1 Manguüa8
1Now Thurai chup kim kowi kowh uanh ki thawpta bowk kung kowi dow Mang Sawlawmawn mih David marow (Zaiawn) kowi kowh towah mih sangbowk laitawm tawkpla Thurai chup kim kowi nauang pawla kownkow kamrüt khai. Aia dow Israel lawngtang aluchowuüa hai Israel krungchak kowi kowh aluchowuüa kowi Jerusalem marow kowi kuaah lawmah khai.2Nami khin khe Israeluüa dow nasun Te Pawi kownkow nakowi uowi khai. Nami akhin dow Ethanim pami la ranit la khe chekhai.3Now aluchowuüa maten uang taküm kung kowi dow uamowuüa hai Leviuüa mih sangbowk laitawm tawkpla, taklowp taklangra te hai chimsaima mih uanh maten Thurai chup kim kowi kowpawla khai bowt.5Now mang Sawlawmawn hai aia hown kowh tawi mih maru kawmuüa maten dow sangbowk laitawm tawkpla pur kowi chia hai ruapur ahuma phuchua khai. Amatni changla phuchua mih chia hai ruapur dow hu lai kowh nowng rüaah dowi chekhai.6Nami kung kowi dow sangbowk laitawm tawkpla mih Thurai chup kim lak kowi kowh Lang Chimsai Mih Towklak kowi uamowuüa uang pawla khai, now nami dow Cherup rup kowh lap krüa kowi towah büah khai.7Nahanow nami sangbowk laitawm tawkpla hai akawtlawng maten dow Cherup rup kowh lap hown tatung bowk khai.8Naiawngün akawtlawng dow klang lai rakowi naiawngün chem dow Thurai chup kim kowi kowh chimsaima mih towklak hownia ia khi khai. Nachenganchepaw chimsaima mih towklak uat hownia dow ia khi dowi chekhai. (Nami sangbowk laitawm tawkpla dow akawtlawng hailawm kawmat pat nami Thurai chup kim lak kowi uowi reng chekhai).9Nami sangbowk laitawm tawkpla lak kowi dow Mosi towah mih sangbowk laitawm huapher pre buk klen kowi tawngpaw uowi dowi chekhai. Nami sangbowk laitawm huapher dow Aigupta pren hownia Israeluüa uang lawt kung kowi Sinai hungh re-e uowi khe amatni kowi CHAKRAMANG peah mih chekhai.10Now chimsaima mih towklak hownia uamowuüa uang lawt kung kowi dow Thurai chup kim lak kowi mih uangnim atekma uang uowi khai.11Now naiawng hai CHAKRAMANG kowh kraingra dow Thurai chup kim lak kowi uangnim iawng atekma chekhai. Naiawng rakowi uamowuüa mih tawng lup paw nowng chang dowi bowt.12Nakhowk khe Sawlawmawn tek mih, “Aw CHAKRAMANG, ‘Uangnim atatma mih kowi ang uowi kown,’ padow en tek khai.13Kawmat dow en vüi kim klangiungma ang thawpta en lowk khowk. Mami kim dow chowngchowng saksakma en vüi uowi rah naown bowt kown,” pakhai.14Naiawng ki tek kung kowi dow mang Sawlawmawn mih aia ria kowi kowh iowng rimrim mih maru kawmuüa prakowi haitaplan hanow peah prasi khai.15Nami kung kowi dow aia tek mih, “CHAKRAMANG Israeluüa kowh Thurai dow akiow pauowi lah. Aia dow apa David tut-e kowh aiamat nawr hown takhamta mih uang pe tachiah khai bowt. Aia dow tek mih,16‘Aigupta pren hownia uang lawtla kung kowi nachupiiala ang kownkow ang kowh chup kim thawp rah Israeluüa pungmadawng hownia mia iawng mih krungchakuüa kowh marow paw ang ruiah dowi chekhai. Nachenganchepaw ang kowh maru Israeluüa kowi nakruitownah kownkow David kowi ang kloah khai,’ pakhai.17“CHAKRAMANG Israeluüa kowh Thurai vüi nathawp pe chup kim lowk kownkow apa David kowh sak kowi uowi chowdiah.18Nachenganchepaw apa David kowi CHAKRAMANG tek pe mih, ‘Ang vüi nathawp ang chup kim lowk kown en sak kowi uowi mih iung.19Tawkchedow ang vüi chup kim mih en nathawp kown nadowi; en matia kowh chapa chowtaih nathawp kown. Ang vüi chup kim dow aia chowtaih nathawp kown,’ pape khai.20“CHAKRAMANG dow aia kowh laikham uang pe tachiah khai bowt. Aia dow apa