1 Manguüa9
1Naiawng hai mang Sawlawmawn dow Thurai chup kim, aia kowh kim hai aia nau iawng nathawpah kown mih maten ki thawpta khai bowt.2Nami kung kowi dow Gibeawn marow kowi aia tut-e CHAKRAMANG uang tatüng pe khe kowh iawng uang plan tatüng pe khai iawk.3Nakhowk khe CHAKRAMANG tek pe mih, “Ang tut-e en uang lü uang leng mih ang ta khowk chekhai. Now en thawpah mih Thurai chup kim dow ang kowh uowi rah pami ang vüi ang chimsaita khowk. Ang kowh mik hai ang kowh sak dow nami kim prakowi atungma nauowi reng kown towbowt.4“Now en che en pa David iawng saktuak saima hai achinawmma hown ang tiama kowi mang khai hanow, now ang kowh ana pek, ari arow hai ari aiang maten chün khai hanow5Israeluüa luk kowi en kowh mang chowm rah mih chowngchowng saksakma anikma ang natow en kown. Mami laiklow lawnguan kowi en pa David tut-e takham se ang tek pe mih, ‘Israel pren mang chowm rah kowi nachowm mang kown mih maru en krungchak hownia mapaw nakhawr kown nadowi,’ pakhai.6“Nachenganchepaw enni lah, enni kowh chauüa lah powtta ang khai, ang kowh ana pek hai ari arow chün dowi, now akeng mih thuraiuüa kowi cham tawi chupiia khai, now amatni pur kowi tawi tabawk khai hanow7enni Israeluüa kowi kowh ang pe enni mih pren hownia ang naprütta enni kown. Now mami Thurai chup kim ang kowh uowi rah ang vüi ang lang klota khowk mih paw ang mik hownia ang namata pe kown. Nakhowk khe dow Israeluüa mih akeng chenchapuüa tut-e kharera hai rensi kau nachowng kown.8Now mami Thurai chup kim mih kawmat kri kraingma chepaw nakhowk khe dow mami ria iawng mang miuüa mih natakrow kown, now khareah se natek kown mih, ‘Tawngplawng kowchow mami pren hai mami Thurai chup kim kimluk kowi naiawng CHAKRAMANG tuk changah khai chow?’ napa kown.9Nakhowk khe akeng mih maru-uüa naklangah kown mih, ‘Naiawng CHAKRAMANG changah mih auan dow amatni pipu-uüa kowi kowh Aigupta pren hownia uang lawtla mih CHAKRAMANG amatni kowh Thurai kowi nuata büah rakowi chekhai. Amatni dow akeng thuraiuüa kowi cham chupiia khai, now amatni pur kowi tawi tabawk khai. Naiawngün piakra amatni luk kowi CHAKRAMANG uang pawla pe mih dow naiawng rakowi chowbowt,’ napape kown,” pakhai.10CHAKRAMANG kowh kim hai aiamat kowh kim mang Sawlawmawn chang mih dow 20 ning chekhai.11Sur pren kowi kowh mang Hiram mih mang Sawlawmawn lakke mowr sidar singh, karpowng singh hai kuh ün peah khai. Naiawng rakowi mang Sawlawmawn mih mang Hiram kowi Galili pren kowi kowh kua peah 20 kua khai.12Now mang Hiram dow naiawngün kua nauang mü kownkow Sur pren hownia uang tarü khai bowt. Nachenganchepaw naiawngün kua uang khita hanow aia dow sak-ih dowi chekhai.13Naiawng rakowi mang Sawlawmawn kowi aia tek pe mih, “Aw tainau, tawng iawng mih kua chowbowt chow en pe ang?” pekhai. Now naiawngün kua ming dow Kabul pren pahai aia chap pe khai. (Kabul pami auan dow “kaah tawngkeng dowi” pami chekhai). Naiawngün kua ming dow kawmat pat naiawng chowreng tak chekhai.14Mang Sawlawmawn kowi