2 Krungchakuüa35
1Now Josia mih CHAKRAMANG vüi Jerusalem marow kowi chang Takat Pawi khai. Maru kawmuüa mih ning uown kowi kowh la uown laitali ni mih ni khe Takat Pawi kowi kowh sunah kown mih ruapur chah ngenah khai.2Josia mih uamowuüa kowi amatni kowh lup bowk pe khai, now CHAKRAMANG chup kim kowi nachang lup kownkow peah sakkhawtra khai.3Now Israeluüa maten kowi kowh tüngsang mih hai CHAKRAMANG vüi kowi kowh lang kraah mih Leviuüa kowi Josia tek pe mih, “Israel mang David kowh chapa Sawlawmawn thawpah mih CHAKRAMANG chup kim kowi chimsaima mih sangbowk laitawm tawkpla towah büa diah. Nami sangbowk laitawm tawkpla mih enni akawt takla dowi bowt. Kawmat hownia dow CHAKRAMANG enni kowh Thurai kowh lup hai aia kowh maru-uüa kowh lup chang büah towbowt.4Israel mang David hai achapa Sawlawmawn ruila mih ana pek iawng enni matia chowlowkkow machak kowi kowh lup bak uowi iawng nachang kown mih kamrüt büa diah.5“CHAKRAMANG chup kim kowi Israeluüa uang pawla uanap khe Israel maten kowi naia khowngla kownkow enni Leviuüa mih chowlowkkow machak athum athumchow tabakah büa diah.6Now enni dow Takat Pawi vüi kowi kowh ruapur chah ngen mih chekhai rakowi kowmatia kowi tachim tasai büa diah, now Mosi kowi kowh CHAKRAMANG peah mih ana iawng Israeluüa naia changla Takat Pawi kownkow achang takla mih chang pe büa diah,” pakhai.7Nami kung kowi dow Josia mih nami re-e kowh uowi mih maten vüi Takat Pawi kowi nachangla phuchua kown mih rua hai ruapur chah 30,000 pum hai chiala 3,000 pum peah khai. Naiawngün maten dow mang Josia mih aiamat dawngthawnguan hownia kowh peah mih chekhai.8Now mang kowh maru iukuüa paw amatni kowh tawncher hownia amatni sak nau hown maru-uüa kowi, uamowuüa kowi hai Leviuüa kowi nachangla phuchua kownkow tawi pe khai. Now Thurai chup kim kowi kowh aluchow Hilkia, Zekaria hai Jehiel büah paw nachangla Takat Pawi kownkow rua hai ruapur 2,600 pum hai chiala 300 pum uamowuüa kowi tawi pe khai.9Now Levi krungchak kowi kowh aluchow Konania, aia naumow Semaia hai Nethanel, Hasabia, Jeiel hai Jozabad büah paw Leviuüa nachangla phuchua kownkow rua hai ruapur 5,000 pum hai chiala 500 pum tawi pe khai.10Naiawng hai nachang Thurai lup kown mih kamrüt büah khai, now mang kowh ana pek iawng uamowuüa hai Leviuüa mih amatni chowlowkkow uowi rah kowi iowng büah khai.11Takat Pawi chang müa rua hai ruapur Leviuüa ngenta khowk hanow uamowuüa mih Leviuüa rut hownia tawi paw avi reng chekhai, now naiawngün vi mih phuchuara kowi krawi thetah büah reng, now Leviuüa mih naiawngün tawncher kowi kleu pe apik reng chekhai.12Now amatni dow nami chaknga mih chowlowkkow machak kowi kowh thumchak uowi iawng naia changla tikah mih uanap kownkow bak pe khai. Amatni dow Mosi ruila mih ana pek iawng naia changla uanap kownkow naiawng chang mih chekhai. Now chiala nga kowi paw naiawng changah büah khai.13Amatni dow Takat Pawi kowi kowh tawncher mih ari kowi uowi iawng maih kowi tikah büah khai, now changla phuchua mih chaknga dow puh achaing achaing hown engah hanow alenma maru kawmuüa kowi pe chaah büah khai.14Naiawng hai ni chut chi phuchuara kowi uamowuüa dow phuchua hai tikah mih uanap chang khai. Now naiawngün chur khe dow Leviuüa mih amatni matia vüi hai Arawn krungchak hownia kowh uamowuüa vüi