1 Manguüa7
1Mang Sawlawmawn mih aiamat vüi thawp chawkku kim sangrum khai. Naiawngün kim aia chang mih dow laisum ning lakke khai.2Naiawngün chawkku kim pungmadawng kowi aia dow Lebanawn Kaurawng Kim pami kim thawpla lowk khai. Nami Lebanawn Kaurawng Kim dow aklang 100 muk, aphia 50 muk, now akro 30 muk aia thawpah khai. Nami kim vüi dow sidar singh hown kowh kimchüng aia phük pe sum tan khai. Naiawngün kimchüng dow bowkbowk kowi 45 klüng chekhai, now naiawngün kimchüng luk kowi dow aia tang pe klowng khai. Naiawngün klowng luk kowi dow sidar sing phen hown aia lukah khai.4Now nami kim kowi kowh kimbang kowi dow mapra reng hown paipra reng tatingtang klowk chi aia thawp pe tawngpawk sum tan khai.5Now kimbüng hai kimplawt mawm maten dow tali tingnui chi aia thawpah khai. Now tawngpawk maten dow sum tan trui tatingtang klowk chi aia thawpah khai.6Nami klen kowi Achüng pami kim paw aia thawpla lowk khai. Nami kim dow areng klang 50 muk, now adowng phia 30 muk chekhai. Nami kim downg kowi dow aia towla pe kimpuk khai, now nami kimpuk dow kimchüng luk kowi khia pe klowng hanow aia lukah khai.7Nami klen kowi Tara chetra Towk paw aia thawpla lowk khai. Nami towklak kowi dow aia kowh mang chowm rah uowi chekhai. Nami towk dow nachetla tara kownkow aia thawpah mih chekhai. Nami towk dow aphai hownia aluk mowr sidar singh phen hown aia krawi pingta bowk khai.8Nami Tara chetra Towk khung pra dow viadawng uowi lowk chekhai. Aiamat uowi rah kim dow nami viadawng ria kowi aia thawpah khai. Nami kim dow akeng mih kim powm iawng aia thawpah khai. Nami klen kowi aia kowh masi Faraw kowh chama vüi paw akeng mih kim powm iawng aia thawpla lowk khai.9Mang Sawlawmawn kowh kim dow viadawng hailawm achüng hownia aluk mowr mih arisang ngenah mih asung khakma kangowh mih hua hown thawpah mih chekhai. Naiawngün hua maten dow sawksak hown arisang ngenah mih kangowh chekhai.10Nami kim kowi kowh achüng maten dow asung khakma mih hua aiuk aiukma mih kangowh hown thawpah mih chekhai. Naiawngün hua mih tawngbak mih dow aiuk hamüt muk chi, now tawngbak mih dow aiuk raiat muk chi chekhai.11Now achüng kowi kowh hua luk kowi paw arisang ngenah mih hua asung khakma kangowh mih hai sidar singh phen tow pe khai.12Mang kim re-e kowh viadawng lang iuk mih ping tapat lut mih kowi dow klangiungma ngenah mih hua atanma krowngah mih sum krowng luk kowi lowk chi tang pe sidar singh hown kowh klowng khai. Nami viadawng ping dow Thurai chup kim lak kowi kowh viadawng hai kimpuk kowi kowh viadawng iawng thawpah khai.13Tura marow kowi Hiram pami maru uowi lowk ia. Aia dow kri hown achap kawm lup tuk chang chekhai. Aia kowh pa dow kowng khai bowt. Nachenganchepaw aia kowh u dow sing reng tak chekhai. Aia kowh u dow Naptali krungchak masiuüa chekhai. Now Thurai chup kim kowi natawngah kown mih uanh kri hown nauang thawp kownkow akat khe Hiram kowi mang Sawlawmawn hawah khai. Naiawng rakowi Hiram dow Tura marow hownia Jerusalem kowi uang khai, now aia kowi kowh mang Sawlawmawn pe changah mih lup maten uang chang khai bowt.15Jerusalem marow kowi uangah now Hiram mih kri hown thawp kimchüng pre buk khai. Nami kimchüng pre buk trui dow aklang lairiat muk chi, now aiuk sum lam chi chekhai.16Now nami kimchüng luk kowi nachowmah kown mih kri hown aia thawp pe alu pre buk khai. Nami alu pre buk mih dow akro tanga muk chi chekhai.17Now nami kimchüng lu pre buk vüi klangiungma aia ker pe kri leng ranit klüng chi khai, now kri hown thawp pe dalim uih pre tan chi khai.19Nami kimpuk kowi kowh kimchüng lu pre buk mih aluk pra tali muk chi dow lili pau powm iawng chekhai.20Now nami alu dak pra dow alumpuma kangowh chekhai. Nami alumpuma mih kowi dow tapat lut kri leng krawi umh pe khai. Nami alu pre buk trui kowi kowh kri leng tapat lut mih kowi dow atanma krawi tan pe kri hown kowh dalim uih rup 200 khai.21Now nami kimchüng pre buk mih dow Thurai chup kim kimpuk re-e Hiram chowkah khai. Mrawkphak pra kowh aia chowkah mih kimchüng ming dow Jachin pahai aia chap pe khai, now tawngphak pra aia chowkah mih kimchüng ming dow Boaz pahai aia chap pe khai. (Jachin pami auan dow “Achowk miia” pami chekhai, now Boaz pami auan dow “Aia tut-e kür uowi” pami chekhai).22Lili pau powm iawng kri hown