2 Krungchakuüa21
1Akung kowi Jehosafat dow kowng hanow aia pipu-uüa tut-e tawi uowi khai bowt, now aia kowi dow apipu-uüa kowh tadupra David marow kowi dupah khai. Aia takcha kowi dow achapa Jehoram mih ta chowm mang khai.2Jehoram kowh tainau-uüa dow Azaria, Jehiel, Zekaria, Azariahu, Mikael hai Sefatia büah chekhai. Amatni bowkbowk dow Israel mang Jehosafat chapauüa chekhai.3Amatni kowi dow a-pa mih kuh, tai, asung khak khakma mih uanh, Juda pren kowi kowh tap tapat lut mih marow peah khai. Tawkche Jehoram kowi tarapdow chapa ta chekhai rakowi mang rah peah khai.4Jehoram dow a-pa pren kowi kowh aia kowh mang rah mih akhawtma changah khai. Nami kung kowi aia dow aia kowh tainau-uüa maten kowi hai Israel kowi kowh aluchowuüa kowi saita ne khai.5Jehoram chowm mang mih dow 32 ning khe chekhai, now aia dow raiat ning mowr Jerusalem marow kowi chowmla mang khai.6Aia kowh masi dow mang Ahab kowh chama chekhai. Naiawng rakowi aia dow mang Ahab kimchakuüa iawng hai Israeluüa kowh akeng mih manguüa iawng tawi chang angak khai. Aia dow CHAKRAMANG mik kowi angakma mih lup chang reng chekhai.7Nachenganchepaw CHAKRAMANG dow David kowh krungchak kowi napiakta kown mih nau dowi chekhai. Tawngplawng kowchow panow David kowh krungchakuüa atungma nachowm mang reng kown mih David kowi CHAKRAMANG khamta khai bowt.8Juda pren mang Jehoram chowm mang mih khin khe Edawm prenchakuüa dow Judauüa kowi kingküaah khai, now amatni matia vüi lang tow mang büah lowk ia khai.9Naiawng rakowi Jehoram dow aia kowh siphai aluchowuüa hai kawrnga kari maten pawla now Edawm pren kowi kowkowi khai. Nakhowk khe Edawmuüa dow Jehoram hai aia kowh siphai aluchowuüa kowi uang rumah khai. Tawkche Jehoram hai aia kowh siphai aluchowuüa dow uar-e khe Edawmuüa rumah mih kowi nowng thüa büah khai.10Edawmuüa dow kawmat mowr pat paw Judauüa kowi kingküaah reng tak chekhai. Libna marowchakuüa paw Jehoram kowi tawi kingküaah khai. Naiawng phaw mih maten dow CHAKRAMANG aia pipu-uüa kowh Thurai kowi Jehoram nuata rakowi chekhai.11Aia dow Juda pren kowi arah kroma mih kowi kowh chupiiara krawi thawp khai, now nakowi dow Jerusalem marowchakuüa kowi aia pe chupiiaah arup aren khai. Naiawng hai Juda maru-uüa kowi dow aia pe changah angak khai.12Nakhowk khe mang Jehoram dow risi Elija hownia ka chasak lowk chekhai. Nami chasak kowi arui uowi mih, “CHAKRAMANG en pipu David kowh Thurai tek mih maiawng, ‘En pa Jehosafat kowh tiama kowi hai Juda pren mang Asa kowh tiama kowi en mang dowi chekhai. Tawkche Israel manguüa kowh tiama kowi dow en mang khai. En rakowi Juda hai Jerusalem marowchakuüa mih Ahab kowh krungchak maru-uüa iawng cham tawi chupiia arup aren khai. En tainau-uüa kowi dow en saita khai. Amatni dow en hown kowh pabuk panga sang mih maru chowdiah, now iung paw en lak-e lang iung chowdiah.14Naiawng rakowi kawmat mih en kowh maru-uüa, en kowh chapauüa hai en kowh masi hawmuüa kowi akraingma ang naripah kown, now en kowh dawngthawnguan maten ang napiakta en kown.15En matia kowh mu paw nahing rauta hüah kown, nami arua dow pani kowh pani nanga ngamlam kown, now achur khe dow en kowh ria nauang tauai plawt kown,’ pape khai,” pakhai.16Nami kung kowi CHAKRAMANG dow mang Jehoram kowi nakingküaah kownkow Filistinuüa kowi hai Ethiawpiauüa tut-e kowh tawi uowi mih Arabuüa kowi towkah kunmarau khai.17Now amatni dow Juda pren kowi uang senah hanow siphaiuüa kowi krawi nowngta khai. Now mang kim kowi kowh dawngthawnguan maten, Jehoram kowh chapauüa hai aia kowh masi hawmuüa kowi pawla pe büah khai. Mang Jehoram tut-e ta uowi mih dow achapa sawi Ahazia lowk iachow towbowt. (Ahazia kowh ming uowi lowk tak mih dow Jehoahaz chekhai).18Naiawng bowkbowk ki phaw kung kowi CHAKRAMANG dow ia iungah dowi mih mu rau Jehoram kowi uang peah khai.19Now aia chowm mang mih pre ning chur prakowi dow nami mu rau hown aia kowh ria mih uang tauai plawt khai. Aia dow kowng pat lainowmma khamla arau khai. Aia kowh maru-uüa mih natüngla ringkawra kownkow aia pipu-uüa kowi towk pe maih iawng aia kowi dow towk pe dowi chekhai.20Jehoram chowm mang mih dow 32 ning khe chekhai. Now aia dow raiat ning mowr Jerusalem marow kowi chowmla mang khai. Aia kowng mih khin khe amiapaw aia vüi uowi pe uiting uangtak dowi chekhai. Aia kowi dow David marow kowi dupah khai. Tawkchedow manguüa tadupra kowi aia kowi dupah dowi chekhai.
The Seed Company