1 Samuel17
1Akat dow Israeluüa kowi nakowsenah kownkow Filistinuüa mih kuala siphaiuüa now Juda krungchakuüa süng kowi kowh Soko marow kowi kowtarü khai. Amatni dow Soko marow hai Azeka marow takra kowi kowh Efes-Damim pami arah kowi uang khup tangbung khai.2Now Sawl hai Israeluüa dow takua talawm now Ela lawngrawi re-e kowh hungh kowi kowkhup tangbung khai, now Filistinuüa kowi nasenah kownkow amatni dow amatni kowh siphaiuüa kowi krawi towah khai.3Ela lawngrawi mapra kowh hungh kowi uowi mih dow Israel siphaiuüa chekhai, now paipra kowh hungh kowi uowi mih dow Filistin siphaiuüa chekhai.4Filistin siphaiuüa hownia aming Goliat pami dow tangbung khup rah hownia uang lawt hanow Israeluüa kowi uang toah khai. Aia dow Gat marowchak chekhai. Aia dow tasen kiakma mih maru, now akro paw taruk muk hown pakar chekhai.5Aia dow kri hown kowh lukruk krukma, now dam lip iawng thawpah mih kri kowrmow khupma chekhai. Nami kowrmow dik dow 55 set ngia chekhai.6Aia klowng kowi dow kungh hownia klingnik mowr kri hown tabamlut chekhai, now aia pangkawt kowi dow kri reh tauai hüah chekhai.7Aia kowh reh pung dow li iawng aiukma chekhai. Nami lawngha reh chem dik dow taruk set hown 800 gram chekhai. Aia kowh kawngma dowk mih maru dow aia pur kowi rik mang reng chekhai.8Goliat dow iowngah now atünma Israeluüa kowi uang tek pe mih “Tawngplawng kowchow nadowk tasen kownkow enni uang tuk kamrüt khai? Ang dow Filistin siphaiuüa pungmadawng kowi kowh tasen kiakma mih siphai chaw; enni dow Sawl kowh nar chowtaih. Enni pungmadawng kowi rui maru lowk ia now ang tut-e uang haichin madiah.9Aia che ang hown tadowk tasen kowh nowng kowngta ang khai hanow enni kowh nar anging nachowng kown. Tawkchedow aia kowi che ang nowng kowngta khai hanow anging kowh nar enni nachowng kown takla.10Enni Israel siphaiuüa kowi dow mapaw ang hing kram dowi. Ang hown nauang dowk tasen kownkow uai chin ang maru lowk ia büah madiah,” pakhai.11Nami Goliat kowh laiklow tata now Sawl hai aia kowh siphaiuüa dow lainowmma kram khai.12Sawl chowm mang mih khin khe David kowh pa Jese dow lawngtangma khowk chekhai. Jese uowi mih dow Judauüa süng kowi kowh Bethlehem-Efrat marow kowi chekhai. Aia kowh dow chapa uowi raiat ia chekhai.13Aia kowh chapa ata mih sum ia dow Sawl hown tawi dowk tasen khai. Nami sum ia kowi lang ta mih dow Eliab, nami dak kowi dow Abinadab, now nami dak kowi kowh dow Samma chekhai.14Aia kowh chapauüa pungmadawng kowi lang sawi mih dow David chekhai. David kowh taimow sum ia dow Sawl kowh siphaiuüa tut-e tawi hing uowi khai. Nachenganchepaw David dow mang Sawl hownia Bethlehem kowi apa kowh ruapur thingra kowi khin khin kowmang reng chekhai.16Goliat dow rau-e hai iak prakowi ni towng Israel siphaiuüa pur kowi uang tatüng reng chekhai. Naiawng hai aia dow 40 ni mowr Israel siphaiuüa kowi uang toah reng chekhai.17Akat khe David kowi a-pa tek pe mih, “En taimowuüa vüi mami püm ngai ia 18 set hai mami kawm hamüt pah mih pawla now siphaiuüa tangbung khup rah kowi alenma kowkowi diah.18Now mami iawn tui bawi keu hamüt dung mih dow 1,000 ia siphaiuüa luk kowi kowh aluchow vüi pawla pe dit. En taimowuüa tawng iawng chow uowi mih kowmü madiah, now amatni iung reng tak pami amatra uang pawla pachap diah.19Kawmat Sawl hai en taimowuüa hown Israel siphaiuüa maten uowi mih dow Ela lawngrawi kowi chekhai. Amatni dow Filistin siphaiuüa hown tasen thüm,” pakhai.20David dow murpa awr rü hanow aia kowh ruapur hawmh nata khet pe kownkow akeng mih ruapur thing mih lowk ia kowi ta pela pe kurdik khai. Nami kung kowi aia dow apa kowh ana pek iawng uanh maten pawla now tarü khai bowt. Tangbung khupra re-e aia kowting khe Israel siphaiuüa mih kowtadowk tasen kownkow hekla plala