2 Krungchakuüa20
1Akung kowi dow Moabuüa, Amawnuüa hai Meuniuüa mih Jehosafat kowi kowsenah khai.2Nakhowk khe maru pre sum ia uangah now Jehosafat kowi uang tek pe mih, “Nauang sen en kownkow Sata Kowng paipra pown hownia Siria pren siphai hawmh akawmma uang tarü pathum. Now kawmat amatni dow Hazazun-Tamar (En-Gedi) pami arah kowi uang ting khowk,” pakhai.3Nami satang tata hanow Jehosafat dow kram kowh CHAKRAMANG kruitownra nakala kownkow aia tut-e awr lü awr leng khai. Nami kung kowi aia dow Juda pren paprenma kowi nakhang hawm kownkow krawi phuang khai.4Nahanow Juda pren kowi kowh marow maten hownia maru kawmuüa mih CHAKRAMANG tut-e nalü khowng kownkow Jerusalem marow kowi uang takua talawm khai.5Nakhowk khe Jehosafat mih CHAKRAMANG chup kim kowi kowh viadawng sar kowi Juda prenchak hai Jerusalem marowchakuüa pur kowi iowng khai.6Now aia tek mih, “Aw CHAKRAMANG anging pipu-uüa kowh Thurai, en dow mukuang kowi kowh Thurai chekhai. En dow chenchap maten kowh pren kruitown mih chekhai. Nowng changra hai kür dow en rut kowi chowtaih, now en kowi dow miapaw nowng hang en dowi chekhai.7Aw anging kowh Thurai, en kowh maru Israeluüa pur hownia mami prenchakuüa kowi en prütah hanow mami pren mih en kowh auiua Abraham kowh krungchakuüa kowi chowngchowng saksakma vüi en peah khai.8Now amatni dow mami pren kowi uowi khai, now en vüi chimsaima mih kim thawp en büah lowk khai.9Now tek büah mih, ‘Anging luk kowi che — tasenra lah, ripra lah, makowng hawi lah, khown lah — lowra mih phih uang kla khai hanow nami khin khe mami kim pur kowi anging naiowng kown. Tawngplawng kowchow panow mami kim kowi dow maru-uüa chupiiala en reng chekhai. Akrat pusa hown anging uowi khe en tut-e anging nakar kown, now anging kowh laiklow en ta hanow en nalawng anging kown,’ pabüah khai.10“Now kawmat mih nauang sen anging kownkow Amawnuüa, Moabuüa hai Seir hungh kowi kowh maru-uüa dow makowi uang thüm khowk. Amatni kowi dow Aigupta pren hownia Israeluüa uang lawt khe en pe senah dowi chekhai. Naiawng rakowi amatni kowi dow Israeluüa piakla dowi kowi powtta khai.11Nachenganchepaw kawmat dow tawng iawng chow amatni chang anging mih sam mü madiah! Nachangla dawngthawnguan kownkow en pe anging mih pren hownia naprütta anging kownkow amatni dow uang tarü khai.12Aw anging kowh Thurai, amatni kowi en chet pe tara dowi tham bow? Pai iawng khowt siphai kawm nauang sen anging kownkow uang tarü miuüa kowi nahawt sen kown mih anging kowh kür uowi dowi chekhai. Tawng chow achang takla mih anging tuk dowi. Nachenganchepaw naka khowng kownkow en prakowi anging tang mü reng,” pakhai.13Nami khin khe Juda pren kowi kowh kachakuüa maten dow amatni kowh masiuüa hai chauüa hailawm nami re-e CHAKRAMANG pur kowi iowngla rim khai.14Nakhowk khe amatni pungmadawng kowi Levi krungchak kowi kowh Asap machak maru lowk ia luk kowi CHAKRAMANG kowh lümla uang ting khai. Nami maru ming dow Jahaziel, now a-pa ming dow Zekaria chekhai. Zekaria kowh pa dow Benaia, Benaia kowh pa dow Jeiel, now Jeiel kowh pa dow Matania chekhai.15Jahaziel tek mih, “Aw mangkri Jehosafat hai Juda pren hown Jerusalem marow kowi kowh uowi miuüa, enni bowkbowk sünta büa diah. Enni vüi CHAKRAMANG tek mih, ‘Paimi siphai kawm kowi khita hanow hangkow kram büah, now sak paw hangkow nen büa diah. Mami tasen dow CHAKRAMANG kowh chowtaih; enni kowh nadowi.16Tharau khe amatni kowi kowsen kownkow enni nakowtarü kown. Amatni dow Ziz pami hungh kowi kowh tiama iawng nauang tarü kown, now Jeruel pami süngrüp süngkangma re-e kowh lawngrawi chur kowi amatni kowi dow enni nakrum kown.17Tawngpaw enni asen kla dowi. Aw Juda pren hai Jerusalem maru-uüa, atanma iowng büah rimrim now na taih, now tawng iawng chow CHAKRAMANG lawng enni mih phai mü büah phülü. Tawngpaw hangkow kram büah, now sak paw hangkow nen büa. Ang tek iawng phai chang büah now na taih. Tharau khe tarü büa, now CHAKRAMANG mih enni hown natawi uowi kown taih,’ pakhai,” pape khai.18Nakhowk khe Jehosafat mih krawng kowi tabawk krawm khai, now Juda prenchak hai Jerusalem marowchakuüa maten paw CHAKRAMANG kowi tüng pe ringkawra kownkow krawng kowi tabawk krawm hanow CHAKRAMANG kowi chupah khai.19Nami kung kowi dow Levi chenchap kowi kowh Kohat krungchak hai Kora krungchakuüa mih akawmma awr iowngah hanow CHAKRAMANG Israeluüa kowh Thurai kowi