1 Samuel11
1Akung kowi Nahas dow kowkowiah now Jabes-Gilead marow tapat lut kowkrawi khup tangbung khai. Nahas dow Amawnuüa mang chekhai, now Jabes-gilead dow Israeluüa kowh marow chekhai. Nakhowk khe Nahas kowi Jabes-gilead marowchakuüa tek pe mih, “A-i tatow laikham diah sik. Nahanow en nimkrüa kowi anging nauowi kown taih,” pakhai.2Nakhowk khe Nahas tek pe mih, “Israel chen maten kowi ang peah rukrai kown ang nau. Naiawng rakowi enni kowh hawmlawm mik mih enni nalaita bowk kown takla. Naiawng che enni chang hanow enni hown ang natatow laikham kown,” pape khai.3Nami laiklow tata now Nahas kowi Jabes-gilead marow kowi kowh lawngtang aluchowuüa tek pe mih, “Naiawng chekhai hanow pe anging akhin ranit nichow diah; Israel pren kowi kowh arah maten kowi anging krawi pe satang tak. Anging krawi pe satang khowk chepaw miapaw uang lawng anging dowi hanow en nimkrüa kowi anging nauowi kown taih,” pakhai.4Nahanow Jabes-gilead marowchakuüa dow Sawl uowi rah Gibeah marow kowi kowphowng satang khai. Nami satang tata hanow Gibeah marowchakuüa dow atün atünma karla sawm khai.5Nami khin khe Sawl dow dowm hownia aia kowh chia hawmh hown uang mang khai. Now marowchakuüa kowi Sawl lüntaah mih, “Tawng chow own? Tawngplawng kowchow maru kawmuüa tuk kar khai?” pakhai. Nakhowk khe amatni dow Jabes-gilead marowchakuüa uang phowngah mih satang Sawl kowi hawt lawp pe khai.6Nami laiklow tata kung kowi Sawl luk kowi dow Thurai kowh lümla uang ting khai, now Sawl dow kunmarau lün pluplup khai bowt.7Aia dow kowpaw chia pre pum hanow tawpta naknak khai. Nami kung kowi dow naiawngün chia nga tawp ia mih krawi chin pe maru hanow Israel pren kowi kowh arah maten kowi krawi saah khai. Now aia krawi pe phuangah mih, “Saul hai Samuel iüah hown tawi tarü tasen dowi mih maru kowh chia dow maiawng naphaw kown,” pakhai. Naiawng hai CHAKRAMANG dow Israeluüa kowi peah kramra khai. Naiawng rakowi amatni dow takrüpah now tawi tarü tasen kownkow uang lawt bowk khai.8Amatni kowi dow Bezek marow kowi Sawl rüaah khai. Nakhowk khe kowh aia kaah mih siphai hawmh dow Juda krungchak hownia nget 30,000 ia chekhai, now akeng mih Israeluüa hownia 300,000 ia chekhai.9Now Jabes-gilead marow hownia kowh uang phowng satang miuüa kowi Sawl tek pe mih, “Kowmang now enni kowh marowchakuüa kowi kowtek pe diah. Tharau sat downg khe anging nauang lawng enni kown,” pape khai. Nami laiklow dow Jabes-gilead marowchakuüa tata now lainowmma awmrawm khai.10Amatni dow Amawnuüa kowh mang Nahas kowi tek pe mih, “Tharau khe enni nimkrüa kowi anging nauowi kown towbowt, enni nau iawng chang anging towbowt,” pakhai.11Now auai ni dow Sawl mih aia kowh maru-uüa kowi changah sum thum khai. Nami kung kowi amatni dow uarthowi dowi rawn Amawnuüa kowh tangbung khupra kowi kowkup büah khai, now nami ni sat downg dowi mowr Amawnuüa kowi krawi saiah büah khai. Amawnuüa pungmadawng kowi kowh nowng plai miuüa dow amaisang kowh cham taset mih lowkkowlowk ka tachet tacham büah dowi chekhai.12Nami kung kowi dow maru kawmuüa uangah now Samuel kowi uang tek pe mih, “A-i luk kowi Sawl naia chowm mang kown nadowi pami amia chow tek? Naiawng tek mih maru-uüa kowi uang sam pawla anging madiah. Anging sam saiah matak,” pakhai.13Nachenganchepaw Sawl klangah mih, “Ani dow Israeluüa kowi CHAKRAMANG lawngah mih ni chekhai. Naiawng rakowi ani dow mia iawng mih maru kowi paw enni naia sai kown nadowi,” pakhai.14Nakhowk khe maru kawmuüa kowi Samuel tek pe mih, “Chu, Gilgal marow kowi a-i kowkowiah now Sawl chowm mang mih laiklow a-i kowphuang iawk diah sik,” pakhai.15Nahanow maru kawmuüa dow Gilgal marow kowi kowkowi khai, now CHAKRAMANG pur kowi Sawl kowi peah mang rah büah khai. Nakowi mih amatni dow CHAKRAMANG vüi taking tasangra uanap pawi chang büah khai, now Sawl hai Israeluüa maten dow lainowmma piaw büah khai.
The Seed Company