1 Samuel18
1Nami ni hownia bowt now Sawl mih David kowi aia tut-e towla khai, now a-pa tut-e pe mangah dowi bowt chekhai. Akung kowi Jonathan hai David iüah dow talek klowk chekhai. Jonathan dow David kowi lainowmma sakrauah khai.3Naiawng rakowi amatchi dow nata-auiua reng kownkow takham iüah khai.4Jonathan mih aia khupah mih kowrmow athawngma mih klüpah now David kowi peah khai. Nami klen kowi aia kowh tasen tawnguat, saidawng, leba hai kekawm paw David kowi aia peah khai.5David dow Sawl cham chinah mih arah maten kowi cham kowi reng chekhai, now aia dow cham awng reng chekhai. Naiawng rakowi aia kowi dow akeng mih siphaiuüa luk towah aluchow khai. Naiawng siphai aluchow rah David ka mih dow siphaiuüa hai maru maten paw tawi awmrawm pe khai.6Filistin siphai Goliat pami kowi David kowngta kung kowi dow siphaiuüa mih amatni kowh marow kowi uang plan khai bowt. Nakhowk khe Israel pren kowi kowh marow towng hownia masiuüa hawmh mih Sawl kowi uang chumah khai. Naiawngün masiuüa hawmh dow tekla awmrawm meng now plai se plai se uang tarü khai. Nami klen kowi sawkchow hai towmmow chah paw tepla büah khai.7Amatni dow plai se plai se tek meng mih,“Saul sai ransu-uüa mih dow athawng athawng ia chekhai,David sai ransu-uüa mih dow tasawng tasawng ia chekhai,” pakhai.8Nami meng tata hanow Sawl dow lainowmma kunmarau khai. Aia dow sak-ih dowi rakowi tek mih, “David sai ransu-uüa mih dow tasawng tasawng ia, now ang sai ransu-uüa mih dow athawng athawng iachow pami meng tawngplawng kowchow kowbüah tuk tek khai? Nami kung kowi dow David kowi nape chowmah mang kown mih klen kowi tawng chow uowi tak?” pakhai.9Nami khin hownia bowt now Sawl mih David kowi hing irsita hüah chekhai.10Now auai ni khe dow Thurai hownia kowh lümla ngak mih Sawl tut-e uang uowi khai. Nahanow aia dow aia kim kowi thur burlur khai. Nakhowk khe David mih akeng ni khe kowh iawng aia pur kowi uangah now uang tep pe taraw khai. Nakhowk khe Sawl rut kowi dow reh uowi apung chekhai.11Aia dow kimbang kowi tadan klap mowr David kowi nasawtah kown mih sakdawng kowi tatuak khai. Naiawng rakowi aia dow reh hown David kowi hürah pre kat khai. Nachenganchepaw David mih ia taplengta pe khai.12CHAKRAMANG dow David tut-e tawi uowi reng chekhai. Nachenganchepaw Sawl kowi dow CHAKRAMANG powtta khai bowt. Naiawng rakowi Sawl mih David kowi kramah khai.13Naiawng rakowi Sawl mih aia hownia David kowi akeng kowi cham chinta khai bowt, now siphai 1,000 ia kowi kowh aluchow thawpah khai. Nahanow David dow siphaiuüa hown cham tarü tasen khai.14Now aia tut-e CHAKRAMANG tawi uowi reng rakowi aia changah mih lup maten chawn reng chekhai.15Naiawng David kowh lup chawn reng mih khita hanow Sawl dow David kowi kramah ngamlam khai.16Nachenganchepaw David dow siphaiuüa kowi klangiungma kruitownah khai rakowi aia kowi dow Israeluüa hai Judauüa maten sakrauah khai.17Pakat khe David kowi Sawl tek pe mih, “Ang kowh chama ta Merab hown ang pe tachawng en kown. Nami takcha kowi en mih sakkhawtma hai sakkraingma CHAKRAMANG vüi kowi ransu-uüa hown natasen kown takla,” pakhai. Nachenganchepaw Sawl kowh saktuak dow David kowi aia saiah dowi kowi Filistinuüa rut kowi nape kowngah kownkow chekhai.18Sawl kowi David tek pe mih, “Tawng iawng chow mang kowh mawkchow ang naia chowng kown chow? Ang hai ang kimchak dow tawngpaw nadowi chekhai,” pape khai.19Nachenganchepaw David hown Merab iüah kowh tachawng khin uang ting khe dow Mehola kuachak Adriel hown Merab kowi Sawl pe tachawngta tüng khowk chekhai.20Nachenganchepaw Sawl kowh chama Mikal pami dow David kowi naukhi-ah khai. Nami laiklow mih Sawl kowi maru kowtekla pe hanow Sawl dow awmrawm khai.21Now aia ka tuak mih, “Ang kowh chama mih David kowi ang napeah kown. Nahanow David kowi Filistinuüa nakowngta kown mih tiama ang naka kown towbowt,” pakhai. Naiawng rakowi David kowi aia tek pe iawk mih, “Ang kowh mawkchow chowng kown mih en plan ka khai iawk,” pakhai.22Aia kowh naruüa kowi Sawl peah ana mih, “Kukpa David hown kowtalawp büah madiah. Enni natek pe kown mih, ‘Sünta, mangkri mih en luk kowi lainowmma awmrawm chekhai, now aia kowh naruüa maten paw sak-ih en chekhai. Naiawng rakowi khaleng dow mang kowh mawkchow chowng towbowt,’ pape diah,” pakhai.23Naiawngün laiklow maten Sawl kowh naruüa ki tek pe David kung kowi David tek mih, “Mang kowh mawkchow nachowng kown mih iawngpa mih lup pabow enni ka tuak? Ang dow ngaraima hai iawngpa mih maru chowtaih,” pape khai.24David tekah mih srui Sawl kowh naruüa mih Sawl kowi uang tek pe khai.25Nakhowk khe anaruüa kowi Sawl tek pe mih, “David kowi enni natek pe kown mih, ‘Achama sung Filistinuüa kowh khampha uanpik 100 chowtaih pe mangkri nau. Nami klen kowi tawngpaw aia nau dowi pe,’ pape diah,” pakhai. Naiawng aia kük mih dow Filistinuüa rut kowi David pacham kowng lah pakowh chekhai.26Sawl kowh naruüa mih nami laiklow David kowi kowtek pe hanow David dow awmrawm khai, now Sawl kowh mawkchow nachowng kown mih nauta khai bowt. Naiawng rakowi David mih Sawl tow pe akhin mih chi dowi rawn pawla siphaiuüa now Filistin 200 ia kowi kowsaita khai. Now Sawl kowh mawkchow nachowngla kownkow Filistinuüa kowh khampha uanpik mih hiala now Sawl kowi uang pawla pe khai. Nahanow Sawl mih achama Mikal kowi David hown pe tachawngah khai.28David tut-e dow CHAKRAMANG tawi uowi reng, now achama Mikal paw David kowi sakrauah pami akung kowi Sawl tuk khai bowt.29Nakhowk khe Sawl dow David kowi lang kramah ngamlam khai. Naiawng hai aia kowng dowi mowr Sawl dow David kowh ransu chowngla khai.30Nami kung kowi Filistin siphaiuüa kowh aluchowuüa dow Israeluüa hown uang dowk tasen kownkow uang lawt khai. Nachenganchepaw amatni atungma sum büah khai. David dow akeng mih siphaiuüa lak-e Filistinuüa kowi lang saiah khai. Naiawng rakowi David kowh dow aming anang uang tahowng ngamlam khai.
The Seed Company