2 Krungchakuüa36
1Akung kowi prenchak maru-uüa dow Josia chapa Jehoahaz kowi Jerusalem marow kowi pawla hanow apa takcha aia kowi ta pe chowmah mang khai.2Juda pren kowi Jehoahaz chowm mang mih dow 23 ning khe chekhai. Aia dow sum la mowr Jerusalem marow kowi chowmla mang khai.3Aigupta pren mang Faraw-Nekaw dow Jehoahaz kowi Jerusalem kowi kowh aia kowh mang chowm rah khünta pe khai. Now Faraw-Nekaw dow tai 90 mawn ngia hai kuh 35 set ngia mangmu nauang pe kownkow Juda prenchakuüa luk kowi peah kurdik khai.4Aia dow Jehoahaz kowh alowk mih tainau Eliakim pami kowi Juda pren hai Jerusalem marow luk kowi pe chowmah mang khai, now aia dow Eliakim pami ming takcha kowi Jehoiakim pahai chap pe ming khai. Nachenganchepaw Jehoahaz kowi dow khümla hanow Aigupta pren kowi Faraw-Nekaw pawla khai.5Juda pren kowi Jehoiakim chowm mang mih dow 25 ning khe chekhai. Aia dow lailowk ning mowr Jerusalem marow kowi chowmla mang khai. Jehoiakim dow CHAKRAMANG mik kowi angakma mih lup chang reng chekhai.6Babulawn pren mang Nebuknezar dow Jerusalem kowi uang senah hanow Jehoiakim kowi khümah khai, now aia kowi dow kri leng hown tawmah hanow Babulawn pren kowi Nebuknezar pawla khai.7CHAKRAMANG kim kowi kowh asung khakma mih uanh paw Babulawn pren kowi pawla ne hanow Nebuknezar mih aia kowh mang kim kowi towah khai.8Jehoiakim kowh akeng mih lup lawnguan maten hai aia kowh suiiai kaniaima mih lup ngak lawnguan maten dow “Israel hai Juda Manguüa Lawnguan” pami bowih kowi arui uowi bowk chekhai. Akung kowi aia takcha kowi dow achapa Jehoiakin mih ta chowm mang khai.9Juda pren kowi Jehoiakin chowm mang mih dow lairaiat ning khe chekhai. Aia dow sum la hown hamüt ni mowr Jerusalem marow kowi chowmla mang khai. Jehoiakin dow CHAKRAMANG mik kowi angakma mih lup chang reng chekhai.10Chungrau khin chur pra khe mang Nebuknezar dow Jehoiakin kowi khümla hanow Babulawn pren kowi pawla khai. Nakhowk khe mang Nebuknezar dow CHAKRAMANG kim kowi kowh asung khakma mih uanh ahuma pawla khai. Aia dow Jehoiakin takcha apahi Zedekia kowi Juda pren hai Israel pren luk kowi ta pe chowmah mang khai.11Juda pren kowi Zedekia chowm mang mih dow 21 ning khe chekhai. Aia dow lailowk ning mowr Jerusalem marow kowi chowmla mang khai.12Aia dow CHAKRAMANG aia kowh Thurai mik kowi angakma mih lup chang reng chekhai. CHAKRAMANG laiklow phuang mih risi Jeremia tek pe mih laiklow dow khamsumma hown aia sünta pe dowi chekhai.13Nami klen kowi CHAKRAMANG ming hown pe khamah sawi mih mang Nebuknezar kowi paw aia kingküaah khai. Aia dow lai üa kürma hai saktuak khawtma rakowi CHAKRAMANG Israeluüa kowh Thurai tut-e uang plan dowi chekhai.14Nami klen kowi uamowuüa kowh aluchowuüa maten hai Juda maru-uüa dow kaah sakowm dowi chekhai. Amatni riaret kowi kowh prenchakuüa iawng suiiai kaniaima mih thuraiuüa kowi tawi chupiia büah khai, now Jerusalem marow kowi kowh aia vüi lang krata mih kim dow amatni sürlawkta pe khai.15CHAKRAMANG Israeluüa pipu-uüa kowh Thurai dow amatni tut-e uang chin pe risiuüa hanow nataripla kownkow plan plan uang tek pe khai. Tawngplawng kowchow panow aia maru-uüa hai aia kim kowi dow CHAKRAMANG saksing reng chekhai.16Nachenganchepaw Thurai uang chinah mih satang phowng miuüa kowi amatni hawt khareah khai, aia kowh laiklow amatni nuata khai, now aia kowh risiuüa kowi dow changla rensi büah khai. Achur kowi amatni luk kowi CHAKRAMANG kowh kunmaraura uang ting khe dow amatni mih tawngpaw nowng changra uowi dowi bowt.17Naiawng rakowi amatni kowi nauang senah kownkow Babulawn pren mang kowi CHAKRAMANG uang pawla pe khai. Nami mang dow Juda pren kowi kowh klanguüa hawmh kowi krawi saiah khai; aia dow CHAKRAMANG kim lak kowi khowm padow klanguüa hawmh kowi saila khai. Aia dow sana dowi kowi malauüa klanguüa, kimrengchowuüa hai lawngtanguüa bowkbowk kowi saila khai. Amatni kowi dow nami mang rut kowi CHAKRAMANG ap-ah khai.18Babulawn pren mang dow Thurai kim kowi kowh aiukma mih hai asowmchow mih uanh, asung khakma mih uanh maten, now mang hai mang kowh maru iukuüa kowh dawngthawnguan maten Babulawn pren kowi pawla bowk khai.19Nebuknezar kowh maru-uüa dow Thurai chup kim towkta pe bowk khai, now Jerusalem marow tap krawi piakta pe bowk khai. Amatni dow nakowi kowh aiuk aiukma mih kim maten towkta pe khai, now asung khakma mih uanh maten paw piakta pe bowk khai.20Tawi kowng dowi miuüa kowi dow Babulawn pren mang mih aia pren kowi pawla khai. Now Persia pren mang awr kür dowi mowr dow naiawngün maru-uüa mih mang Nebuknezar hai aia krungchakuüa nimkrüa kowi tawi chang nar lup khai.21Nami khin khe dow Israel pren kowi kowh krawng bawn maten mih 70 ning chih dowi mowr ka tanai khai bowt. Nami dow risi Jeremia tut-e kowh CHAKRAMANG laiklow uang tachih mih chekhai.22Persia pren kowi Kuras uown chowm mang mih ning khe risi Jeremia tut-e kowh CHAKRAMANG laiklow uang tachih khai bowt. CHAKRAMANG peah saktuak rakowi Kuras dow mami laiklow ruiah hanow aia kowh pren maten kowi maiawng krawi phuang khai:23“Mami dow Persia pren mang ang Kuras kowh ana pek chekhai. Palusama luk kowi pe chowm ang mang mih dow CHAKRAMANG mukuang kowi kowh Thurai chekhai. Aia dow Juda pren kowi kowh Jerusalem marow kowi aia vüi nathawp pe kim lowk kown mih kurdik pe ang khai. Enni Thurai maru-uüa maten dow Jerusalem kowi kowkowi büa diah. CHAKRAMANG pacham tawi uowila enni reng lah,” pakhai.
The Seed Company