2 Krungchakuüa32
1Naiawng hai lup maten kaah sakowmma Hezekia ki changta bowk kung kowi dow Asuria pren mang Senakerib mih Judauüa kowi uang senah khai. Senakerib mih Judauüa kowh tap uowi mih marow hai kua ün uang rumta lut khai. Aia dow naiawngün kua hai marow maten aia vüi napowngta bowk kown mih ka tuak khai.2Now naiawng Senakerib nauang sen Jerusalem marow kownkow kamrüt mih dow Hezekia mih tuk khai bowt.3Naiawng rakowi Hezekia mih aia kowh siphai aluchowuüa hai tasen kiakma miuüa hown tapaw prengia hanow marow uat pra kowh tui hawrra maten napitta kown mih kamrüt khai.4Nakhowk khe maru akawmma takua talawmah hanow marow uat pra kowh hawr mih aw hai awchawng tui maten krawi pitta bowk büah khai. Amatni tek mih, “Asuria pren manguüa hai siphaiuüa uang rum a-i khe ahuma hang pacham ka tui lah,” pakhai.5Now Hezekia mih tap takhue mih rah maten krawi plan raw khai, now tap luk kowi kowh kangchawngra kimkrowng akhawtma krawi thawp khai. Nami klen kowi aia dow tap uat kowi paw krawi plan thawp pe tap lowk tak chekhai, now David marow satlawt pra kowh thiaah mih arah paw akhawtma krawi thawpah ngamlam khai. Nami klen kowi aia dow tasen müa rutchün khawkleng hai kawngma ün ahuma thawpah khai.6Aia dow maru kawmuüa luk kowi tow pe siphai aluchowuüa khai, now amatni kowi dow marow tapplawt re-e kuaah lawmah hanow tek pe sak khawt lai khai.7Aia tek pe mih, “Akhawtma hai sakkraingma uowi büa diah. Asuria pren mang hai aia kowh siphai kawm kowi khita now hangkow kram büah. Tawngplawng kowchow panow aia hown kowh uowi miuüa lak-e a-i hown kowh uowi mih lang kri lang kraing chekhai.8Aia hown kowh uowi mih dow maru kür chowtaih. Nachenganchepaw nakhowng a-i kownkow hai a-i vüi nadowk tasen kownkow a-i hown tawi uowi mih dow CHAKRAMANG a-i kowh Thurai chekhai,” pakhai. Now maru kawmuüa dow Juda pren mang Hezekia kowh laiklow tata hanow ka süngürra khai.9Now Asuria pren mang Senakerib mih aia kowh siphaiuüa maten hown Lakhis marow umta hüah reng tak khe Jerusalem marow kowi kowchin maru sangrum khai. Now Juda pren mang Hezekia hai Judauüa maten kowi nakowtek pe kown mih laiklow naiawngün maru-uüa kowi aia krawi tek pe khai.10Aia krawi tek pe mih, “Asuria pren mang Senakerib tek mih maiawng, ‘Mia luk kowi chow enni neplawng nesak kowh rumta enni hüah khowk chepaw Jerusalem kowi enni uowi rengreng tak?11Tui sakkrai hawm sakkrai hown enni nakowng kown mih Hezekia nau chekhai. Naiawng rakowi Asuria pren mang rut hownia CHAKRAMANG enni kowh Thurai nalawng enni kown taih pahai aia kuan enni mih chekhai.12Arah kroma mih kowi kowh chupiiara hai phuchuara krawi piakta mih dow Hezekia matia chowbowt nadowi bow? Jerusalem kowi kowh phuchuara lowkchow mih pur kowi taih naia chupiia kown mih hai nami luk kowi chowtaih naia chang phuchua kown pami Jerusalem marowchak hai Juda prenchakuüa kowi tek pe mih dow aia chowbowt nadowi bow?13“‘Akeng prenchakuüa maten kowi ang hai ang kowh pipu-uüa tawng chow changah mih enni tuk dowi bow? Naiawngün prenchakuüa kowh thuraiuüa ang rut hownia amatni kowh pren nowng lawng pe tak bow?14Ang pipu-uüa piakah mih prenchakuüa kowh thuraiuüa pungmadawng hownia amatni kowh maru-uüa kowi ang rut hownia nowng lawng mih mia chow uowi? Naiawng now tawng iawng chow enni kowh Thurai mih ang rut hownia nanowng lawng enni kown?15Hezekia kowi naiawng nakuan enni kown mih khin hangkow peah büah tham bowt. Aia kowi hangkow owm büah tham bowt. Tawngplawng kowchow panow tawng iawng mih chenchap hai prenchak kowh thurai paw amatni kowh maru-uüa kowi ang hai ang pipu-uüa rut hownia nowng lawngah dowi chekhai. Naiawng rakowi enni kowh thuraiuüa ngam padow ang rut hownia nowng lawng enni kown nadowi pami achima tukah mih towbowt,’ pape diah,” pakhai.16Naiawngün klen kowi paw Senakerib kowh maru-uüa dow CHAKRAMANG Thurai hai aia kowh nar Hezekia kowi khareah mih laiklow ahuma tak tekla khai.17Now CHAKRAMANG Israeluüa kowh Thurai kowi nakhareah kownkow aia kowh chasak