kowh mang rah pe ang khai, now CHAKRAMANG kowh laikham iawng Israel pren mang chowm rah kowi dow ang chowm khai bowt. Now CHAKRAMANG Israeluüa kowh Thurai vüi mami chup kim dow ang thawp pe khai.21Now nami chup kim kowi dow sangbowk laitawm tawkpla towk rah ang thawp pe khai. Nami sangbowk laitawm tawkpla lak kowi dow CHAKRAMANG kowh sangbowk laitawm laiklow uowi mih huapher uowi chekhai. Nami sangbowk laitawm dow Aigupta pren hownia uang lawtla kung kowi a-i kowh pipu-uüa hown aia tatowah mih chekhai,” pakhai.22Nami kung kowi dow mang Sawlawmawn mih nakowi kowh takua talawm mih Israeluüa pur kowi CHAKRAMANG kowh phuchuara re-e iowng pah mukuang prakowi chawkla rut se chup Thurai khai.23Aia tek mih, “Aw CHAKRAMANG Israeluüa kowh Thurai, krawng hai mukuang kowi en iawng mih Thurai miapaw uowi dowi bowt chekhai. En dow en kowh sangbowk laitawm en townah reng chekhai. En dow plawng hown sak hown en tiama kowi mang mih en kowh naruüa luk kowi en kowh sakraura achur uowi dowi mih en tüng pe reng chekhai.24En kowh nar apa David tut-e kowh en takhamta mih en uang pe tachiah khai. En dow nawr hown kowh en tekta mih iawng en chang mih ani anging khi khai bowt.25“Kawmat mih aw CHAKRAMANG Israeluüa kowh Thurai, apa David tut-e kowh en takhamta mih townah reng diah. Apa David kowi en khamah mih, ‘En kowh chapauüa che en iawng ang kowh ari aiang kowi uowi iawng mang hai pe ching khai hanow Israel pren mang chowm rah kowi nachowm kown mih en krungchak hownia maru nakhawr kown nadowi,’ pakhai.26Aw Israeluüa kowh Thurai, en kowh nar apa David tut-e kowh en takhamta mih pauang tachi lah.27“Nachenganchepaw aw Thurai, lusa kowi en nauowi nowm kown bow? Kuang dawng hai mukuang pren kowi khowm padow en uowi rah takowi dowi mih tawng iawng chow ang thawp en mih mami kim kowi en natakowi kown chow?28Nachenganchepaw aw CHAKRAMANG ang kowh Thurai, ani kowh en kowh nar awr lü awr leng mih hawt sünta pe diah.29Mami en kowh chup kim prakowi ni chut uar prowt chi uang iu müah reng diah. Tawngplawng kowchow panow mami arah dow nachupiiala en kownkow en lang kloah mih chekhai. Naiawng rakowi mami en kowh chup kim prakowi dang se ang uang lü mih khin khe hawt sünta ang diah.30Mami arah prakowi dang se en kowh nar hai en kowh maru Israeluüa uang lü uang leng mih khin khe hawt sünta anging diah. Naiawng uang lü uang leng mih dow en uowi rah mukuang pren hownia hawt sünta anging diah, now anging kowh angak dow lawtta anging diah.31“Aprek uowi dowi mih maru luk kowi maru tang pe aprek mih khin uowi chepaw naia. Nami khin khe nami maru mih aia kowh aprek uowi dowi mih sawi natakham kownkow mami en kowh chup kim re-e phuchuara ria kowi uang chepaw naia.32Nakhowk khe en mih mukuang pren hownia nami maru kowh laiklow hawt sünta pe diah, now chet pe tara nowm diah. Chang ngak mih maru kowi dow aia kowh angak sung peah ripra diah, now chang angak dowi mih maru kowi dow aia kowh angak uowi dowi mih phuang pe diah.33“En kowi kingküala mih angak changta rakowi en kowh maru Israeluüa mih ransu-uüa tut-e tasen sum khe amatni che en tut-e uang plan hai mami en kowh chup kim kowi rowsi en hai en tut-e uang lü uang leng khai hanow34nakhowk khe amatni awr lü awr leng mih mukuang pren hownia hawt sünta pe diah, now en kowh maru Israeluüa kowi amatni kowh angak lawtta pe hanow amatni pipu-uüa kowi en peah mih pren kowi uang plan pawla iawk diah.35“En kowh maru-uüa mih en kowi kingküala mih angak