1 Manguüa10
1Mang Sawlawmawn kowh ming iung nang iung hai aia hownia kowh CHAKRAMANG rowsira tatüng mih laiklow dow Seba pren kowi kowh masiuüa mang mih tawi ta khai. Naiawng rakowi nami masiuüa mang dow Sawlawmawn kowi nauang chaingah kownkow uang khai.2Aia dow maru kawm hai ut hawmh ün uang pawla now Jerusalem marow kowi uang khai. Ut luk kowi dow nam iungma mih chap, kuh hai asung khakma mih hua ahuma aia uang pawla khai. Aia dow mang Sawlawmawn tut-e uang ting hanow aia sak kowi kowh lüntakra uowi mih maten lüntaah khai.3Now Sawlawmawn dow nami masiuüa uang lüntaah mih maten hawt tek pe khai. Aia nowng klangah dowi mih akratma mih tawngpaw uowi dowi chekhai.4Nahanow nami masiuüa mang dow Sawlawmawn chanlaima pami tuk khai bowt. Aia dow Sawlawmawn thawpah mih mang kim paw khi khai.5Nami klen kowi pawitang kowi kowh chakkham ün, aia maru iukuüa kowh uowi rah ün, aia maru-uüa khupah mih tawnguat klangiungma mih ün, aia kowh tui pek mih maru-uüa kowi ün hai CHAKRAMANG kim kowi changla tikah mih uanap mih tawncher hu mih ün paw nami masiuüa mang khila khai. Naiawngün khita hanow aia dow awda khai.6Mang Sawlawmawn kowi aia tek pe mih, “Ang matia pren kowi ang uowi khe kowh en kowh lup hai en kowh chanlaira lawnguan kowi ang ta mih na khai nowm!7Nachenganchepaw makowi uangah khükhü ang mik hown ang uang khi dowi matchang naiawngün lawnguan ang owm dowi chekhai. En lawnguan kowi kowh ang tawi taah mih dow dawnglang khowm uowi dowi tak chekhai. En kowh chanlaira hai dawngthawnguan dow maru uang tek ang mih lak-e lang hu chekhai.8En kowh maru iukuüa dow lainowmma kaucha iuk! Tawngplawng kowchow panow amatni dow en pur kowi uowi reng hai en kowh chanlaira laiklow ta reng chekhai.9CHAKRAMANG en kowh Thurai dow akiow pauowi lah. Aia dow awmrawm en kowh Israel kowi kowh mang chowm rah kowi pe chowm en khai. Aia dow Israeluüa kowi chowngchowng saksakma sakrauah reng rakowi tara nowm hai achinawmma nauowila reng kownkow thawp en mang mih chekhai,” pakhai.10Seba mang mih mang Sawlawmawn kowi kuh 4,000 set lak-e hu, nam iungma mih chap hai asung khakma mih hua ün ahuma peah khai. Nam iungma mih chap mang Sawlawmawn kowi Seba mang peah mih khowt pren kowi katpaw uang ting dowi bowt chekhai.11(Nami klen kowi Hiram kowh chawnlawngün dow Ofir hownia kuh ün uang pawla pe khai. Now almuk singh ahuma hai asung khakma mih hua ün paw uang pawla khai.12Mang Sawlawmawn dow naiawngün almuk singh mih CHAKRAMANG kim hai mang kim vüi changla achüng khai, now meng sarauüa vüi tingteng hai taraw paw aia thawpla khai. Naiawng khowt mih almuk singh hu dow ani mowr kowi katpaw pren kowi uang pawla dowi tak chekhai, khi paw khi dowi tak chekhai).13Mang Sawlawmawn mih masiuüa mang Seba lüah mih maten pe pe khai. Nami klen kowi aia tut-e kowh uang miuüa kowi hawt peah reng mih awmrawm sung paw nami masiuüa kowi aia peah khai. Nami kung kowi dow masiuüa mang mih aia kowh maru-uüa hown aiamat pren kowi mang khai bowt.14Ning towng mang Sawlawmawn tut-e kuh uang ting reng mih dow 25,000 set ngia chi chekhai.15Nami klen kowi kun chang miuüa, Arab