se arui alengma uang lawt thüm chekhai.21Israeluüa hai Filistinuüa dow natadowk tasen kownkow amatni kowh siphaiuüa kowi tatingtang klowk towah büah khai.22Nakhowk khe David dow aia uang pawla mih uanh maten uanh mingkhet mih tut-e ta towla now alenma siphaiuüa pungmadawng kowi kowkup khai, now aia dow ataimowuüa kowi kowpawah satang khai.23Now ataimowuüa hown David taklang thüm khe Gad marow hownia kowh Filistin siphai Goliat dow amatni kowh siphaiuüa pungmadawng hownia uang lawt khai iawk. Now ni towng kowh aia uang tek reng iawng Israel siphaiuüa kowi uang tek pe khai iawk. Nami laiklow dow David mih tawi ta khai.24Nakhowk khe Israel siphaiuüa maten dow Goliat kowi khita now kram kowh powt bowk khai.25Israel siphaiuüa tatek mih, “Paimi uang lawt rengreng mih maru kowi enni khi bow? Aia dow Israeluüa kowi uang toah reng chekhai. Paimi kowi nowng kowngta mih maru kowi dow dawngthawnguan ahuma napeah kown mih mang takham khai. Nami klen kowi paimi kowi nowng kowngta mih maru kowi dow aia kowh chama hown aia pe tachawngah kown pe, now nami maru kowh kimchak kowi dow tawng iawng mih mangmu paw aia napaw pe kown nadowi pe,” pakhai.26Nakhowk khe aia re-e kowh iowng miuüa kowi David lüntaah mih, “Paimi Filistin maru kowi nowng kowngta kowh Israeluüa kowh rukraira nowng henta mih maru kowi tawng chow napeah kown? Paimi hiah khampha uanpik dowi mih Filistin mia chekhai chow? Masing Thurai kowh siphaiuüa kowi natoah kown mih tawng tuk ka tuak khai,” pakhai.27Nahanow nami re-e kowh maru-uüa dow Goliat kowi nowng kowngta mih maru kowi tawng ngai chow napeah kown mih amatni rik tatek khe kowh iawng David kowi tek pe khai.28David kowh taimow Eliab dow naiawng maru hown David talawp mih tata hanow lainowmma kunmarau khai. David kowi aia tek pe mih, “Tawngplawng kowchow makowi en uang tuk uang khai? Süngrüp süngkangma kowi kowh en kowh ruapur hawmh mia tut-e chow en cham towla? En kowh bawri krang hai kiang ngak krang ang aiawng tuk. Makowi en uang tawi mü tasen iawk khowk,” pakhai.29Nakhowk khe David klangah mih, “Tawng chow ang changta khai? Tawngpaw ang ia lünta dowk ü?” pape khai.30Naiawng tekla pe hanow David dow akeng miuüa tut-e nami lawnguan kowi krawi lünta khai iawk, now akeng miuüa paw nami powm iawng hawt tek pe khai iawk.31Now David tekah mih laiklow tata hanow akeng miuüa dow Sawl kowi kowphowng pe khai. Nakhowk khe Sawl dow David kowi aia tut-e nauang pawla kownkow kowchin maru khai.32Now David tek pe Sawl mih, “Paimi Filistin siphai kowi khi hanow hangkow nen sak büa diah. En kowh nar ang mih aia hown kowtasen sow,” pakhai.33Nakhowk khe Sawl tek pe mih, “Tawng iawng chow paimi Filistin hown en kowtasenah kown? En dow mani maiak kowh chah tak. Paimi Filistin dow asowmchow hownia kowh tasen akiakma mih siphai pai iow,” pape khai.34Sawl kowi David tek pe mih, “Ang dow apa kowh ruapur thing mih chowtaih. Tawkche khin khin ang cham thing ruapur khe krangsi ün, tawm ün uang mak ang ruapur hanow cham pawla reng chekhai. Nakhowk khe ang kawikrawiah now krangsi nawr hownia lah, tawm nawr hownia lah ang kowh ruapur kowi ang krawi lawngah reng chekhai. Nami khin khe krangsi hai tawm che namak ang kownkow uang chawm ang hanow angawng kowi ang hawt dowk pe now kowng pat ang bawpah reng chekhai.36Mami en kowh nar rut kowi krangsi paw kowng khowk, now tawm paw kowng khowk chekhai. Paimi hiah khampha uanpik dowi mih Filistin paw naiawng dow ang rut kowi nakowng kown taih. Tawngplawng kowchow panow aia dow masing Thurai kowh siphaiuüa kowi to mih chekhai,” pakhai.37Nami klen kowi David plan tek mih, “Krangsi hai tawm rut hownia kowh lawng ang reng mih CHAKRAMANG dow paimi Filistin rut hownia paw nalawng ang kown taih,” pakhai.
