2 Krungchakuüa31
1Now Israeluüa maten dow Takat Pawi khowk kung kowi Judauüa kowh marow kowi kowkowi büah khai. Now nakowi kowh phuchuala mih hua ün, Asera limpu ün, arah kroma mih kowi kowh chupiiara kowi akeng thurai chup kim ün hai phuchuara ün krawi piakta bowk khai. Now Juda krungchak, Benjamin krungchak, Efraim krungchak hai Manase krungchakuüa uowi rah kowi kowh paw krawi piakta bowk büah khai. Nami kung kowi dow Israeluüa mih amatni chowlowkkow kim prakowi mang büah khai.2Hezekia dow uamowuüa hai Leviuüa kowi mih pathum pathumchow bakah hanow amatni chowlowkkow kowh lup khowm pe khai. Tawngbak mih thum kowi dow tikah mih uanap hai taking tasangra uanap lup, tawngbak mih thum kowi dow CHAKRAMANG kim kowi chupiia lup, now tawngbak mih thum kowi dow CHAKRAMANG kim kowi natek awmrawm lai kown mih hai natek rowsi meng kown mih lup aia khowm pe khai.3Now CHAKRAMANG kowh rirow iawng rau towng hai iak pra towng tikah mih uanap, Tanai Ni Pawi, Lacher Pawi hai khowm bowkta mih pawi khe phuchuala Thurai kownkow Hezekia mih aia kowh tawncher hawmh hownia pe reng chekhai.4Now uamowuüa hai Leviuüa mih atungma naia changla CHAKRAMANG lup kownkow Hezekia dow uamowuüa hai Leviuüa kowh kakbak nauang pawla pe kown mih Jerusalem marowchakuüa kowi peah ana khai.5Nami ana tata hown krowksang Israeluüa dow uih müng pau müng, grep tui, kanrawn sau, kuai tui, now üa hai laih hownia kowh rik kuaah mih luprak paw uang pawla büah khai. Amatni kowh luprak maten hownia hamüt bak kowi pabak mih ahuma uang pawla büah khai.6Now Juda marow kowi kowh Israeluüa hai Judauüa dow amatni kowh chia hawmh, ruapur hawmh hai rua hawmh hownia hamüt pum kowi papum chi uang pawla büah khai. Now CHAKRAMANG amatni kowh Thurai vüi kowi kowh lang kraah mih uanh paw hamüt bak kowi pabak uang pawla büah khai, now naiawngün dow chun iukma changah büah khai.7Naiawng hai maru kawmuüa dow sum la hownia uang tarowng pawla hanow ranit la khe churta büah khai.8Naiawngün uanh ahuma mih khita hanow Hezekia hai aia kowh maru iukuüa dow CHAKRAMANG hai Israeluüa tut-e tek awmrawm lai khai.9Now Hezekia dow uamowuüa hai Leviuüa kowi lüntaah mih, “Maiawngün uanh tawng hownia kowh ngai chow?” pakhai.10Zadawk krungchak hownia kowh uamow lang kri mih Azaria klangah mih, “CHAKRAMANG kim kowi maru kawmuüa uang pawla uanh hownia bowt now anging khawr chakkham dowi bowt chekhai, now marat paw ahuma marat khai. CHAKRAMANG dow aia kowh maru kawmuüa kowi peah prasi khai. Mow, marat mih ahuma tak chekhai,” pakhai.11Naiawng rakowi Hezekia dow CHAKRAMANG kim kowi nathawp uanh nungra kownkow Israeluüa kowi peah ana khai, now amatni dow uanh nungra kim mih thawp khai bowt.12Nami kung kowi dow maru kawmuüa mih awmrawm sung, hamüt bak kowi pabak mih uanh hai CHAKRAMANG vüi lang kraah mih uanh kaah sakowmma hown uang pawla büah khai, now naiawngün uanh mih anungra kowi uang towah büah khai. Naiawngün uanh naming nakhet kown mih kurdik dow Levi chenchap Konania luk kowi chekhai, now Konania kowi kowh khowng mih dow atainau Simei chekhai.13Amatchi dak kowi kowh uanh mingkhet mih dow Jehiel, Azazia, Nahat, Asahel, Jerimawt, Jozabad, Eliel, Ismakia, Mahat hai Benaia büah chekhai. Amatni kowi dow mang Hezekia hai Thurai chup kim kowi kowh maru iukuüa kowh lang kri mih Azaria iüah towah mih chekhai.14Thurai tut-e kowmatia sak nau hown uang chang phuchua khe kowh uanh mingkhet mih dow Thurai chup kim satlawt pra kowh tapplawt chawng mih Levi krungchak Imna chapa Karea chekhai. Now CHAKRAMANG tut-e uang pawla mih awmrawm sung hai lang chimsai mih uanh uamowuüa hai Leviuüa kowi naret pe kown mih kurdik paw aia luk kowi chekhai.15Aia kowh kaah sakowmma mih akhowng miuüa dow Eden, Miniamin, Jesua, Semaia, Amaria hai Sekania büah chekhai. Amatni dow Leviuüa uowi rah marow hai kua towng kowi aiuk asowm bowkbowk kowi naiawngün uanh krawi ret pe reng chekhai.16Amatni dow CHAKRAMANG kim kowi ni towng kowh chang lup reng mih uamowuüa kowi paw ret pe uanh reng chekhai. Naiawngün uamowuüa dow 30 ning hownia nami luk kowi kowh chowlowkkow krungchak ming tang bowih kowi ming rui uowi miuüa chekhai.17Uamowuüa kowh ming dow amatni chowlowkkow machak ming tang bowih kowi ruiah khai, now pirmi ning hownia nami luk kowi kowh Leviuüa kowh ming dow amatni kowh lup bak uowi iawng chowlowkkow thumchak ming tang bowih kowi ruiah khai.18Nami klen kowi amatni bowkbowk kowh masi hai chauüa ming paw amatni krungchakuüa ming tang bowih kowi ruiah khai. Tawngplawng kowchow panow uamowuüa hai Leviuüa dow kaah sakowmma hai Thurai vüi kowi lang takra büah khai.19Nami klen kowi mang Hezekia dow Juda pren kowi kowh marow riaret kowi uowi mih Arawn krungchak uamowuüa kowi amatni kakbak napeah kownkow tow pe maru khai. Tawkche naiawngün maru-uüa peah mih dow Arawn krungchak uamowuüa hai ming tang bowih kowi ming rui uowi mih Leviuüa kowi chowtaih.20Naiawng hai Hezekia dow Juda pren kowi kowh arah maten kowi CHAKRAMANG aia kowh Thurai mik kowi aiungma hai anowmma mih lup krawi chang khai.21Aia dow Thurai chup kim kowi kowh lup hai ari aiang nachün kown mih lawnguan kowi aia changah mih lup maten sak maiow hown changah khai. Naiawng rakowi aia kowh lup dow chawn reng chekhai.
The Seed Company