1 Samuel27
1Nachenganchepaw David ka tuak mih, “Pani dowi now pani dow Sawl rut kowi ang mih akowng natakla kown lowmow. Naiawng rakowi Filistinuüa pren kowi powt mih ang vüi nalang iung kown. Nahanow Israel pren kowi Sawl mih nakrawi cham ang kown nadowi bowt, now ang paw aia rut hownia naplai kown towbowt,” pakhai.2Naiawng rakowi David mih aia kowh maru-uüa 600 ia kowi pawla now Maawk kowh chapa Akhis tut-e kowpowt khai. Akhis dow Gat marow mang chekhai.3Now David hai aia kowh maru-uüa dow Gat marow kowi Akhis tut-e tawi uowi khai bowt. David kowh maru-uüa hown dow amatni chowlowkkow kimchakuüa paw tawi uowi bowk chekhai, now David hown paw aia kowh masi pre ma mih tawi uowi khai. David kowh masi pre ma kowi lowk ia mih dow Jezrel kuachak Ahinoam chekhai, now alowk mih dow Karmel kuachak kowng mih Nabal kowh masi Abigail chekhai.4Gat marow kowi David kowpowt khai bowt pami satang tata hanow Sawl dow David kowi nasaiah kownkow krawi chamah dowi bowt chekhai.5Pakat khe David tek pe Akhis mih, “Mangkri, en che sak-ih ang khai hanow mami pren kowi ang tawi ia uowila kownkow tawng mih marow kowi chünchü pe ang arah sangrumchow dit snow. Ang dow en kowh nar chowtaih. Naiawng rakowi en hown marow kri kowi pe uowi ang kla dowi,” pakhai.6Naiawng rakowi Akhis mih David kowi Ziklak marow peah khai. Nami hownia bowt now Ziklak marow dow ani mowr pat Juda manguüa krüa kowi uowi reng chekhai.7Now David dow Filistinuüa pren kowi paning hown tali la mowr tawi uowi khai.8Filistin pren kowi uowi khe David mih aia kowh maru-uüa kowi pawla now Gesuruüa, Girziuüa hai Amalekuüa kowi krawi senah hanow pawta pe dawngthawnguan bowk khai. Achük alai hownia naiawngün chenchapuüa uowi mih dow Sur pren hai Aigupta pren sünghi mowr kowi kowh uowi mih süng maten kowi chekhai.9Naiawngün chenchapuüa kowi krawi senah khe David dow kachakuüa hai masiuüa maten kowi saila bowk khai. Nachenganchepaw tawncher hai tawnguat maten dow aia uang pawla reng chekhai.10Now Akhis tut-e aia uang plan towng Akhis hawt lüntaah mih, “Ani dow tawng kowi chow en cham tasen?” pakhai. Nakhowk khe David mih, “Juda pren kowi kowh tawngphak pra kowh süng kowi taih,” pakhai, tawngbak khe dow, “Jerameluüa pren kowi kowh tawngphak pra kowh süng kowi taih,” pakhai, now tawngbak khe dow, “Kenuüa pren kowi kowh tawngphak pra kowh süng kowi taih,” pahai daiah reng chekhai.11David dow aia cham senah mih marow kowi kowh maru maten kowi saila bowk reng chekhai. Lowk iachow khowm padow Gat marow kowi asing katpaw aia uang pawla dowi. Tawngplawng kowchow panow asing che aia towla ne hanow tawng kowi chow aia cham tasen mih Akhis kowi natek pe kown chekhai padow aia ka tuak khai. Naiawng rakowi aia dow Filistinuüa pren kowi kowuown uowi hownia naiawng chang reng chekhai.12Nachenganchepaw Akhis dow David kowi owmah khai. Aia dow ka tuak mih, “Naiawng David chang reng hanow aia kowi dow aiamat chenchap Israeluüa nasuiah kown towbowt, now aia sing uowi mowr mih ang kowh nar nachowng kown towbowt,” pakhai.
The Seed Company