Nakhowk khe David kowi Sawl tek pe mih, “Naiawng now kowtarü bowt. CHAKRAMANG dow pacham tawi uowila en reng lah,” pape khai.38Naiawng tek pe hanow Sawl mih aiamat kowh tasen tawnguat David kowi khup pe khai. Aia dow dam lip iawng mih kri kowrmow David kowi khup pe khai, now kri lukruk aia kruk pe khai.39Now nami tawnguat khupta kung kowi David mih Sawl kowh saidawng uaila now chaing mang khai. Naiawng mih tawnguat nami dowi rawn katpaw aia khup dowi tak rakowi aia dow tuk mang dowi chekhai.
Naiawng rakowi aia tek pe Sawl mih, “Maiawng mih tawnguat katpaw ang khup dowi tak chekhai. Naiawng rakowi maiawngün tawnguat khupma hown ang tuk mang dowi,” pape khai. Naiawng ki tek now aia dow naiawngün tawnguat klüpta khai.40Nami kung kowi dow aia kowh ruapur thing müa raitua dowkla now awchawng kowi cham kowi khai. Now huaklu chah alümpüchow kangowh mih aia cham lüm tanga klüng khai. Naiawngün dow aia cham thing ruapur khe kowh aia uaila reng mih chak pik im kowi aia phangah khai. Now aia kowh iaiba pawla now aia dow Goliat prakowi kowtarü khai bowt.41Now Goliat paw David prakowi uang haimang khai. Goliat kowh kawngma dowk mih dow aia pur kowi rik mang khai.42Goliat dow David prakowi haimü hanow David kowi toah khai. Tawngplawng kowchow panow David dow kow iungma hai apowm klangiungma mih klanguüa tadowklowtchow mih taih tak chekhai.43Now David kowi Goliat tek pe mih, “Tawng en uang tuk pawla müa khai? En nüla ang kui bow?” pakhai. Now aia dow aia kowh thuraiuüa ming hown David kowi peah piati khai.44Nami klen kowi David kowi aia plan tek pe mih, “Uang haimang. Ani dow en kowh nga mih uakling uaber hawmh hai kaurawng uaramchak hawmh kowi ang pe chaah kown,” pakhai.45Nakhowk khe Goliat kowi David tek pe mih, “Ang tut-e en uang mih dow saidawng hai reh ün dowkma chekhai. Nachenganchepaw en tut-e ang uang mih dow en toah reng mih lang kri lang kraing mih CHAKRAMANG, Israel siphaiuüa kowh Thurai ming hown chowtaih.46Ani dow CHAKRAMANG mih ang rut kowi naapta en kown. Ani dow ang nasai en hanow ang nadungta en lu kown. Ani dow Filistin siphaiuüa kowh uak mih uakling uaber hawmh hai kaurawng uaramchak hawmh kowi ang nape chaah kown. Nami khi hanow Israel pren kowi Thurai tawi uowi chekhai pami lusa kowi kowh maru maten natuk bowt kown.47Now CHAKRAMANG dow aia maru-uüa kowi nalawngah kownkow saidawng hai reh lakke dowi chekhai pami ani kowh mami re-e uowi mih maten paw natuk bowt kown. Ani mih aia dow anging rut kowi naap enni kown. Tawngplawng kowchow panow mami tasen dow CHAKRAMANG kowh tasen chekhai,” pape