2 Krungchakuüa1
1David kowh chapa Sawlawmawn dow aia kowh mangra mih akhawtma changah khai. Tawngplawng kowchow panow CHAKRAMANG aia kowh Thurai dow aia tut-e tawi uowi reng chekhai, now aia kowi kri kraingma changah khai.2Akat khe Sawlawmawn dow Israeluüa maten, 1,000 ia siphai luk kowi kowh aluchowuüa, 100 ia siphai luk kowi kowh aluchowuüa, tara chet miuüa hai Israel chenchap kowi kowh chowlowkkow krungchak aluchowuüa kowi arasang nauang takua talawm kownkow lawt ana khai.3Nami kung kowi amatni dow Gibeawn kowi kowh alowngma mih arah kowi kowh CHAKRAMANG kim kowi kowkowi khai. Tawngplawng kowchow panow süngrüp süngkangma kowi uowi khe kowh CHAKRAMANG kowh nar Mosi thawpah mih CHAKRAMANG kim dow nakowi chekhai.4Tawkche nami CHAKRAMANG kim kowi dow Thurai kowh sangbowk laitawm tawkpla uowi dowi chekhai. Nami sangbowk laitawm tawkpla dow Kiriat-Jearim marow hownia Jerusalem marow kowi kowh thawpah mih tangbung lak kowi David uang pawla khai bowt.5Nachenganchepaw Uri chapa Bezalel thawpah mih kri hown kowh phuchuara dow Gibeawn marow kowi kowh CHAKRAMANG kim pur kowi chekhai. (Uri kowh pa dow Hur chekhai). Naiawng rakowi Sawlawmawn hai maru maten dow Gibeawn marow kowi kowh CHAKRAMANG kim kowi kowkowi khai.6Nakhowk khe Sawlawmawn dow nami phuchuara re-e kowkowiah hanow CHAKRAMANG pur kowi tawncher 1,000 pum hown tikah mih uanap chang khai.7Nami iak khe mang lak kowi Sawlawmawn tut-e Thurai uangah hanow tek pe mih, “Lowra sia ang tut-e en awr lü mih ang nape en kown,” pakhai.8Nakhowk khe Sawlawmawn klangah mih, “Apa David kowi en kowh achur uowi dowi mih sakraura en tüng pe khai, now aia kowh mang chowm rah kowi en pe chowm ang mang khai.9Aw CHAKRAMANG Thurai, apa tut-e kowh en takhamah mih kawmat pe tachiah diah. Tawngplawng kowchow panow en pe chowm ang mang mih dow chenchap aiukma mih luk kowi chekhai; amatni dow maru iun kawm krang lusa kowi kowh sema nowng rüaah dowi mih iawng chekhai.10Naiawngün maru-uüa kowi aiungma nakruitownla kownkow chanlaira hai tukra pe ang diah. Tawngplawng kowchow panow maiawng khowt kawm mih en kowh maru-uüa kowi nowng kruitown mih dow miapaw uowi dowi chekhai,” pape khai.11Nakhowk khe CHAKRAMANG tek pe Sawlawmawn mih, “Chowngdawng sakklangra ün, kowmatia vüi dawngthawnguan ün hai kowmatia ransu-uüa piakra en lü dowi kowi ang maru-uüa kowi nakruitownla kown mih vüi chanlaira hai tukra chowtaih en lü khai.12Naiawng rakowi chanlaira hai tukra ang peta en khowk. Dawngthawnguan hai ringkawra paw ang pela en khowk. En hown tale mih dow en dowi rawn kowh manguüa paw uowi dowi, now en kung kowi paw nauowi kown nadowi bowt,” pakhai.13Nami kung kowi Sawlawmawn dow Gibeawn kowi kowh CHAKRAMANG kim hownia Jerusalem marow kowi uang mang khai bowt, now Israeluüa luk kowi chowm mang khai bowt.14Sawlawmawn dow kawrnga kari hai kawrnga mih ahuma kramta khai. Aia kowh kawrnga kari kawm dow 1,400 klüng, now kawrnga kawm dow 12,000 pum chekhai. Naiawngün dow kawrnga kari towk rah marow kowi ne, now Jerusalem marow kowi ne aia towah khai.15Mang Sawlawmawn chowm mang mih khin khe Jerusalem marow kowi kowh kuh hai tai hu krang dow hua iawng towbowt, now sidar sing hu krang paw awkaw kowi kowh uidut singh iawng towbowt.16Mang Sawlawmawn kowh kawrnga dow Aigupta pren hai Kilikia marow hownia kowh uang pawla mih chekhai. Mang kowh kun chang miuüa naiawngün dow Kilikia hownia kowh uang ranla mih chekhai.17Aigupta pren hownia kowh uang ranla mih kawrnga hai kawrnga kari sung dow lowk kowi tai 7 set hown 800 gram chi chekhai. Naiawngün kawrnga hai kawrnga kari dow kun chang miuüa mih Hituüa hai Siriauüa kowh manguüa tut-e cham sumah reng chekhai.
The Seed Company