changta rakowi mukuang hownia en peah uang dowi mih khin khe amatni che mami en kowh chup kim prakowi uang dang khai, rowsi en khai, en tut-e awr lü awr leng khai, now en hownia ka ripra kowh angak hownia uang plan büah khai hanow36amatni awr lü awr leng mih mukuang pren hownia en hawt sünta pe diah, now en kowh nar Israeluüa kowh angak lawtta pe diah. Amatni kowi dow chownglawng kowi anowmma naia mangla kownkow tüngsangah diah, now nachangla dawngthawnguan kownkow amatni kowi en peah mih pren luk kowi uang uang pe uangah diah.37“Pren kowi che khown hai kowng hawi uang kla khai, luprak keula mih rawka phaw khai, luprak kowi plawng hai tuiselengkeng nammow hawmh krawi cha khai, amatni kowh tawngbak mih marow kowi chünchü ransu-uüa uang rumah khai, lowra mih phih hai rawka uang ting khai chepaw38en kowh maru Israeluüa mih nami khin khe tarip kowh sak kowi rauma hown mami en kowh chup kim prakowi chawk rut se awr lü awr leng khai hanow39nami dow en kowh uowi rah mukuang pren hownia hawt sünta pe diah. Amatni kowi dow en mih lawtta diah. Amatni kowi dow amatni changah mih lup iawng chet pe tara diah. (Tawngplawng kowchow panow maru maten kowh sak kowi tawng chow uowi mih tuk mih dow en chowtaih chekhai).40Nahanow anging pipu-uüa kowi en peah mih pren kowi chownglawng prat en kowh maru-uüa nakram en kown towbowt.41“Nami klen kowi prenlang maru-uüa paw en kowh ming kri kraingma mih hai en kowh akürma mih rut hown en kowh ransu-uüa kowi en ripah mih laiklow tawi ta chepaw naia. Nahanow nachupiia en kownkow pren lakma hownia uangah now mami en kowh chup kim prakowi dang se naawr lü naawr leng chepaw naia.43Nakhowk khe en kowh uowi rah mukuang pren hownia en mih hawt sünta pe diah. Lusa kowi kowh maru maten naia tukla en kownkow, en kowh maru Israeluüa iawng amatni paw ringkawma hown nakram en kownkow hai ang thawpah mih mami kim dow en kowh kim chekhai pami naia tukla kownkow amatni awr lü mih iawng chang pe diah.44“Ransu-uüa hown nacham tasen kownkow en maru-uüa kowi en cham chinah mih khin uowi chepaw naia. Nakhowk khe amatni cham uowi rah hownia en lang kloah mih marow prakowi hai en vüi kowi kowh ang thawpah mih en kowh chup kim prakowi dang se awr lü awr leng büah chepaw naia.45Nakhowk khe amatni awr lü awr leng mih dow mukuang pren hownia hawt sünta pe diah, now amatni kowi tawi tangila diah.46“Chang angak dowi mih maru dow miapaw uowi dowi chekhai. Naiawng rakowi en kowh maru-uüa changta angak mih khin khe amatni luk kowi en sak-ih dowi kowh ransu-uüa rut kowi en nacham ap-ah chepaw naia, now amatni kowi dow atawnchow rah kowi lah, alakma rah kowi lah nachangla nar kownkow ransu-uüa nacham pawla chepaw naia.47Now amatni cham takhangra pren kowi tarip kowh, ‘Anging changta angak khai, anging tawita mata khai bowt,’ pahai en tut-e awr taphuang chepaw naia.48Now nami pren kowi plawng hown sak hown en prakowi uang dang hai amatni pipu-uüa kowi en peah mih pren pra, en lang kloah mih marow pra, en vüi kowi kowh ang thawpah mih chup kim prakowi dang se en tut-e awr lü awr leng büah chepaw naia.49Nakhowk khe en uowi rah mukuang pren hownia amatni awr lü mih dow hawt sünta pe diah,50en kowi kingküala mih angak changta mih en kowh maru-uüa kowi lawtta diah. Amatni kowi khümla mih maru-uüa kowi dow amatni kowi nasanaah kownkow peah saktuak diah.51Tawngplawng kowchow panow Israeluüa dow en kowh maru chowtaih. Amatni dow Aigupta pren hownia kowh en uang lawtla