1 Samuel9
1Benjamin krungchak kowi kurengma panow ringkawra uowima mih maru uowi lowk ia. Nami maru ming dow Kis chekhai. Kis dow Abiel kowh chapa, Abiel dow Zerawr kowh chapa, Zerawr dow Bekawrat kowh chapa, now Bekawrat dow Aphiah kowh chapa chekhai.2Kis kowh dow Sawl pami chapa uowi lowk ia. Sawl dow klanguüa klangiungma chekhai. Israeluüa pungmadawng kowi dow aia iawng klangiung mih miapaw uowi dowi chekhai, now aia dow maru maten lak-e paw lang kro chekhai.3Akat khe Sawl pa Kis kowh mih kawrngaramchükma cham tama khai ne. Naiawng rakowi achapa Sawl kowi Kis tek pe mih, “Hawla nar lowk ia now a-i kowh kawrngaramchükma tama ne mih kowkrawi cham a-i dit snow,” pakhai.4Now Sawl dow hawla nar lowk ia hanow krawi cham kawrngaramchükma kownkow cham tarü khai bowt. Amatchi dow Efraimuüa kowh hungma mawngma süng hai Salisa süng iawng kowkowi iüah khai. Nachenganchepaw amatchi dow kawrngaramchükma hawmh kowi kowkrawi krum iüah dowi chekhai. Nami kung kowi amatchi dow Salim pami süng kowi kowkowi iüah khai. Nachenganchepaw nakowi paw kawrngaramchükma hawmh kowi kowkrawi krum iüah dowi chekhai. Nami kung kowi dow Benjamin krungchakuüa kowh süng kowi kowkowi iüah khai, now nakowi paw kowkrawi krum iüah dowi chekhai.5Now achur prakowi dow Zuf pami süng kowi kowkowi iüah khai. Nakhowk khe aia hawla mih nar kowi Sawl tek pe mih, “Chu, achi plan lah. Nadowi now kawrngaramchükma hawmh rakowi tuak krat mih lak-e achi rakowi apa nalang tuak krat kown chekhai,” pakhai.6Nachenganchepaw aia kowh nar tek pe mih, “Sünta, mami marow kowi Thurai maru uowi lowk ia. Aia kowi dow maru maten ringkawah reng chekhai, now aia tek iawng phaw paw phaw reng chekhai. Chu, aia tut-e achi kowsam kowi madiah sik. Tawng prakowi chow achi kowkowi e nakrum kown mih aia nowng tek achi tarawng,” pape khai.7Nakhowk khe aia kowh nar kowi Sawl tek pe mih, “Nakowi che achi kowkowi now tawng chow achi nakowpawla pe kown? Achi pawla mih chakkham paw achi khowkta bowk khowk. Thurai maru kowi achi napeah kown mih tawngpaw uowi dowi kowbow. Achi kowh tawng chow uowi tak?” pakhai.8Now aia kowh nar klangah mih, “Mow, ang tut-e tai uowi paiun chaw. Thurai maru kowi mami tai achi peah towbowt, now tawng pra chow kowi e achi nakrum kown mih aia natek achi kown taih,” pape khai.9Nakhowk khe Sawl klangah mih, “Lainowmma iung; chu, achi kowkowi bowt lah,” pakhai. Nami tekta hanow amatchi dow Thurai maru uowi rah marow kowi kowkowi khai. (Achük alai khe dow lowra sia Thurai maru tut-e kowlünta kown now Israeluüa tatek mih, “Chu, khi mukmang mih tut-e a-i kowkowi lah,” pakhai. Kawmat kowh chowng kowi tek pe risi miuüa kowi alai kowh chowng khe dow, “Khi mukmang mih,” pahai tek pe büah khai).11Now marow pra kowh tiama pangchowng kowi awr klown iüah khe masiuüa pre sum ia hown takrum iüah khai. Naiawngün masiuüa hawmh dow cham towng tui kownkow marow hownia uang lawt mih chekhai. Naiawngün masiuüa hawmh kowi lüntaah iüah mih, “Khi mukmang mih maru mami marow kowi uowi bow?” pakhai.12Nakhowk khe nami masiuüa hawmh klangah mih, “Ow, uowi manow; Han lenchow haimang iüah bowt. Ani mih paimi hungh kowi kowh Thurai chupra kowi marowchakuüa tawncher hown nachang phuchua kown. Naiawng rakowi ani tak anging kowh marow kowi aia uang.13Marow kowi enchi kowkup now aia kowi dow enchi nakhi kown towbowt. Aia dow nakowcha pawi kownkow hungh luk kowi nakowpün kown. Aia kowpün dowi mowr dow maru-uüa mih tawngpaw nacha nakham kown nadowi tak. Tawngplawng kowchow panow changla phuchua mih uanh kowi aia