thurai kowi chowtaih enni nachupiia kown. Nahanow enni ransu-uüa maten hownia aia chowtaih nalawng enni kown,” pakhai.40Tawkche Israel pren kowi kowh uang uowi mih akeng mih chenchapuüa dow naiawngün laiklow sünta dowi chekhai. Amatni dow alai khe kowh chowm krang uowi krang prim iawng uowi büah khai.41Amatni dow CHAKRAMANG kowi paw chupiiala khai, now amatni kowh akeng mih thuraiuüa kowi paw chupiiala khai. Kawmat paw amatni kowh chauüa hai chu-uüa dow amatni pipu-uüa chang iawng rowprowp chang büah khai.
The Seed Company