khai.48Now aia kowi nauang senah kownkow Goliat uang haimang thüm khe David paw Goliat prakowi haiiowm khai.49Now aia kowh im hownia iu paw huaklu lowk hanow aia kowh iaiba hown Goliat kau kowi awr ap-ah khai. Nami huaklu dow Goliat kau kowi kowkak hown krowksang Goliat dow tim krum khai.50Nakhowk khe David mih alenma kowiowmah now Goliat ria kowi kowiowng khai. Now Goliat kowh saidawng kawp hownia iu howk saidawng hanow aia mih Goliat kowi dungta pe lu khai. Naiawng hai David mih iaiba hai huaklu lowkchow hown Goliat kowi nowngta khai. Aia rut kowi saidawng uowi dowi chepaw aia dow Goliat kowi nowng kowngta khai. Now amatni kowh tasen lang kiak mih kowng khai bowt mih khita hanow Filistin siphaiuüa dow tarowng powt khai bowt.52Nakhowk khe Israeluüa hai Judauüa mih hekla plala se Gat hai Ekrawn marow tapplawt mowr Filistinuüa kowi kawikrawiah khai. Nakhowk khe Filistin siphai ka arau miuüa hai kowng miuüa uak dow Saraim hownia Gat hai Ekrawn marow mowr patiama rawng takuakla pan khai.53Nami kung kowi dow Israeluüa mih Filistinuüa kowi kawikrawi mih towta hanow Filistin siphaiuüa kowh tangbung khup rah kowi uang paw uanh büah khai.54Akung kowi Goliat kowh lu dow Jerusalem marow kowi David uang pawla khai, now Goliat kowh tasen müa rutchün khawkleng hai tasen tawnguat dow aiamat kowh tangbung kowi David towah khai.55Goliat hown kowtasen kownkow David tarü mih khita now aia kowh siphai aluchow Abner kowi Sawl lüntaah mih, “Abner, paimi klanguüa mia kowh chapa chow?” pakhai.
Now Abner klangah mih, “Mangkri, en ming hown ang takham khowk, paimi klanguüa kowi ang tuk dowi,” pape khai.56Nakhowk khe mang tek pe Abner mih, “Paimi klanguüa mia chapa chünchü krawi paw satang madiah,” pakhai.57Now Goliat kowi kowngta kung kowi David uang plan khe Abner mih David kowi Sawl tut-e kowpawla khai. Nakhowk khe David dow Goliat kowh lu dowkla kawlaw chekhai.58Now David kowi Sawl lüntaah mih, “Klanguüa, mia chapa chow en?” pakhai.
Now David tek pe mih, “Ang dow Bethlehem marow kowi kowh en kowh nar Jese kowh chapa taih,” pape khai.
Nakhowk khe David kowi Sawl tek pe mih, “Naiawng now kowtarü bowt. CHAKRAMANG dow pacham tawi uowila en reng lah,” pape khai.38Naiawng tek pe hanow Sawl mih aiamat kowh tasen tawnguat David kowi khup pe khai. Aia dow dam lip iawng mih kri kowrmow David kowi khup pe khai, now kri lukruk aia kruk pe khai.39Now nami tawnguat khupta kung kowi David mih Sawl kowh saidawng uaila now chaing mang khai. Naiawng mih tawnguat nami dowi rawn katpaw aia khup dowi tak rakowi aia dow tuk mang dowi chekhai.