atün atünma rowsiah khai.20Now auai rau dow murpa amatni mih Tekoa süngrüp süngkangma prakowi tarü khai. Amatni tarü dowi rawn khe Jehosafat awr rüah now tek pe mih, “Aw Juda prenchak hai Jerusalem marowchakuüa, ang laiklow sünta büa diah. CHAKRAMANG enni kowh Thurai luk kowi neplawng nesak büa diah, nahanow anikma enni naia uowi kown taih. Aia kowh risiuüa kowi owm büa diah, nahanow enni kowh lup nachawn kown taih,” pakhai.21Now maru kawmuüa tut-e krawi paw prengia hanow Jehosafat mih rui maru sangrum khai. Naiawngün maru-uüa dow chimsaima mih tawnguat khupma CHAKRAMANG kiow müa meng natek kown mih chekhai. Amatni dow siphaiuüa pur kowi rik mang hanow,“CHAKRAMANG kowi tek pe awmrawm lai diah,aia kowh achur uowi dowi mih sakraura dow chowngchowng saksakma anikma chekhai,” pahai tek meng khai.22Now naiawngün maru-uüa tek meng hai rowsi CHAKRAMANG mih khin khe CHAKRAMANG dow nauang dowk tasen kownkow uang mih Amawnuüa, Moabuüa hai Seir hungh hownia kowh maru-uüa kowi amatni lala natasen kown mih iu chang pe khai. Naiawng rakowi Amawnuüa hai Moabuüa dow Seir hungh hownia kowh maru-uüa kowi senah hanow asaima kowngta khai. Nami kung kowi dow Amawnuüa hai Moabuüa mih amatni lala tadowk tasen khai.24Nakhowk khe Juda prenchakuüa dow süngrüp süngkangma kowi kowh kimkrowng kowi uangah hanow naiawngün siphai kawm prakowi haimü khai, now krawng kowi uak takuakla pan mih khi büah khai. Now amatni dow amatni kowh ransu-uüa lowk ia paw plai dowi mih tuk büah khai.25Nakhowk khe Jehosafat hai aia kowh maru-uüa dow asung uowima mih uanh nakrawi paw kownkow uak dawng kowi kowkrawi kowi khai. Nakhowk khe amatni dow tawncher hawmh, dawnguan hai akeng mih uanh ün asung khakma mih ahuma ka büah khai. Naiawngün uanh dow hu lai kowh sum ni mowr krawi paw büah khai. Nachenganchepaw uanh hu lai rakowi amatni dow nowng pawla bowk dowi chekhai.26Now tali ni mih ni khe dow Beraka lawngrawi kowi takua talawm büah hanow CHAKRAMANG kowi rowsi kiowri büah khai. Naiawng rakowi nami arah ming dow kawmat paw Beraka pahai uowi reng chekhai. (Beraka pami auan dow “Prasi” pami chekhai).27Nami kung kowi dow Juda prenchak hai Jerusalem marowchak maten piawla se Jehosafat kung kowi mang iualua se Jerusalem marow kowi kowplan khai. Tawngplawng kowchow panow CHAKRAMANG mih amatni kowh ransu-uüa kowi pe sumah khai.28Amatni dow tepla taraw, tingteng hai tumla baw se Jerusalem marow kowi uang plan hanow CHAKRAMANG chup kim kowi kowkowi khai.29Now Israeluüa kowh ransu-uüa kowi tawng iawng chow CHAKRAMANG senah mih lawnguan dow akeng pren kowi kowh maru maten tawi ta khai bowt. Nami tata hanow akeng prenchak maten dow CHAKRAMANG kowi kram khai bowt.30Nahanow Jehosafat kowh pren dow thaulangma uowi khai bowt. Tawngplawng kowchow panow aia kowi dow aia kowh ransu-uüa maten hownia Thurai mih peah thaulangra khai.31Jehosafat dow 35 ning khe uown chowm mang khai, now 25 ning mowr Jerusalem marow kowi chowmla mang khai. Aia kowh u ming dow Azuba chekhai, now Azuba kowh u ming dow Silhi chekhai.32Jehosafat dow lowra tia kowi a-pa Asa iawng chekhai. Aia dow katpaw a-pa changah mih sia nuata dowi chekhai. Aia dow CHAKRAMANG mik kowi aiungma mih lup chang reng chekhai.33Nachenganchepaw pren kowi kowh arah kroma mih kowi kowh chupiiara dow aia piakta dowi chekhai. Tawngplawng kowchow panow nakhowk khe paw amatni pipu-uüa kowh Thurai prakowi maru-uüa kowh sak nik dowi tak chekhai.34Jehosafat kowh akeng mih lup lawnguan maten dow auown hownia achur pat Hanani kowh chapa Jehu mih ruiah khai. Nami dow “Israel Manguüa Lawnguan” pami bowih kowi arui uowi bowk chekhai.35Akung kowi dow Juda pren mang Jehosafat mih Israel pren mang Ahazia hown tawi tabawng khai. Ahazia dow chang lup ngak reng chekhai.36Jehosafat dow Tarsis marow kowi kowkowila kownkow aiuk aiukma mih chawnlawng Ahazia hown taiua thawp kown mih nauta khai. Now naiawngün chawnlawng dow Eziawn-Geber kowi thawp iüah khai.37Nachenganchepaw nakhowk khe Maresa marowchak Dodavahu kowh chapa Eliezer mih Jehosafat kowi kingküala mih laiklow uang tek pe khai. Eliezer tek pe mih, “Ahazia hown en tawi tabawng khai rakowi en thawpah mih maten CHAKRAMANG napiakta en kown,” pakhai. Nami kung kowi naiawngün chawnlawng dow tapiak bowk khai, now Tarsis marow kowi kownowng kowi dowi bowt chekhai.
The Seed Company