Takat Pawi chang müa tawncher kamrüt khai.15Naiawng sun Takat Pawi mih khin khe David, Asaf, Heman hai risi Jeduthun büah kowh ana pek iawng Asaf krungchak hownia kowh meng sarauüa hai tingteng, prui, towmmow hai taraw sarauüa dow amatni chowlowkkow uowi rah kowi uowi khai. Nami khin khe tapplawt maten kowi dow achawng mih uowi bowk chekhai. Amatni dow towla lup hüah now cham kowi kla dowi chekhai. Tawngplawng kowchow panow amatni vüi Takat Pawi kowi lakke takla mih chap maten Leviuüa kamrüt pe khai.16Naiawng hai nami ni dow mang Josia ana pek iawng CHAKRAMANG vüi chang Takat Pawi büah khai, now phuchuara luk kowi tikah mih uanap pawi chang büah khai.17Nami khin khe nakowi kowh Israeluüa uowi mih maten dow Takat Pawi hai The pe tuah dowi mih kawm Pawi ranit ni mowr sun büah khai.18Naiawng mih Takat Pawi dow risi Samuel chowng hownia Israeluüa mih katpaw sun dowi tak chekhai. Uamowuüa, Leviuüa, Jerusalem marowchakuüa, Judauüa hai Israeluüa maten hown Josia sun Takat Pawi mih iawng Israel manguüa pungmadawng kowi miapaw sun dowi tak chekhai.19Naiawng Josia sun Takat Pawi mih dow aia chowm mang mih lairaiat ning khe chekhai.20Thurai chup kim lup maten Josia ki changta bowk kung kowi dow Aigupta pren mang Nekaw mih Iufratis aw re-e kowh Karkemis marow kowi nauang senah kownkow uang khai. Nakhowk khe mang Nekaw kowi nakowsenah kownkow Josia mih kowtarü khai.21Nachenganchepaw Josia tut-e mang Nekaw uang chin pe maru hanow krawi tek pe mih, “Aw Juda pren mang, tawng chow achi kowh ran uowi? Kawmat kowh ang uang tarü tasen mih dow ang uang sen en mih nadowi; ang ransu-uüa kowi nasenah kownkow ang uang mih chowtaih. Thurai mih alenma ransu-uüa kowi nasen kownkow tek ang khai. Naiawng rakowi ang hown kowh uowi mih Thurai kowi hauang hangah diah; en che hangah hanow aia mih napiakta en kown chekhai,” pakhai.22Nachenganchepaw Josia mih naplan lak dow mang Nekaw kowi nasenah kown kamrüt khai. Naiawng rakowi aia dow aia kowi maru natuk matah dowi kownkow tawnguat achap kawm hown tatawng khai. Thurai ana pek iawng mang Nekaw tek pe mih kowi aia dow sünta dowi kowi Megido dowm kowi nakowsenah kownkow kowtarü khai.23Nami khin khe aia kowi dow leba dowk miuüa ap-ah hanow aia buk kowi leba sek kak khai. Nakhowk khe aia kowh maru-uüa kowi Josia tek pe mih, “Cham pawla ang büah bowt, ang ka arau mih ahuma chekhai,” pakhai.24Naiawng rakowi aia kowh kawrnga kari hownia aia kowi klala now akeng mih kawrnga kari kowi aia kowh maru-uüa tangah khai. Now aia kowi dow Jerusalem marow kowi uang pawla khai, now aia dow nakowi hing kowng khai. Now aia kowh uak dow aia pipu-uüa tadupra kowi maru dupah khai. Nakhowk khe Juda pren hai Jerusalem marow kowi kowh maru maten mih aia vüi kowi uowila uiting uangtak khai.25Josia vüi kowi Jeremia mih thawn pe kar meng khai, now Josia lawnguan kowi kowh nami kar meng dow kawmat paw meng sarauüa mih tek reng tak chekhai. Naiawngün meng dow Israeluüa vüi uang hing chowng rirow khai, now naiawngün meng dow Kar Meng pami bowih kowi ruiah khai.26Josia kowh akeng mih lup lawnguan maten hai CHAKRAMANG kowh ari aiang iawng Thurai kowi aia ringkaw mih lawnguan dow auown hownia achur pat “Israel hai Juda Manguüa Lawnguan” pami bowih kowi arui uowi bowk chekhai.
The Seed Company