2 Manguüa16
1Juda pren kowi Jotham chapa Ahaz chowm mang mih dow Israel pren kowi Remalia chapa Peka chowm mang mih lairanit ning khe chekhai.2Ahaz dow pirmi ning khe chowm mang khai. Aia dow laitaruk ning mowr Jerusalem marow kowi chowmla mang khai. Aia dow CHAKRAMANG aia kowh Thurai mik kowi aiungma mih lup a-pu David chang iawng tawi chang dowi chekhai.3Aia dow Israel manguüa iawng tawi chang angak khai. Aia dow aia kowh chapa kowi khowm maih kowi nawmah hanow phuchuala arup khai. Naiawng hai Israeluüa pur hownia kowh CHAKRAMANG prütta mih chenchapuüa iawng suiiai kaniaima mih lup aia tawi chang khai.4Aia dow arah kroma mih kowi kowh chupiiara ün, hungh luk kowi ün hai aram chakma mih singh klim towng kowi ün tawncher hown chang phuchua reng chekhai, now nam iungma mih maikhük paw towk reng chekhai.5Siria pren mang Rezin hai Israel pren mang Peka iüah dow Jerusalem marow kowi uang senah kownkow uang khai. Now amatchi dow Ahaz hailawm marow mih uang umta lut khai. Nachenganchepaw mang Ahaz kowi dow nowng sen iüah dowi chekhai.6Nami khin khe Siria pren mang Rezin dow Elat marow hownia Judauüa kowi prütta khai, now nami marow dow aia plan powngta khai iawk. Nahanow Siriauüa dow Elat marow kowi kowuowi khai bowt. Amatni dow kawmat paw nakowi uowi reng tak chekhai.7Naiawng rakowi mang Ahaz dow Asuria pren mang Tiglat-Pileser tut-e kowchin maru hanow krawi tek pe mih, “Ang dow en kowh nar hai en kowh chapa chekhai. Siria pren mang hai Israel pren mang uang sen ang mih hownia uang lawng ang diah,” pakhai.8Nakhowk khe Ahaz dow CHAKRAMANG kim hai mang kim kowi kowh kuh hai tai ün pawah hanow awmrawm sung iawng hai Asuria pren mang vüi krawi sa pe khai.9Naiawng rakowi Asuria pren mang dow Ahaz kowi lawngah kown mih nauta khai. Nahanow aia dow Siriauüa kowh Damaska marow kri mih uang senah hanow powngta pe khai. Nami marowchakuüa kowi dow khümla hanow Kir marow kowi aia uang pawla khai, now Siria pren mang Rezin kowi paw aia saila khai.10Nakhowk khe mang Ahaz dow Damaska marow kowi kowkowi hanow mang Tiglat-Pileser hown kowtakrum khai. Now nakowi dow aia kowkhi phuchuara lowk khai. Nami phuchuara dow akuh kowi uowi iawng rowprowp nape thawpah kownkow uamow Uria kowi aia uang krawi sa pe akuh khai.11Naiawng rakowi uamow Uria dow Damaska marow hownia kowh mang Ahaz uang krawi sa pe mih akuh rowprowp thawp phuchuara lowk khai. Aia dow Damaska marow hownia Ahaz uang plan dowi rawn nami phuchuara mih ki thawpta khai bowt.12Mang Ahaz dow Damaska marow hownia uang plan hanow nami phuchuara mih uang khi khai bowt, now aia dow nami phuchuara kowi kowkowi hanow phuchuara luk kowi kowchang phuchua khai.13Nakowi dow tikah mih uanap, kawmdi uanap hai khamah mih uanap aia kowchang khai. Now taking tasangra uanap kowi kowh vi paw phuchuara kowi aia krawi thetah khai.14Aia dow CHAKRAMANG kim hai phuchuara sar takra kowi kowh CHAKRAMANG pur kowi towah mih kri hown kowh thawpah mih phuchuara prim mih cham sütta khai. Now nami phuchuara prim dow phuchuara sar tawngphak prakowi aia towah khai.15Nami kung kowi dow uamow Uria kowi maiawng hai mang Ahaz peah ana khai, “Khaleng hownia now paimi phuchuara sar kowi rau-e khe atungma en nakowchang tikah mih uanap kown, now iak pra khe dow atungma en nakowchang kawmdi uanap kown. Now mang kowh tikah mih uanap hai kawmdi uanap paw en nakowchang kown. Nami klen kowi prenchak maru kawmuüa uang pawla mih tikah mih uanap, kawmdi uanap hai khamah mih uanap paw en nakowchang kown. Tikah mih uanap hai akeng mih tawncher uanap kowi kowh vi dow nami phuchuara luk kowi en nakrawi thetah kown. Tawkche Thurai naukrang natukla kownkow paimi kri hown kowh phuchuara ang natawngah kown,” pakhai.16Uamow Uria dow mang Ahaz ana pek iawng rowprowp lup maten chang khai.17Mang Ahaz dow kri hown kowh thawpah mih tawkpla pletta bowk khai, now biatum ün dow aia cham pawla khai. Now kri hown kowh thawpah mih chia kum luk kowi kowh chowmah mih biatum dow cham sütta hanow hua chüng kowi cham chowmta hüah khai.18Now aia dow Asuria pren mang kowi nape sak-ihah kownkow Tanai Ni vüi CHAKRAMANG kim kowi kowh khupah mih uaniang paw lutta khai, now CHAKRAMANG kim kowi mang kowkowi khe kowh vüi hawt thawp pe mih kupra dow piakta khai bowt.19Mang Ahaz kowh akeng mih lup lawnguan maten dow “Juda Manguüa Lawnguan” pami bowih kowi arui uowi chekhai.20Akung kowi mang Ahaz dow kowng hanow David marow kowi kowh aia pipu-uüa tadupra kowi maru dupah khai. Now aia takcha kowi dow achapa Hezekia mih ta chowm mang khai.
The Seed Company