2 Krungchakuüa30
1Israel hai Juda kowi kowh maru kawmuüa dow khowm bowkta mih pawi ni la uown khe Takat Pawi mih nowng chang büah dowi chekhai. Tawngplawng kowchow panow nachang pawi kown mih vüi tachim tasai mih uamow talawk dowi tak chekhai, now maru kawmuüa maten paw Jerusalem marow kowi uang nowng takua talawm bowk dowi tak chekhai. Naiawng rakowi mang Hezekia, aia kowh maru iukuüa hai Jerusalem marow kowi kowh maru maten mih pre la mih lacher khe Takat Pawi nachang kown mih nauta bowk khai. Now CHAKRAMANG Israeluüa kowh Thurai vüi nachang Takat Pawi kownkow Israeluüa hai Judauüa kowi mang krawi phowng pe satang khai. Nami klen kowi Efraim krungchakuüa hai Manase krungchakuüa kowi paw nami pawi nauang tawi sun kownkow mang krawi pe pe chasak khai.4Takat Pawi nachang kownkow khowm bowkta mih akhin sar dow mang hai maru kawmuüa nauta bowk chekhai.5Naiawng rakowi CHAKRAMANG Israeluüa kowh Thurai vüi Takat Pawi nauang tawi sunla kownkow Jerusalem marow kowi nauang kown mih Ber-Seba tawngphak hownia Dan marow mowr Israel pren maten kowi amatni krawi phowng satang khai. Tawngplawng kowchow panow amatni dow ari arow iawng maru kawmma hown nami pawi nowng sun dowi mih ning krama khowk chekhai.6Satang phowng miuüa dow mang hai aia kowh maru iukuüa ruiah mih chasak pawla hanow mang ana pek iawng Israel pren hai Juda pren kowi kowh arah maten kowi cham krawi kowi khai. Nami chasak kowi arui uowi mih dow, “Aw Israeluüa, CHAKRAMANG tut-e, Abraham, Isak hai Israel kowh Thurai tut-e uang plan büa diah. Nahanow Asuria pren mang rut hownia kowh enni nowng plai miuüa tut-e paw aia nauang plan kown.7Enni mih enni kowh pipu-uüa hai enni kowh tainau-uüa iawng hang tawi chang büa diah. Amatni dow CHAKRAMANG amatni pipu-uüa kowh Thurai kaah sakowm dowi mih lup chang büah khai. Naiawng rakowi CHAKRAMANG dow amatni kowi rip chamang ripah khai. Naiawng amatni kowi Thurai changah mih dow enni khi khowk.8Enni pipu-uüa iawng lai üa kürma hang uowi büah tham bowt. CHAKRAMANG tut-e phai taap büah bowt. Chowngchowng saksakma vüi ang lang krata mih chimsaima mih kim kowi uang büah bowt, now CHAKRAMANG enni kowh Thurai kowi uang chupiia büah bowt. Nahanow enni luk kowi kowh CHAKRAMANG kowh kramra uowima mih kunmaraura dow naprowng kown towbowt.9CHAKRAMANG tut-e che enni uang plan hanow enni kowh tainau-uüa hai enni kowh chauüa kowi khümla mih maru-uüa dow amatni kowi nasaksing nasanaah kown taih. Nahanow amatni dow mami pren kowi uang nowng plan bowt kown. Tawngplawng kowchow panow CHAKRAMANG enni kowh Thurai dow saksing sanara atekma chekhai. Aia tut-e enni uang plan hanow aia mih nanuata enni kown nadowi,” pakhai.10Satang phowng miuüa dow Efraim krungchakuüa hai Manase krungchakuüa kowh marow maten hai Zebulun krungchakuüa uowi rah mowr krawi kowi büah khai. Nachenganchepaw nakowi kowh maru-uüa dow satang phowng miuüa kowi hawt khareah hai changla rensi büah khai.11Nachenganchepaw Aser krungchak, Manase krungchak hai Zebulun krungchak hownia dow khamsum khamdaw hanow Jerusalem marow kowi kowkowi ne khai.12Juda maru-uüa pungmadawng kowi paw Thurai dow tawi chang lup reng chekhai. Aia dow aia kowh laiklow iawng mang hai maru iukuüa kowh ana pek naia chünla kownkow Juda prenchakuüa kowh saktuak katsang chang pe khai.13Naiawng rakowi pre la mih lacher kowi The pe tuah dowi mih kawm Pawi nauang sun kownkow Jerusalem kowi maru iun akawmma uang