1 Samuel8
1Samuel lawngtang khowk khe aia dow Israeluüa kowh tara chet mih arah achapa pre ia kowi peah khai.2Achapa ta mih ming dow Joel, now asawi mih ming dow Abija chekhai. Amatchi dow Ber-Seba marow kowi Israeluüa kowi chet pe tara reng chekhai.3Nachenganchepaw amatchi dow amatchi kowh pa iawng chang dowi chekhai. Amatchi dow tangka pawisa prakowi lainowmma lawpha khai. Amatchi dow cha büm hanow anowm kowi paw anowm nadowi iawng changah khai, now anowm nadowi mih kowi paw anowmma iawng changah iüah khai.4Naiawng rakowi Israel lawngtang aluchowuüa dow Rama marow kowi takua talawm hanow Samuel kowi tek pe mih, “Sünta diah, en dow lawngtang khai bowt, now en chapa pre ia paw en tiama kowi mang dowi chekhai. Naiawng rakowi akeng chenchapuüa iawng dow nakruitownla anging kownkow en mih klo anging mang lowk ia diah,” pabüah khai.6Nachenganchepaw Samuel dow naiawng amatni uang lü mang mih sak-ih dowi chekhai. Naiawng rakowi aia dow nami lawnguan kowi CHAKRAMANG tut-e awr phowk pe khai.7Nakhowk khe CHAKRAMANG tek pe Samuel mih, “Maru-uüa tek en iawng chang diah. Amatni dow en kowi kowh nuata en mih nadowi; amatni dow amatni kowh mang iawng ang uowi mih nau büah dowi rakowi nuata ang mih chekhai.8Aigupta pren hownia ang uang lawtla mih ni hownia kawmat mowr amatni dow nuata ang hanow akeng thuraiuüa kowi cham chupiia büah khai. Amatni dow ang kowi kowh chang ang iawng en kowi paw chang en mih chekhai.9Naiawng rakowi en mih amatni tek iawng chang diah. Tawkchedow amatni luk kowi nauang chowm mang kown mih maru amatni kowi tawng iawng chow nachangah kown mih lawnguan paw tekla pe kaneu diah,” pape khai.10Now Samuel dow aia tut-e kowh uang awn mang miuüa kowi CHAKRAMANG tek pe mih laiklow maten tek pe khai.11Aia tek pe mih, “Enni luk kowi kowh nauang chowm mang kown mih maru dow enni kowh chapauüa kowi kür hown nape changah siphai lup kown: Tawngbak mih kowi dow kawrnga kari te mih lup nape changah kown, tawngbak mih kowi dow kawrnga luk kowi chowm mih siphai lup nape changah kown, now tawngbak mih kowi dow aia kowh kawrnga kari maten pur kowi narik pe iowmah kown mih lup aia nape changah kown.12Tawngbak mih kowi dow aiamat vüi 1,000 ia luk kowi kowh siphai aluchow nathawpah kown, now tawngbak mih kowi dow 50 ia luk kowi kowh siphai aluchow nathawpah kown. Tawngbak miuüa kowi dow aia kowh laih lup aia nape changah kown, now tawngbak miuüa kowi dow aia kowh luprak aia nape kuaah kown. Tawngbak miuüa kowi dow tasen müa rutchün khawkleng aia nape thawpah kown, now tawngbak miuüa kowi dow kawrnga kari uanh aia nape thawpah kown.13Now enni kowh chamauüa kowi dow paingbawng thawp mih ün, chakkham eng mih ün, kawm thawp mih ün aia nachangla kown.14Aia dow enni kowh krawng bawn lang iung mih, grep krum hai kanrawn khang ün napawta enni hanow aia kowh maru iukuüa kowi napeah kown.15Enni kowh luprak hai grep uih hownia hamüt bak kowi pabak aia napawta enni kown, now naiawngün dow aia kowh maru iukuüa kowi hai akeng mih lup chang miuüa kowi aia napeah kown.16Aia dow enni kowh narma narla, enni kowh klanguüa anang uowima miuüa kowi hai enni kowh tawncher lang iung mih ün napawta enni hanow aia kowh lup chang müa kowi aia natawngah kown.17Nami klen kowi enni kowh ruapur hawmh hownia hamüt pum kowi papum mih aia napawta enni kown, now enni dow aia kowh nar nachowng kown.18Nami ni dow enni lüah mih mang kowh lup rakowi enni nakar kown. Nachenganchepaw nakhowk khe dow enni haw CHAKRAMANG chepaw aia mih naklang enni kown nadowi bowt,” pakhai.19Nachenganchepaw maru kawmuüa dow Samuel kowh naiawngün laiklow sünta kown nau dowi chekhai. Amatni dow tek mih, “Naiawng chepaw iung taih; anging nau mang lowk ia.20Nahanow a-i paw akeng chenchapuüa iawng natawi own kown towbowt. A-i kowh mang mih nachet a-i tara kown towbowt, now cham tasen khe paw aia dow a-i dowi rawn narik mang kown towbowt,” pabüah khai.21Maru kawmuüa kowh naiawngün laiklow dow Samuel mih sünta pe bowk khai, now nami laiklow dow CHAKRAMANG kowi aia awr plan phowk pe khai.22Naiawng rakowi CHAKRAMANG tek pe Samuel mih, “Maru kawmuüa tek en mih sünta pe diah, now amatni vüi kowi rui pe mang lowk ia diah,” pape khai.
Nakhowk khe Israeluüa kowi Samuel tek pe mih, “Enni matia chowlowkkow kim kowi mang büa diah,” pape khai.
Nakhowk khe Israeluüa kowi Samuel tek pe mih, “Enni matia chowlowkkow kim kowi mang büa diah,” pape khai.
The Seed Company