1 Samuel24
1Filistinuüa hown ki tasen kowh Sawl uang plan khe Sawl kowi maru uang phowng pe satang mih, “David dow En-Gedi pami süngrüp süngkangma kowi uowi khai,” pakhai.2Nami satang tata hanow Sawl dow Israeluüa pungmadawng hownia klo maru 3,000 ia khai. Now David hai aia kowh siphaiuüa kowi nakrawi cham kownkow Kaurawng Rua huamang pami arah re-e kowkowi khai.3Amatni dow mang mang hanow ruapur tung uowi pre sum tung mih arah re-e kowting büah khai. Nami arah re-e dow puk paw uowi lowk chekhai. Now Sawl mih nacham uat kownkow nami puk kowi kowkup khai. Nachenganchepaw nami puk alak nowm nowm kowi dow David hai aia kowh siphaiuüa uowi khai.4Sawl uang uat mih khita now David kowi aia kowh siphaiuüa tek pe mih, “CHAKRAMANG tek en mih, ‘En kowh ransu kowi en rut kowi ang naap en kown, now aia luk kowi dow en tut-e iung iawng changah diah,’ pah en khai. Nami laiklow dow ani uang tachi mih chowbowt,” pakhai. Nakhowk khe David mih asachow asachow kowkowiah now Sawl khupah mih kowrmow kowhiah pe pasek khai.5Nachenganchepaw Sawl kowh kowrmow ki hiata pasek kung kowi dow David mih mapaw sak sowr uowi dowi bowt chekhai.6Naiawng rakowi aia kowh siphaiuüa kowi David tek pe mih, “Hang klawk uailai büa diah! Sawl kowi a-i nachangah naklak kown nadowi. Aia dow ang kowh mangkri chekhai. CHAKRAMANG mih aia nümnapah mih mang kowi nachangah angak kown mih alow mapaw hauang pacham pe ang lah,” pakhai. Naiawng hown David dow Sawl kowi nakowngta dowi kownkow aia maru-uüa kowi hangah khai. Nami kung kowi Sawl dow puk hownia lawt hanow tarowng mang khai bowt.8Now David paw puk hownia uang lawt hanow Sawl kowi atünma krawi hawah khai. Now Sawl uaidang khe dow David mih krawng kowi tabawkah krawm se chupah khai.9David tek pe Sawl mih, “David krawi chang en angak kown pahai maru tek en mih tawng en tuk owm khai?10Ani dow amatni kowh laiklow dai taih pami en tuk khowk chekhai. Tawngbak mih ang kowh siphaiuüa dow nasaita en kown mih tek ang khai. Nachenganchepaw ang sana en khai. Naiawng rakowi ang tek pe mih, ‘Ang kowh chakramang luk kowi ang ia tang rut dowi. Tawngplawng kowchow panow aia dow CHAKRAMANG nümnapah mih maru chekhai,’ ang pakhai.11Aw apa, ang rut kowi kowh kowrmow sek sam mü madiah. Mami kowrmow sek dow kawmat kowh en khupah mih kowrmow hownia kowh ang hia-ah mih chekhai. Ang nau panü dow ang nowng sai en kown tai diah. Nachenganchepaw ang sai en dowi. Nami hownia ang chang en angak kown ang nau dowi pami achima en tuk khowk. En luk kowi ang changta angak mih tawngpaw uowi dowi chekhai. Nachenganchepaw nasaita ang kownkow en krawi hing kramta ang hüah khai.12Achi pre ia kowi mia chow tawi mih CHAKRAMANG pacham chet achi tara lah. En chang ang angak kownkow en kamrüt mih rakowi CHAKRAMANG dow narip en chepaw naia kown. Nachenganchepaw ang dow en luk kowi mapaw natang rut kown nadowi.13Alai kowh maru-uüa tekah mih laiuat en natuk kown mih ang ming. Nami laiuat dow, ‘Lup ngak dow maru ngakuüa kowh lup chekhai,’ pakhai. Naiawng rakowi ang dow mapaw nachang en angak kown nadowi.14“Mia iawng mih kowi chow nasaita kownkow Israel mang uang lawt? Mia iawng mih maru kowi chow en kawikrawi? En kawikrawi kui uak mih bow? Dowdow en kawikrawi kuikli mih bow?15CHAKRAMANG dow pacham chet achi tara lah, now aia dow achi pre ia kowi mia chow nga mih kowi pacham ripah lah. Aia dow tawi tangila ang hanow en rut hownia pacham lawng ang lah,” pakhai.16David kowh lai chur now Sawl tek mih, “Ang chapa David ching bow en?” pakhai. Naiawng tekta now aia dow atün atünma kar khai.17Now David kowi aia tek pe mih, “Ang lak-e en lang tachi tanawm khai. Tawngplawng kowchow panow khowt ang chang en angak khowk chepaw en dow chang ang aiung khai.18En chang ang angak kown en nau dowi mih achima en tüng ang khai. Ani mih en rut kowi CHAKRAMANG apta ang khowk chepaw en sai ang dowi chekhai.19Kowmatia ransu kowi ka khüm kowh tawngpaw changah dowi matchang lawtta mih mia chow uowi? Ani kowh en chang ang aiung mih rakowi CHAKRAMANG mih pacham pe en iungra lah.20En naphaw mang ngengche kown mih hai en hownia Israel pren anikma nauowi kown mih kawmat dow ang tuk khowk.21Naiawng rakowi ang kung kowi kowh ang kowh krungchakuüa kowi en napiakah dowi kown mih hai ang kowh ming apa kimchakuüa hownia en namata ang dowi kownkow ani mih CHAKRAMANG ming hown ang tut-e takham diah,” pape khai.22Nahanow David dow nami lawnguan kowi aia tut-e takham khai. Nami kung kowi dow Sawl mih kim prakowi plan mang khai bowt, now David hai aia kowh siphaiuüa dow amatni tapetra akhawtma mih kangchawngra kim kowi kowkowi khai.
The Seed Company