thawpah mih alu pre buk dow kimchüng pre buk mih luk kowi chowmah khai. Naiawng hai kimchüng pre buk dow aia ki thawpta khai bowt.23Nami kung kowi dow natowla tui kownkow Hiram mih klai pe kri mih tuipam aiukma thawp lowk khai. Nami tuipam dow mami uer hownia atengma paimi uer mowr khaiah hanow hamüt muk chekhai. Abüp dow tanga muk, now aiuk dow 30 muk chekhai.24Nami tuipam uat pra dow auer dakchow kowi tapat lut kri hown kowh thawpah mih uih rup uowi pre tan chekhai. Naiawngün uih rup dow pamuk e taruk klüng ngia chi thawpah khai. Naiawngün uih rup dow klaiah khe hownia aiawng uowi mih chekhai.25Now nami tuipam dow kri hown kowh thawpah mih chiala laipre pum mih luk kowi chowmah khai. Naiawngün chiala dow tawngphak pra dang sum pum, satkup pra dang sum pum, mrawkphak pra dang sum pum, now satlawt pra dang sum pum chekhai.26Nami tuipam tat dow tali met chekhai. Nami tuipam mowr dow bia chah mowr iawng chekhai, now lili pau powm iawng uat prakowi awr talown khai. Nami tuipam kowi tui takowi mih dow 44,000 set chekhai.27Nami klen kowi paw Hiram mih kri hown thawp tawkpla hamüt klüng khai. Naiawngün tawkpla dow areng klang tali muk chi, adowng phia tali muk chi, now akro sum muk chi chekhai.28Nami tawkpla dow tavir lut akuang akuangchow thawpah hanow kri apherklepchow mih hown akuang towng krawi pingah khai.29Nami pingla tawkpla mih kripa luk kowi dow herah mih krangsi rup, chia rup hai Cherup rup uowi chekhai, now krangsi rup hai chia rup luk kowi hai adak kowi dow her pe pau rup khai.30Naiawngün tawkpla maten kowi dow alün müa kri khawk tali klüng chi thawp pe khai. Now aluk pra dow biatum chowm müa lawngken kowi anui tali klüng hownia chawp pe athawk khai. Naiawngün athawk maten kowi dow tali dam trui kowi her pe pau rup bowk khai.31Naiawngün biatum chowm müa lawngken dow adawnglang kowi akuangma kangowh chekhai. Nami akuang uar dow mami ret hownia paimi ret mowr kowi amuk hown dawnglang chi chekhai. Nami lawngken uer dow tapat lut sawt pe bawng khai. Naiawngün lawngken kro dow tawkpla luk kowi pamuk chi chekhai. Naiawngün tawkpla dow alumpuma nadowi kowi tali tingnui chi chekhai.32Naiawngün tawkpla kowi adak pra dow alün müa khawk uowi tali klüng chi chekhai. Naiawngün khawk kowi kowh ahawng dow klai tawkpla khe klaila mih chekhai. Naiawngün khawk maten dow aiuk amuk hown dawnglang chi chekhai.33Naiawngün khawk dow kawrnga kari khawk iawng kangowh chekhai. Naiawngün akhawk kowi kowh uowi mih uanh maten dow kri hown kowh sowah mih kangowh chekhai.34Tawkpla maten kowi dow tali tingnui kowi athawk uowi tali klüng chi chekhai. Naiawngün athawk paw klai tawkpla khe kowh klaila mih chekhai.35Now tawkpla luk maten kowi dow aluk prakowi akro pakar chi mih kri hown kowh thawpah mih lawngkua uowi lowk chi chekhai.36Naiawngün lawngkua thawk maten kowi dow uat prakowi Cherup rup, krangsi rup hai chekmarawng singh rup her pe khai. Naiawngün dow tawkpla akuangma mih kowi kowh pingla mih kripa kowi iawng her pe arup khai.37Naiawng hai Hiram mih tawkpla hamüt klüng thawpah khai. Naiawngün tawkpla maten dow aiuk hai apowm katsang aia thawpah khai.38Now naiawngün tawkpla maten vüi dow kri hown aia thawp pe biatum hamüt klüng khai. Nami tuipam dow mami uer hownia atengma paimi uer mowr khaiah hanow tali muk chekhai, now biatum lowk kowi tui takowi mih dow 880 set chi chekhai.39Now tawkpla hamüt klüng mih dow Thurai chup kim mrawkphak prakowi tanga klüng, tawngphak prakowi tanga klüng aia towah khai. Now mrawkphak hai satlawt pra kowh nui kowi dow tuipam aiukma mih aia towah khai.40Nami klen kowi paw maivia towk rah puh ün, uaibak ün hai bia ün aia thawpla khai. Naiawng hai Hiram mih mang Sawlawmawn vüi Thurai chup kim kowi kowh lup maten uownah mih dow churta khai bowt.41Hiram thawpah mih uanh dow kimchüng pre buk, kimchüng luk kowi kowh chowmah mih alumpuma mih alu pre buk, alu pre buk mih kowi kowh umah mih kri leng pre rüa,42naiawngün kri leng kowi natanah pre tan kown mih dalim uih 400 klüng,43tawkpla hamüt klüng, tawkpla luk kowi kowh chowmah kown mih biatum hamüt klüng,44tuipam aiukma mih lowk, tuipam aiukma mih chowm müa kri hown kowh chiala laipre pum,45plawi kuak müa puh, plawi vür müa uaibak hai tui thet müa bia chah ün chekhai.
