2 Krungchakuüa22
1Jerusalem marow kowi kowh maru-uüa dow Jehoram takcha kowi achapa sawi mih Ahazia kowi pe chowmah mang khai. Tawngplawng kowchow panow Arab prenchakuüa hown kowh uang taiua thowk damra miuüa dow Jehoram kowh chapa ta maten kowi saila bowk khai. Naiawng rakowi Juda pren mang Jehoram chapa Ahazia dow ta chowm mang khai.2Aia chowm mang mih dow 22 ning khe chekhai, now aia dow paning mowr Jerusalem marow kowi chowmla mang khai. A-u dow Israel mang Awmri kowh chu Athalia chekhai.3Aia dow Ahab krungchakuüa chang iawng tawi chang angak khai. Tawngplawng kowchow panow aia kowi dow a-u mih nachang lup ngak kown mih prengia peah reng chekhai.4Aia dow Ahab krungchakuüa iawng CHAKRAMANG mik kowi angakma mih lup tawi chang khai. A-pa kowng kung kowi aia kowi peah prengia mih dow naiawngün krungchakuüa chowtaih. Naiawng rakowi aia dow hing piak khai.5Aia kowh prengia pek miuüa kowh laiklow hown mang Ahazia dow Israel mang Joram hown tawi tabawng hanow Siria pren mang Hazael kowi tawi senah khai. Now amatni dow Gilead süng kowi kowh Ramawt marow kowi tasen büah khai. Nakhowk khe mang Joram dow Siria siphaiuüa hownia ka arau khai.6Now aia kowh arau naiungla kownkow aia dow Jezrel marow kowi kowplan khai. Nakhowk khe aia hown nauang takrum kownkow mang Ahazia paw Jezrel marow kowi uang khai.7Thurai rik khowm bowkta khowk rakowi Joram tut-e uang hanow Ahazia mih piak khai. Jezrel marow kowi aia kowting mih khin khe Joram hown Nimsi chapa Jeho kowi kowsenah khai. Jeho kowi CHAKRAMANG nümnapah mih auan dow Ahab krungchakuüa kowi napiakah kownkow chekhai.8Now Ahab krungchakuüa kowi Jehu ripah mih khin khe aia dow Ahazia kowi tawi khowngah mih Judauüa kowh aluchowuüa hai Ahazia kowh tainau-uüa kowi khita kowh saita bowk khai.9Nami kung kowi amatni dow Ahazia kowi nasaiah kownkow krawi chamah khai, now aia kowi dow aia tapetra Samari marow kowi krawi ka khümta büah khai. Now aia kowi dow Jehu tut-e uang pawla hanow saita büah khai. Now aia kowh uak dow klangiungma dupah büah khai; tawngplawng kowchow panow amatni tek mih, “Ahazia dow Jehosafat kowh chu chekhai, now Jehosafat dow saktuak maten hown CHAKRAMANG nau iawng chang reng mih maru chekhai,” pakhai. Ahazia kowh krungchak hownia dow nachowm mang kown mih maru uowi dowi bowt chekhai.10Juda pren mang Ahazia kowh u Athalia dow achapa kowng mih satang tawi ta khai bowt. Naiawng rakowi aia dow Juda krungchak kowi kowh mang kimchakuüa maten kowi krawi saita bowk khai.11Nachenganchepaw mang chapauüa kowi krawi saita bowk dowi rawn mang Jehoram kowh chama (uamow Jehoiada kowh masi) Jehoseba dow arak sin Ahazia kowh chapa Joas ngiachow kowi kowku pawta khai. Now aia dow Athalia rut hownia atulung Joas naia plaila kownkow athum miia hailawm CHAKRAMANG kim kowi kowh mawk rah towklak lowk mih kowi petah khai. Naiawng rakowi Athalia mih Joas kowi ka saiah dowi chekhai.12Naiawng hai uamow Jehoiada masi Athalia chowm mang mih taruk ning mowr dow Joas kowi mih Thurai chup kim lak kowi Jehoseba petah khai.
The Seed Company