nape prasi kown takla chekhai. Aia ki peta prasi khü che pinsüauüa nacha nakham iang. Kawmat awr mang iüah bowt, nahanow aia kowi kawmat enchi kowkrum kown towbowt,” pakhai.14Nami laiklow tata now amatchi dow marow prakowi awr pün iüah khai bowt. Marow kowi kowting iüah khe Thurai chupra hungh prakowi tarü kownkow amatchi prakowi Samuel uaimang mih khita iüah khai.15Sawl uang mih ni dowi rawn kowh ni khe CHAKRAMANG dow Samuel kowi Sawl nauang kown mih laiklow rik tek pe khai.16CHAKRAMANG tek pe Samuel mih, “Tharau kowh maiawng khin khe Benjamin krungchakuüa süng hownia ang nauang chin en maru lowk ia kown. Aia kowi dow Israeluüa kowh aluchow nachowng kownkow en hawt nümnapah diah. Filistinuüa rut hownia aia mih Israeluüa kowi nalawngah kown. Ang maru-uüa kowh kar klow dow ang tut-e uang ting khai bowt. Naiawng rakowi ang maru-uüa prakowi ang pela ching mih chowbowt,” pakhai.17Now Samuel khita Sawl hown krowksang Samuel kowi CHAKRAMANG tek pe mih, “Nami chowbowt nih ang tek en mih maru. Ang maru-uüa kowi nakruitown kown mih maru nami chowbowt,” pakhai.18Now Sawl dow marow tapplawt re-e Samuel tut-e kowkowiah now lüntaah mih, “Khi mukmang mih maru kowh kim tawng re-e chow? Sakrauma hown tek ang dit snow,” pakhai.19Nakhowk khe Samuel klangah mih, “Ang chowbowt khi mukmang mih maru. Ani dow ang hown enchi natawi cha natawi kham kown. Naiawng rakowi ang dowi rawn Thurai chupra hungh kowi kowrik pün iüa diah. En sak lak kowi kowh tawng chow uowi mih tharau khe ang tek en sow, now tharau khe ang pe mang en sow.20Sum ni dowi rawn khe kowh tama mih kawrngaramchükma hawmh rakowi hangkow tuak krat tham bowt. Naiawngün kawrngaramchükma hawmh dow kata khowk. Israel pren kowi kowh uanh iung maten amia vüi chow? Naiawngün aiungma mih maten en hai en pa krungchakuüa vüi nadowi bow?” pakhai.21Sawl klangah mih, “Tawngplawng kowchow ang kowi chekhai naiawng en tek ang? Ang dow Benjamin krungchak taih. Benjamin krungchak dow Israel chenchap maten kowi kowh lang sowm mih nadowi bow? Nami klen kowi Benjamin krungchak kowi khowm padow ang kowh machak dow kaah aklowk dowi mih chekhai,” pape khai.22Nami kung kowi Samuel dow Sawl hai aia kowh nar kowi pawla now hawm chakra kim kowi kowkowi khai. Now pinsüa 30 ia kowi kowh ringkawra lang uowi mih chowm rah kowi Sawl iüah kowi aia pe chowmah khai.23Hawm kan eng mih kowi Samuel tek pe mih, “Ang cham lang pe tow en mih chaknga uang pawla madiah,” pakhai.24Nahanow nami maru dow athung nga uang pawla now Sawl pur kowi uang towah khai. Now Sawl kowi Samuel tek pe mih, “Mami chaknga en vüi kowi kowh tow en mih chowbowt; cha diah. Ani mih makowi en nauang tawi cha tawi kham kown pami ang tuk chekhai. Naiawng rakowi krawi lai hawm chak thüm khe mami chaknga en vüi nalang towta kownkow ang tek pe khai,” pakhai. Nami ni khe Sawl dow Samuel hown tawi taiua cha hawm kan khai.25Ki cha ki kham kung kowi dow amatni mih Thurai chupra hungh hownia marow kowi uang plan khai bowt. Nami kung kowi dow Samuel mih aia kimluk kowi Sawl vüi kamrüt pe mawk rah khai.26Now auai rau khe dow murpa Samuel awr rü hanow Sawl kowi tek pe mih, “Rü now kamrüt bowt; ang tawi sa en khai,” pakhai. Now Sawl hai Samuel iüah dow kamrüt hanow kim hownia lawt iüah khai bowt.27Marow plawt re-e kowting kown chowbowt khe Sawl kowi Samuel tek pe mih, “En kowh nar kowi rik pe mangah diah, now en dow mami re-e ta iowng nawng diah. Tawng ngai chow Thurai tek mih ang natek en kown,” pape khai. Nahanow Sawl kowh nar dow rik mang khai bowt.
The Seed Company