mih en kowh dawngthawnguan chekhai. Amatni kowi dow chawrla lawngha mih khuang maih hownia kowh uang lawt mih iawng en uang lawtla mih chekhai.52“En kowh nar hai en kowh maru Israeluüa uang lü uang leng hai kar se uang lü khowng khe hawt sünta anging diah.53Aw CHAKRAMANG Thurai, anging kowh pipu-uüa kowi Aigupta pren hownia en uang lawtla khe en kowh nar Mosi hownia mami laiklow en phuangah khai: Ang matia kowh dawngthawnguan nachowng kownkow lusa kowi kowh chenchap maten hownia Israeluüa kowi ang lang klota khowk chekhai,” pakhai.54Naiawng hai mang Sawlawmawn mih tua kung now mukuang prakowi chawk rut se CHAKRAMANG tut-e awr lü awr tek kung kowi dow CHAKRAMANG kowh phuchuara pur hownia awr rü khai bowt.55Aia dow awr rü hanow aia ria kowi kowh takua talawm mih Israeluüa maten kowi maiawng hai atünma peah prasi khai:56“Aia kowh laikham iawng aia kowh maru Israeluüa kowi pe tanaiah mih CHAKRAMANG dow akiow pauowi lah. Aia dow nape anging iungra kownkow aia kowh nar Mosi tut-e kowh takhamta mih lai maten uang pe tachiah bowk khai.57A-i kowh pipu-uüa hown tawi uowi reng iawng CHAKRAMANG a-i kowh Thurai dow a-i tut-e paw pacham tawi uowi reng lah; aia dow tawng khe paw hang pacham powtta a-i lah.58Aia kowh tiama kowi nanowng mangla kownkow hai a-i pipu-uüa tut-e kowh aia peah mih ari aiang hai rirow maten a-i nanowng chünla kownkow aia dow pacham khowng a-i lah.59Aia dow ang awr lü awr leng mih laiklow maten ni-ni uar-uar sak kowi pacham towah reng lah. Aia kowh maru Israeluüa hai amatni kowh mang kowi pacham tangila reng lah, now ni towng kowh amatni lakke mih iawng aia pacham peah reng lah.60Nahanow CHAKRAMANG chowtaih Thurai, aia klen kowi akeng mih thuraiuüa uowi dowi bowt pami lusa kowi kowh maru maten natuk kown towbowt.61CHAKRAMANG kowh rirow hai ana pek nachün kownkow enni kowh saktuak maten CHAKRAMANG prakowi ani kowh uowi iawng pur prakowi paw pacham uowi reng lah,” pakhai.62Nami kung kowi dow mang Sawlawmawn hai aia hown kowh Israeluüa maten CHAKRAMANG pur kowi chang phuchua pawi khai.63Nami khin khe mang Sawlawmawn mih chia 22,000 pum hai ruapur 120,000 pum hown taking tasangra uanap pawi chang khai. Naiawng Thurai chup kim dow mang Sawlawmawn hai Israeluüa maten ap-ah khai.64Ap Thurai chup kim mih ni khe mang Sawlawmawn mih Thurai chup kim pur kowi kowh kimpuk dawnglang kowi CHAKRAMANG vüi chimsaiah parah khai. Nami aia lang kraah mih arah kowi aia dow tikah mih uanap hai kawmdi uanap chang pe khai, now taking tasangra uanap kowi kowh tawncher sau dow changla phuchua müa khai. Tawngplawng kowchow panow CHAKRAMANG pur kowi kowh uowi mih kri hown kowh phuchuara dow naiawngün phuchua maten nachang kownkow arah sowmchow chekhai.65Naiawng hai mang Sawlawmawn mih aia hown kowh uowi mih Israeluüa maten hown nami khin khe CHAKRAMANG a-i kowh Thurai pur kowi laitali ni mowr chang pawi khai: Ranit ni mowr dow phuchuara ap pawi, now akeng mih ranit ni mowr dow Te Pawi chekhai. Nakhowk khe amatni dow maru iun lainowmma kawm khai; amatni dow Hamat süng hownia Aigupta pren kowi kowh tui kangma mih aw mowr süng maten hownia kowh uang mih chekhai.66Now pawi chur kowh auai ni dow mang Sawlawmawn mih maru maten kowi pe mangta khai bowt. Anar David kowi hai aia kowh maru Israeluüa luk kowi CHAKRAMANG peah iungra mih maten rakowi maru maten mang Sawlawmawn kowi tekla pe awmrawm lai now awmrawmma hai apiawma kim prakowi mang büah khai bowt.
The Seed Company