kowi Senakerib ruila mih, “Akeng prenchakuüa kowh thuraiuüa mih amatni kowh maru-uüa kowi ang rut hownia lawngah dowi mih iawng Hezekia kowh Thurai paw ang rut hownia aia kowh maru-uüa kowi nalawngah kown nadowi,” pakhai.18Naiawngün laiklow dow Senakerib kowh maru-uüa mih Hebrai lai hown atün atünma uang krawi tekah khai. Naiawng amatni krawi tek mih dow Jerusalem marow tap luk kowi kowh maru-uüa mih ta hanow lainowmma pacham kram lah, now amatni Asuriauüa nanowng powngta kown towbowt pakowh chekhai.19Amatni dow rut hown kowh thawpah mih akeng chenchapuüa kowh thuraiuüa lawnguan iawng Jerusalem marow kowi kowh Thurai lawnguan kowi paw uang krawi tek khai.20Naiawng rakowi mang Hezekia hai Amawz kowh chapa risi Isai iüah mih kar se mukuang kowi kowh Thurai tut-e awr lü awr leng khai.21Nahanow CHAKRAMANG dow aia kowh kramamu lowk ia kowi uang iu chin pe khai. Nami kramamu mih Asuria pren mang kowh tangbung khupra kowi uowi mih siphaiuüa maten, siphai aluchowuüa maten hai akeng mih aluchowuüa maten kowi asaima uang piakta khai. Naiawng rakowi mang Senakerib dow tawmpa rukrai hown aiamat pren kowi plan mang khai. Now aia kowh thurai chup kim kowi aia kowkup khe aia kowi dow aia kowh chapauüa pre sum ia mih saita khai.22Naiawng hai CHAKRAMANG dow Asuria pren mang hai akeng mih ransu-uüa rut hownia Hezekia hai Jerusalem marowchakuüa kowi lawngah khai. Naiawng rakowi paprenma thaulangma hown uowi khai.23Nami khin hownia bowt now chenchapuüa maten mih mang Hezekia kowi lainowmma ringkawah khai. Aia kowi dow asung khakma mih uanh ün maru uang peah khai, now CHAKRAMANG vüi paw Jerusalem marow kowi maru akawmma uang pawla pe awmrawm sung khai.24Nami khin khe Hezekia dow arau uowi kowh kowng ngialia khai. Nakhowk khe Hezekia mih chup Thurai hanow aia kowi dow Thurai uang klangah khai, now aia naiung kown mih amatra tüng pe lowk khai.25Nachenganchepaw Hezekia dow uang bawri khai; aia dow aia ka prasi chepaw tek awmrawm lai dowi chekhai. Naiawng rakowi aia luk kowi hai Jerusalem marow hown Juda pren luk kowi CHAKRAMANG mih kunmarau khai.26Nakhowk khe dow Hezekia mih aia kowh bawrira tukta hanow khamsum khamdaw khai, now Jerusalem marowchakuüa paw naiawng tawi chang khai. Naiawng rakowi Hezekia chowng kowi dow CHAKRAMANG kowh kunmaraura mih amatni luk kowi uang kla dowi tak chekhai.27Hezekia kowh dow dawngthawnguan hai ringkawra ahuma chekhai. Aia dow aia kowh kuh, tai, asung khakma mih hua, nam iungma mih paingbawng, kawngma hai akeng mih asung khakma mih uanh natowla kownkow thawp dawngthawnguan towk rah kim lowk khai.28Nami klen kowi luprak, grep tui sar hai kanrawn sau towk rah kim paw thawp lowk khai, now rua, ruapur hai akeng mih tawncher towk rah kim paw thawpla lowk khai.29Naiawngün klen kowi paw aia kowi dow Thurai mih ahuma peah kurengra khai. Naiawng rakowi aia kowh chia, rua hai ruapur mih ahuma prung khai. Now aia matia vüi marow paw ahuma aia thawpla khai.30Now Gihawn tuikuam mih owngta now David kowh marow Jerusalem kowi satkup prakowi uang pawla tui mih paw Hezekia chekhai. Aia dow aia changah mih lup maten chawn reng chekhai.31Now akat khe dow aia vüi kowi kowh Thurai kowh awdara lup lawnguan kowi nauang lüntaah kownkow Babulawn pren kowi kowh aluchowuüa mih Hezekia tut-e uang chin maru khai. Nakhowk khe dow aia prakowi Hezekia tape nowm chünchü pami natukla kownkow Thurai mih Hezekia kowi chaingah khai. Naiawng rakowi aia dow Hezekia hownia powt khai.32Hezekia kowh akeng mih lup lawnguan maten hai Thurai kowi kowh aia ringkaw mih lawnguan dow Amawz kowh chapa Risi Isai Kowh Mukmang bowih kowi hai “Juda hai Israel Manguüa Lawnguan” pami bowih kowi arui uowi bowk chekhai.33Akung kowi Hezekia dow kowng hanow David krungchakuüa chengrawng aluk prakowi maru dupah khai. Aia kowng khe aia kowi dow Juda prenchak maten hai Jerusalem marowchak maten mih tüng pe ringkawra khai. Now aia takcha kowi dow achapa Manase mih ta chowm mang khai.
The Seed Company