2 Krungchakuüa2
1Mang Sawlawmawn dow CHAKRAMANG kowi nachupiiala kownkow nathawp pe CHAKRAMANG chup kim lowk kown mih hai aia vüi nathawp pe mang kim lowk kownkow lawt ana khai.2Aia dow nachang kurdik lup kown mih maru iun 70,000 ia, hungh kowi nabawp hua kown mih 80,000 ia, now naiawngün lup chang miuüa kowi kowh mingkhet kown mih 3,600 ia kowi towah khai.3Sur pren mang Hiram kowi Sawlawmawn krawi tek pe mih, “Apa David chang kim khe en uang krawi sa pe sidar singh iawng dow ang vüi paw uang krawi sa ang dit.4CHAKRAMANG ang kowh Thurai kowi nachupiiala kownkow ang tarowng thawp pe kim thüm khowk. Nahanow maru kawmuüa dow aia pur kowi anam iungma mih maikhük naia towk bowt kown, now nakowi dow chimsaima mih kawm atungma nauowi kown towbowt. Nami klen kowi rau towng hai iak pra towng, Tanai Ni khe, Lacher Pawi khe hai CHAKRAMANG khowm bowkta mih pawi khe tikah mih phuchua naia chang kown towbowt. Naiawngün dow chowngchowng saksakma Israeluüa vüi nachünah kown mih rirow chekhai.5“Ang nathawpah kown mih Thurai chup kim dow kri kraingma naown kown. Tawngplawng kowchow panow anging kowh Thurai dow thuraiuüa maten lak-e kri kraing chekhai.6CHAKRAMANG chup kim nowng thawp mih mia chow uowi? Tawngplawng kowchow panow mukuang kowi khowm aia uowi rah takowi dowi chekhai. Aia pur kowi kowh phuchuaah mih uanap tik rah chowtaih ang nowng thawp. Tawkche aia uowi rah kim dow tawng iawng chow ang nowng thawpah kown?7“Naiawng rakowi kuh, tai, kri hai lawngha hown lowra lup tuk chang mih kowi uang chin ang lowk ia diah. Aia dow aringma mih, aingma mih hai aruama mih la hown lowra lup paw pacham tuk chang lah. Nami maru dow apa David klola mih Juda hai Jerusalem kowi kowh uowi mih lup chang miuüa hown natawi chang lup kown.8En kowh maru-uüa dow singh tuk akiakma mih ang tuk. Naiawng rakowi Lebanawn hungh kowi kowh sidar singh, karpowng singh hai algum singh uang krawi sa ang diah. Ang kowh maru-uüa paw en kowh maru-uüa kowi natawi khowngah kown taih. Nahanow amatni dow ang nauah mowr naka ang singh kown. Tawngplawng kowchow panow CHAKRAMANG chup kim mih aiukma panow klangiungma ang nathawpah kown.10Tu ang singh mih en kowh maru-uüa kowi dow püm 120,000 mawn ngia, iakmow 120,000 mawn ngia, grep tui 12,000 mawn ngia hai kanrawn sau 12,000 mawn ngia ang napeah kown taih,” pakhai.11Nami laiklow ta hanow mang Hiram dow chasak hown mang Sawlawmawn kowi krawi klangah khai. Mang Hiram tek pe mih, “CHAKRAMANG dow aia maru-uüa kowi sakrau rakowi aia maru-uüa luk kowi aia pe chowm en mang khai.12Mukuang hai lusa thawp miia CHAKRAMANG Israeluüa kowh Thurai dow akiow pauowi lah. Aia dow mang David kowi chanlaira hai tukra uowima mih chapa peah lowk ia khai. Nami David chapa dow CHAKRAMANG chup kim lowk, now aiamat vüi kim lowk nathawp kown.13“Akiakma panow lowra sia tuk chang mih Huram pami kowi ang uang chin en lowk ia khowk.14Aia kowh u dow Dan krungchak, now aia kowh pa dow Sur marowchak chekhai. Huram dow kuh, tai, kri, lawngha, singh hai hua hown kowh lowra lup tuk chang mih chekhai. Now aia dow aring, aing hai aringma mih la hown paw lowra lup tuk chang chekhai. Nami klen kowi lowra chap luk kowi naher kown mih lup paw akiakma, now akuh rowprowp lowra sia nathawp kown mih paw atukma chekhai. Aia dow en kowh lup chang miuüa hai ang kowh chakramang en pa David kowh lup chang miuüa hown natawi chang lup kown.15“Naiawng rakowi en tekta iawng püm, iakmow, kanrawn sau hai grep tui mih uang krawi sa anging diah.16Singh dow en nau mowr anging krawi tu hanow Lebanawn hungh hownia Jopa aw mowr naiu kla en sow. Nami hownia naiawngün singh mih Jerusalem marow kowi pawla büah towbowt,” pakhai.17Sawlawmawn dow a-pa David iawng Israel pren kowi kowh prenlang maru-uüa kowi rüaah khai. Now naiawngün maru iun dow 153,600 ia chekhai.18Naiawngünuüa pungmadawng hownia aia dow nachang kurdik lup kown mih maru iun 70,000 ia, hungh kowi nabawp hua kown mih 80,000 ia, now naiawngün lup chang miuüa kowi kowh mingkhet kown mih 3,600 ia kowi towah khai.
The Seed Company