Thurai chup kim vüi kowi kowh Hiram thawpah mih uanh maten dow sowah mih kri hown kowh kangowh chekhai. Naiawngün uanh maten dow mang Sawlawmawn ana pek iawng Hiram thawpah mih kangowh chekhai.46Naiawngün uanh maten dow Jawrdan lawngrawi re-e kowh Sukawt hai Jerethan marow takra kowi bawnnai kowi klai pe kri kowh mang Sawlawmawn pe thawpah mih kangowh chekhai.47Naiawngün uanh dow hu lai bowt kowh mang Sawlawmawn khaiah dowi bowt chekhai. Naiawng rakowi naiawngün kri uanh dow mün khowt chow adik uowi mih tukah dowi chekhai.48Thurai chup kim vüi kowi kowh mang Sawlawmawn thawpah mih uanh dow kuh hown kowh phuchuara, chimsaima mih kawm towk rah kuh hown kowh pawitang,49kuh achangma mih hown kowh thawpah mih maibu towngh ün chekhai. Naiawngün maibu towngh dow lang chimsai mih arah pur kowi hawmlawm pra tanga klüng, now lakuai pra tanga klüng aia towah khai. Nami klen kowi kuh hown kowh thawpah mih pau, bia hai kep,50kuh achangma mih hown kowh thawpah mih bia chah, bawthi kep müa kaingkep, nam iungma mih maikhük towk müa biatum, uaibak hai mairing towk müa puh ün aia thawpah khai. Nami klen kowi Lang Chimsai Mih Towklak hai Thurai chup kim kowi kowh towklak lang iuk mih kimplawt klia müa kuh hown kowh akli ün thawpah khai.51Naiawng hai mang Sawlawmawn mih Thurai chup kim kowi kowh lup maten ki changta khai bowt. Nami kung kowi dow aia mih CHAKRAMANG vüi a-pa David lang kraah mih uanh maten Thurai chup kim kowi uang pawla khai. Naiawngün a-pa David lang kraah mih uanh dow kuh, tai hai achap kawm uanh chekhai. Naiawngün uanh maten dow aia mih Thurai chup kim kowi kowh dawngthawnguan towk rah kowi aia towah khai.
Thurai chup kim vüi kowi kowh Hiram thawpah mih uanh maten dow sowah mih kri hown kowh kangowh chekhai. Naiawngün uanh maten dow mang Sawlawmawn ana pek iawng Hiram thawpah mih kangowh chekhai.46Naiawngün uanh maten dow Jawrdan lawngrawi re-e kowh Sukawt hai Jerethan marow takra kowi bawnnai kowi klai pe kri kowh mang Sawlawmawn pe thawpah mih kangowh chekhai.47Naiawngün uanh dow hu lai bowt kowh mang Sawlawmawn khaiah dowi bowt chekhai. Naiawng rakowi naiawngün kri uanh dow mün khowt chow adik uowi mih tukah dowi chekhai.48Thurai chup kim vüi kowi kowh mang Sawlawmawn thawpah mih uanh dow kuh hown kowh phuchuara, chimsaima mih kawm towk rah kuh hown kowh pawitang,49kuh achangma mih hown kowh thawpah mih maibu towngh ün chekhai. Naiawngün maibu towngh dow lang chimsai mih arah pur kowi hawmlawm pra tanga klüng, now lakuai pra tanga klüng aia towah khai. Nami klen kowi kuh hown kowh thawpah mih pau, bia hai kep,50kuh achangma mih hown kowh thawpah mih bia chah, bawthi kep müa kaingkep, nam iungma mih maikhük towk müa biatum, uaibak hai mairing towk müa puh ün aia thawpah khai. Nami klen kowi Lang Chimsai Mih Towklak hai Thurai chup kim kowi kowh towklak lang iuk mih kimplawt klia müa kuh hown kowh akli ün thawpah khai.51Naiawng hai mang Sawlawmawn mih Thurai chup kim kowi kowh lup maten ki changta khai bowt. Nami kung kowi dow aia mih CHAKRAMANG vüi a-pa David lang kraah mih uanh maten Thurai chup kim kowi uang pawla khai. Naiawngün a-pa David lang kraah mih uanh dow kuh, tai hai achap kawm uanh chekhai. Naiawngün uanh maten dow aia mih Thurai chup kim kowi kowh dawngthawnguan towk rah kowi aia towah khai.
The Seed Company