1 Samuel7
1Naiawng rakowi Kiriat-Jearim marowchakuüa dow Bet-Semes marow kowi uangah now CHAKRAMANG kowh sangbowk laitawm tawkpla mih pawla khai bowt. Amatni dow hungh luk kowi kowh amatni kowh marow kowi Abinadab kim kowi nami sangbowk laitawm tawkpla mih towah büah khai. Now nami sangbowk laitawm tawkpla naming nakhetla kownkow amatni dow Abinadab kowh chapa Eleazar kowi mih CHAKRAMANG vüi lang kraah büah khai.2Kiriat-Jearim marow kowi CHAKRAMANG kowh sangbowk laitawm tawkpla uowi mih dow pirmi ning khowk chekhai. Nami khin khe Israeluüa dow CHAKRAMANG tut-e nauang plan iawk kown mih lainowmma prüa khai.3Pakat khe Israeluüa maten kowi Samuel tek pe mih, “Enni che saktuak maiow hown CHAKRAMANG tut-e uang plan kown nau khai hanow enni pungmadawng kowi akeng chenchapuüa kowh thuraiuüa rup maten hai Astarte thurai rup maten kuakta bowk büa diah, now saktuak lowkchow hown CHAKRAMANG kowi phai chupiia büa diah. Nahanow aia mih Filistinuüa rut hownia nalawng enni kown taih,” pakhai.4Nami laiklow tata hanow Israeluüa mih amatni kowh Baal thurai rup hai Astarte thurai rup maten cham kuakta büah bowk khai, now amatni dow CHAKRAMANG kowi chowtaih chupiia büah khai.5Nakhowk khe Samuel tek pe mih, “Israeluüa maten kowi Mizpa marow kowi kuaah lawmah diah. Nakowi dow enni vüi ang nachup enni Thurai kown,” pakhai.6Naiawng rakowi Israeluüa maten dow Mizpa marow kowi takua talawm khai. Nami ni khe amatni dow towng tui hanow uanap iawng hai CHAKRAMANG pur kowi khükah büah khai, now khang hawm büah khai. Amatni dow tek mih, “CHAKRAMANG kowi kingküala mih angak anging changta khai,” pabüah khai. Samuel dow Mizpa marow kowi uowiah now Israeluüa kowi chet pe tara khai.7Now Mizpa marow kowi Israeluüa takua talawm mih satang dow Filistinuüa tawi ta khai. Nami laiklow tata hanow Filistinuüa dow Israeluüa kowi nakowsenah kownkow Mizpa marow prakowi tarü büah khai. Filistinuüa uang senah kown pami satang Israeluüa ta hanow lainowmma kram büah khai.8Nakhowk khe Israeluüa tek pe Samuel mih, “Filistinuüa rut hownia CHAKRAMANG a-i kowh Thurai mih nalawng a-i kownkow en mih kar se amowt uowi dowi kowi chup a-i Thurai diah,” pabüah khai.9Nakhowk khe Samuel dow kham iawn reng tak mih ruapur chah cham paw pe apum khai, now nami ruapur chah papum mih hown aia dow CHAKRAMANG vüi tikah mih uanap changla khai. Aia dow Israeluüa vüi kowi CHAKRAMANG tut-e kar se awr lü khowng khai, now CHAKRAMANG paw aia awr lü mih uang klangah khai.10CHAKRAMANG vüi tikah mih uanap Samuel chang thüm khe Israeluüa kowi nauang senah kownkow Filistinuüa dow uang towm khai bowt. Nachenganchepaw nami ni dow kaikreng tün iawng kramra uowima mih tün Filistinuüa kowi CHAKRAMANG chang pe khai. Nahanow Filistinuüa dow kram kowh taset plawt khai. Naiawng rakowi nami ni dow Israeluüa rut kowi sum büah khai.11Nakhowk khe Israeluüa mih Filistinuüa kowi saila se Mizpa marow hownia Bet-kar kua re-e kowh rep mowr kawikrawiah khai.12Nami khin khe Samuel dow cham paw pe hua lowk hanow Mizpa marow hai Sen pami arah takra kowi chowkah khai. Nakhowk khe Samuel tek mih, “Kawmat mowr dow CHAKRAMANG khowng anging reng tak chekhai,” pakhai. Naiawng rakowi aia dow nami hua ming mih Ebenezer (Nami auan dow “Khowng mih hua” pami chekhai) pahai chap pe khai.13Naiawng hai Filistinuüa dow Israeluüa tut-e khamsum khai bowt. Nami hownia bowt now amatni dow Israeluüa kowh sünghi lak kowi kowkup dowi chekhai. Samuel sing uowi mowr dow CHAKRAMANG mih Filistinuüa kowi kingküaah reng chekhai.14Ekrawn marow hownia Gat marow mowr kowi kowh Israeluüa kowh marow hai kua maten Filistinuüa powngta pe mih dow Israeluüa mih plan kata khai iawk. Israeluüa dow naiawngün marow hai kua riaret kowi kowh arah maten paw Filistinuüa rut hownia krawi plan kata khai iawk. Nami khin khe Filistin pren kowi kowh tawi uowi mih Amawruüa hown Israeluüa dow thawp taking tasangra khai.15Now Samuel dow aia sing uowi mowr mih Israeluüa kowi chet pe tara khai.16Aia dow ning towng Bethel, Gilgal hai Mizpa marow kowi krawi kowiah now Israeluüa kowi krawi chet pe tara khai.17Nami kung kowi dow Rama marow kowi kowh aia kim kowi aia uang plan reng chekhai. Aia dow nakowi paw Israeluüa kowi chet pe tara reng chekhai. Aia dow nakowi mih CHAKRAMANG vüi thawp pe phuchuara lowk chekhai.
The Seed Company