Hiram peah mih kuh dow bowkbowk kowi 4,000 set lak-e hu chekhai.15Lup chang miuüa kowi kür hown mang Sawlawmawn pe changah mih dow Thurai chup kim hai aia kowh kim chekhai. Nami klen kowi Jerusalem marow satlawt pra kowh arema mih arah kowi paw aia pe thiaah bawn khai. Now Jerusalem marow tap, Hazawr marow tap, Megido marow tap hai Gezer marow tap paw aia pe thawpah khai.16Nami dowi rawn khe Aigupta pren mang Faraw mih Gezer marow kowpowngta now towkta pe khai, now nakowi kowh uowi mih Kananuüa kowi dow saita bowk khai. Nami apiaknama mih marow dow akung kowi mang Sawlawmawn pawah mih aia kowh chama kowi aiawng krawi peah khai.17Naiawng rakowi mang Sawlawmawn mih Gezer marow dow krawi plan rawah khai. Nami klen kowi aia dow Adak Bet-Hawrawn marow,18Balat marow hai Juda süngrüp süngkangma kowi kowh Tamar marow paw krawi raw khai.19Now chakkham nungra marow maten, kawrnga kari hai kawrnga luk kowi kowh chowm miuüa vüi marow ün aia thawp pe khai. Aia dow Jerusalem, Lebanawn hai aia krüa kowi kowh uowi mih pren maten kowi aia nau thawpah kown mih srui krawi thawpta bowk khai.20Naiawngün lup nachang kownkow kür hown mang Sawlawmawn pe changah lup mih maru-uüa dow Israel chenchapuüa nadowi chekhai. Naiawngün maru-uüa dow Amawruüa, Hituüa, Perizuüa, Hivuüa hai Jebusuüa chekhai. Amatni dow Israeluüa nowng saiah dowi kowh ta sing miuüa chekhai. Amatni dow ani mowr paw chang nar lup büah reng tak chekhai.22Nachenganchepaw Israeluüa kowi tarapdow aia pe changah nar lup dowi chekhai. Nami takcha Israeluüa kowi dow tasen mih siphai, aia kowh maru iuk, aia dak kowi kowh pren kruitown mih, aia kowh siphai aluchow, aia kowh kawrnga kari te mih hai kawrnga luk kowi kowh chowm mih siphai hawmh aia thawpah khai.23Nami klen kowi lup chang miuüa kowi naming nakhet kownkow maru iukuüa 550 ia kowi mang Sawlawmawn peah kurdik khai.24Now mang Sawlawmawn kowh masi Faraw chama dow David marow hownia lawt hanow aia vüi kowi kowh mang Sawlawmawn thawp pe mih kim kowi uang uowi khai bowt. Nami kung kowi dow mang Sawlawmawn mih Jerusalem marow satlawt pra kowh arema mih arah maten kowi krawi thia pe bawn khai.25CHAKRAMANG vüi aia thawpah mih phuchuara kowi mang Sawlawmawn mih tikah mih uanap hai taking tasangra uanap paning kowi sum kat chi chang reng chekhai. Aia dow CHAKRAMANG pur kowi nam iungma mih maikhük paw towkla reng khai . Naiawng hai mang Sawlawmawn mih CHAKRAMANG kowh chup kim ki changta khai bowt.26Nami klen kowi mang Sawlawmawn dow Eziawn-Geber marow kowi mih chawnlawng paw ahuma thawp khai. Nami marow dow Edawm pren kowi kowh sata Rik ria kowi kowh Elawt marow re-e chekhai.27Now mang Sawlawmawn kowh maru-uüa hown chawnlawng kowi nauang pe tawi changah lup kownkow mang Hiram mih chawnlawng te akiakma mih aia kowh maru-uüa kowi uang chin pe sangrum khai.28Amatni bowkbowk dow Ofir pren kowi chawnlawng hown kowkowiah hanow mang Sawlawmawn vüi uang pawla pe kuh 16,000 set ngia khai.
The Seed Company