Naiawng rakowi aia tek pe Sawl mih, “Maiawng mih tawnguat katpaw ang khup dowi tak chekhai. Naiawng rakowi maiawngün tawnguat khupma hown ang tuk mang dowi,” pape khai. Naiawng ki tek now aia dow naiawngün tawnguat klüpta khai.40Nami kung kowi dow aia kowh ruapur thing müa raitua dowkla now awchawng kowi cham kowi khai. Now huaklu chah alümpüchow kangowh mih aia cham lüm tanga klüng khai. Naiawngün dow aia cham thing ruapur khe kowh aia uaila reng mih chak pik im kowi aia phangah khai. Now aia kowh iaiba pawla now aia dow Goliat prakowi kowtarü khai bowt.41Now Goliat paw David prakowi uang haimang khai. Goliat kowh kawngma dowk mih dow aia pur kowi rik mang khai.42Goliat dow David prakowi haimü hanow David kowi toah khai. Tawngplawng kowchow panow David dow kow iungma hai apowm klangiungma mih klanguüa tadowklowtchow mih taih tak chekhai.43Now David kowi Goliat tek pe mih, “Tawng en uang tuk pawla müa khai? En nüla ang kui bow?” pakhai. Now aia dow aia kowh thuraiuüa ming hown David kowi peah piati khai.44Nami klen kowi David kowi aia plan tek pe mih, “Uang haimang. Ani dow en kowh nga mih uakling uaber hawmh hai kaurawng uaramchak hawmh kowi ang pe chaah kown,” pakhai.45Nakhowk khe Goliat kowi David tek pe mih, “Ang tut-e en uang mih dow saidawng hai reh ün dowkma chekhai. Nachenganchepaw en tut-e ang uang mih dow en toah reng mih lang kri lang kraing mih CHAKRAMANG, Israel siphaiuüa kowh Thurai ming hown chowtaih.46Ani dow CHAKRAMANG mih ang rut kowi naapta en kown. Ani dow ang nasai en hanow ang nadungta en lu kown. Ani dow Filistin siphaiuüa kowh uak mih uakling uaber hawmh hai kaurawng uaramchak hawmh kowi ang nape chaah kown. Nami khi hanow Israel pren kowi Thurai tawi uowi chekhai pami lusa kowi kowh maru maten natuk bowt kown.47Now CHAKRAMANG dow aia maru-uüa kowi nalawngah kownkow saidawng hai reh lakke dowi chekhai pami ani kowh mami re-e uowi mih maten paw natuk bowt kown. Ani mih aia dow anging rut kowi naap enni kown. Tawngplawng kowchow panow mami tasen dow CHAKRAMANG kowh tasen chekhai,” pape khai.48Now aia kowi nauang senah kownkow Goliat uang haimang thüm khe David paw Goliat prakowi haiiowm khai.49Now aia kowh im hownia iu paw huaklu lowk hanow aia kowh iaiba hown Goliat kau kowi awr ap-ah khai. Nami huaklu dow Goliat kau kowi kowkak hown krowksang Goliat dow tim krum khai.50Nakhowk khe David mih alenma kowiowmah now Goliat ria kowi kowiowng khai. Now Goliat kowh saidawng kawp hownia iu howk saidawng hanow aia mih Goliat kowi dungta pe lu khai. Naiawng hai David mih iaiba hai huaklu lowkchow hown Goliat kowi nowngta khai. Aia rut kowi saidawng uowi dowi chepaw aia dow Goliat kowi nowng kowngta khai. Now amatni kowh tasen lang kiak mih kowng khai bowt mih khita hanow Filistin siphaiuüa dow tarowng powt khai bowt.52Nakhowk khe Israeluüa hai Judauüa mih hekla plala se Gat hai Ekrawn marow tapplawt mowr Filistinuüa kowi kawikrawiah khai. Nakhowk khe Filistin siphai ka arau miuüa hai kowng miuüa uak dow Saraim hownia Gat hai Ekrawn marow mowr patiama rawng takuakla pan khai.53Nami kung kowi dow Israeluüa mih Filistinuüa kowi kawikrawi mih towta hanow Filistin siphaiuüa kowh tangbung khup rah kowi uang paw uanh büah khai.54Akung kowi Goliat kowh lu dow Jerusalem marow kowi David uang pawla khai, now Goliat kowh tasen müa rutchün khawkleng hai tasen tawnguat dow aiamat kowh tangbung kowi David towah khai.55Goliat hown kowtasen kownkow David tarü mih khita now aia kowh siphai aluchow Abner kowi Sawl lüntaah mih, “Abner, paimi klanguüa mia kowh chapa chow?” pakhai.
Now Abner klangah mih, “Mangkri, en ming hown ang takham khowk, paimi klanguüa kowi ang tuk dowi,” pape khai.56Nakhowk khe mang tek pe Abner mih, “Paimi klanguüa mia chapa chünchü krawi paw satang madiah,” pakhai.57Now Goliat kowi kowngta kung kowi David uang plan khe Abner mih David kowi Sawl tut-e kowpawla khai. Nakhowk khe David dow Goliat kowh lu dowkla kawlaw chekhai.58Now David kowi Sawl lüntaah mih, “Klanguüa, mia chapa chow en?” pakhai.
Now David tek pe mih, “Ang dow Bethlehem marow kowi kowh en kowh nar Jese kowh chapa taih,” pape khai.
The Seed Company