takua talawm khai.14Amatni dow Jerusalem marow kowi kowh akeng thuraiuüa kowi changla phuchua mih phuchuara maten hai nam iungma mih maikhük towk müa phuchuara maten mih piakta hanow Kidrawn lawngrawi kowi cham kuakta büah khai.15Amatni dow pre la kowi kowh lacher laitali ni khe Takat Pawi vüi ngen ruapur chah khai. Nakhowk khe uamowuüa hai Leviuüa dow lainowmma rukrai khai. Tawngplawng kowchow panow amatni pungmadawng kowi tachim tasai mih talawk dowi tak chekhai. Naiawng rakowi amatni mih kowmatia kowi tachim tasai büah khai. Now CHAKRAMANG kim kowi tikah mih uanap uang pawla büah khai.16Nami kung kowi dow Thurai maru Mosi rirow bowih kowi kowh arui uowi iawng Thurai chup kim kowi amatni kowh lup changra kowi kowiowng büah khai. Now changla phuchua mih tawncher vi dow uamowuüa kowi Leviuüa uang ap pe khai. Now uamowuüa dow phuchuara kowi nami vi krawi thetah khai.17Maru kawmuüa pungmadawng kowi tawngbak miuüa dow kowmatia kowi tachim tasai dowi chekhai. Naiawng rakowi amatni dow Takat Pawi kowi kowh ruapur chah mih CHAKRAMANG vüi nowng ngen dowi chekhai. Naiawngün maru-uüa vüi dow Leviuüa ngen pe khai.18Efraim krungchakuüa, Manase krungchakuüa, Isakar krungchakuüa hai Zebulun krungchakuüa hownia uang miuüa dow kowmatia kowi tachimsaila dowi mih lang kawm chekhai. Amatni dow rirow kowi uowi iawng chang dowi chepaw Takat Pawi kowi kowh ngar tawi cha büah khai. Tawngplawng kowchow panow amatni vüi Thurai tut-e Hezekia awr lü mih, “Aw CHAKRAMANG Thurai, maiawngün maru-uüa dow kowmatia kowi tachim tasai büah dowi chekhai. Nachenganchepaw CHAKRAMANG amatni pipu-uüa kowh Thurai kowi sak maiow hown amatni uang chupiia khai. Naiawng rakowi en dow aiungma chedow amatni bowkbowk kowi lawtta diah,” pakhai.20Now CHAKRAMANG dow Hezekia awr tekah mih hawt sünta pe hanow maru-uüa kowi lawtta khai.21Naiawng hai Jerusalem marow kowi kowh uang mih maru kawmuüa dow apiawma hown ranit ni mowr The pe tuah dowi mih kawm Pawi sun büah khai. Now uamowuüa hai Leviuüa dow atünma tünteu iung hown CHAKRAMANG rowsi meng ni towng tek büah khai.22Leviuüa dow CHAKRAMANG kowh lup klangiungma tuk chang khai rakowi amatni kowi Hezekia tek pe awmrawm lai khai. Maru kawmuüa dow ranit ni mowr pawi ngar cha büah khai, taking tasangra uanap chang büah khai, now CHAKRAMANG amatni pipu-uüa kowh Thurai kowi tek pe awmrawm lai büah khai.23Nami kung kowi maru kawm maten dow pawi mih naplan sun ranit ni iawk kown mih nauta bowk chekhai. Naiawng rakowi amatni dow apiawma hown pawi mih plan sun ranit ni iawk chekhai.24Nami pawi kowi kowh maru kawmuüa nachaah kown mih vüi mang Hezekia pe mih dow chiala 1,000 pum hai ruapur 7,000 pum chekhai. Now mang kowh maru iukuüa pe mih dow chiala 1,000 pum hai ruapur 10,000 pum chekhai. Nami takra kowi mih uamowuüa akawmma kowmatia kowi tachim tasai khai.25Juda pren kowi kowh maru maten, uamowuüa, Leviuüa, Israel prenchakuüa, now Israel hai Juda pren kowi kowh uowi mih prenlang maru-uüa dow piaw büah khai.26Naiawng rakowi Jerusalem marow kowi dow lainowmma piawpara uowi chekhai. Tawngplawng kowchow panow David chapa Sawlawmawn chowm mang kung kowi dow Jerusalem kowi naiawng khowt mih pawi kri katpaw phaw dowi tak chekhai.27Akung kowi uamowuüa hai Leviuüa dow iowng se maru kawmuüa kowi peah prasi khai. Amatni awr lüah mih dow mukuang kowi kowh aia uowi rah chimsaima mih hownia Thurai iu sünta pe khai.
The Seed Company