pren manguüa hai Israel pren kowi kowh kruitown miuüa hownia paw mangmu uang ting reng chekhai.16Mang Sawlawmawn mih phengah mih kuh hown kawngma aiukma mih 200 klüng hai achachow mih 300 klüng thawpla khai. Naiawngün aiukma mih kawngma lowk kowi kuh lakke mih dow raiat set ngia chi, now kawngma achachow mih kowi dow lowk kowi pre set ngia chi chekhai. Naiawngün dow Lebanawn Kaurawng Kim kowi aia towah khai.18Akung kowi mang Sawlawmawn mih ngasai sa hown mang chowm rah aiukma mih thawp lowk khai, now nami mang chowm rah dow kuh achangma mih hown sowah khai.19Nami mang chowm rah dow apün müa abowk uowi taruk bowk chekhai. Naiawngün abowk towng mapra ret lowk paipra ret lowk chi krangsi rup uowi laipre buk chekhai. Nami mang chowm rah kung pra kowh tane müa aluk prakowi dow uilumma chekhai. Now chowm rah hawmlawm pra hai lakuai prakowi dow bawng tangra uowi chekhai, now bawng tangra ria kowi dow krangsi rup iowng dawnglawng chekhai. Naiawng mih mang chowm rah dow akeng pren kowi miapaw thawp dowi chekhai.21Sawlawmawn kowh tui kham bia dow kuh hown kowh thawpah mih kangowh chekhai. Now Lebanawn Kaurawng Kim kowi kowh pu bia aikam paw achangma mih kuh hown kowh thawpah mih kangowh chekhai. Mang Sawlawmawn chowm mang mih khin khe dow tai mih mapaw asung uowi dowi. Naiawng rakowi aia kowh dow tai hown kowh thawpah mih uanh tawngpaw uowi dowi chekhai.22Mang Sawlawmawn kowh chawnlawng paw cham tawi chang kun kownkow mang Hiram kowh chawnlawng hown cham tawi kowi reng chekhai. Naiawngün chawnlawng dow sum ning e pakat chi uang plan hanow kuh, tai, ngasai sa, iuk hai uahaw ün uang pawla reng chekhai.23Naiawng rakowi mang Sawlawmawn dow lusa kowi kowh akeng mih manguüa maten lak-e lang kureng hai lang chanlai chekhai.24Sawlawmawn kowi kowh Thurai peah mih chanlaira hownia kowh laiklow nauang tawi sünta kownkow pren maten hownia maru uang reng chekhai.25Uang miuüa maten dow kuh uanh tai uanh, khupdip tawngklai, rutchün khawkleng, nam iungma mih chap, kawrnga hai kawrngaramchük ün mang Sawlawmawn vüi uang pawla pe reng chekhai. Aia dow naiawng ning towng hawt ka reng chekhai.26Naiawng hai Sawlawmawn dow kawrnga kari hai kawrnga mih ahuma kramta khai. Aia kowh kawrnga kari kawm dow 1,400 klüng, now kawrnga kawm dow 12,000 pum chekhai. Naiawngün pungmadawng kowi tawngbak mih kowi dow kawrnga kari towk rah marow kowi aia towah khai, now tawngbak mih kowi dow aia uowi rah Jerusalem marow kowi aia towah khai.27Mang Sawlawmawn chowm mang mih khin khe Jerusalem marow kowi kowh tai hu krang dow hua iawng towbowt, now sidar sing hu krang paw awkaw kowi kowh uidut singh iawng towbowt.28Mang Sawlawmawn kowh kawrnga dow Aigupta pren hai Kilikia marow hownia kowh uang pawla mih chekhai. Mang kowh kun chang miuüa naiawngün dow Kilikia hownia kowh uang ranla mih chekhai.29Aigupta pren hownia kowh uang ranla mih kawrnga hai kawrnga kari sung dow lowk kowi tai raiat set ngia chi chekhai. Naiawngün kawrnga hai kawrnga kari dow kun chang miuüa mih Hituüa hai Siriauüa kowh manguüa tut-e cham sumah reng chekhai.
The Seed Company