1 Manguüa4
1Mang Sawlawmawn dow Israel pren paprenma kowi chowm mang khai bowt.2Maiawngünuüa dow aia kowh lang pankri mih maru iukuüa chekhai. Zadawk kowh chapa Azaria dow uamow lang kri mih;3Sisa kowh chapa Elihoref hai Ahija iüah dow mang kowh cha rui mih, Ahilud kowh chapa Jehosafat dow mang kowh chownglawng lawnguan rui mih,4Jehoiada kowh chapa Benaia dow siphai lang kri mih, now Zadawk hai Abiathar iüah dow uamow chekhai.5Nathan kowh chapa Azaria dow pren kruitown miuüa kowi kowh lang kri mih, now Nathan kowh chapa Zabud dow mang kowh prengia pek mih hai uamow chekhai.6Ahisar dow mang kowh kim mingkhet mih, now Abda kowh chapa Adoniram dow naruüa kowh aluchow chekhai.7Israel pren paprenma kowi Sawlawmawn mih tow pe pren kruitown mih laipre ia khai. Naiawngün pren kruitown miuüa dow mang hai mang kimchakuüa vüi krawi kram pe chakkham reng chekhai. Amatni dow lowk ia e paning kowi pala vüi chi kram pe chakkham reng chekhai.8Naiawngün aluchowuüa dow Ben-Har, Ben-Har dow Efraim süng kowi kowh kruitown mih,9now Ben-Deker dow Makaz marow, Sa-Albim marow, Bet-Semes marow hai Elawnbet-Hanan marow kowi kowh kruitown mih chekhai.10Ben-Hesed dow Arubawt marow, Soko marow hai Hefer marow kowi kowh süng maten kowi kruitown mih chekhai.11Now Ben-Abinadab dow Nafawt-Dawr süng maten kowi kowh kruitown mih chekhai. Aia kowh masi dow mang Sawlawmawn kowh chama Tafat chekhai.12Ahilud kowh chapa Bana dow Tanak marow hai Megido marow kowi kowh kruitown mih chekhai. Nami klen kowi aia dow Zarethan re-e kowh Bet-San süng maten paw kruitownla khai. Aia dow Jezerel mrawkphak pra kowh Bet-San marow hownia Abel-Mehola iawng panow Jawkmeam mowr paw krawi kruitownla khai.13Ben-Geber dow Gilead süng kowi kowh Ramawt marow kowi kruitown mih chekhai. Aia dow Gilead süng kowi kowh Manase chapa Jair kua hai Basan kowi kowh Argawb süng maten kruitownla khai. Argawp süng dow tap tapat lut chekhai, now nami süng kowi dow kua uowi 60 kua chekhai; naiawngün kua maten dow aiukma kangowh panow kri hown aklia uowi mih tap uowi bowk chekhai.14Ido kowh chapa Ahinadab dow Mahanaim marow kowi kowh kruitown mih chekhai.15Ahimaz dow Naptali süng kowi kowh kruitown mih chekhai. Aia kowh masi dow mang Sawlawmawn kowh chama Basemat chekhai.16Husai kowh chapa Bana dow Aseruüa kowh süng hai Bealawt marow kowi kowh kruitown mih chekhai.17Now Parua kowh chapa Jehosafat dow Isakaruüa kowh süng kowi kowh kruitown mih chekhai.18Ela kowh chapa Simei dow Benjamin süng kowi kowh kruitown mih chekhai.19Now Uri kowh chapa Geber dow Amawruüa kowh mang Sihun hai Basan pren mang Awk kowh süng kowi kowh kruitown mih chekhai.20Juda hai Israel pren kowi kowh maru iun kawm krang dow sata pang kowi kowh sema iawng chekhai. Sawlawmawn chowm mang mih khin khe dow amatni kowh chakkham alawkma chekhai, now apiaw apama uowi büah khai.21Nami khin khe mang Sawlawmawn kruitownah mih süng dow Iufratis aw hownia uownah kowh Aigupta pren sünghi iawng panow Filistinuüa kowh pren sünghi mowr chekhai. Nami lak kowi kowh tawi taphang mih pren maten dow nami khin khe mang Sawlawmawn nimkrüa kowi uowi khai, now mang Sawlawmawn sing uowi mowr dow aia kowi peah mangmu büah reng chekhai.22Ni towng mang Sawlawmawn chaah mih chakkham dow maiawng: Kawmdi aiungma mih 5,000 set ngia, iawngpa mih kawmdi 10,000 set ngia,23Chahau hown kowh thumah mih chia hamüt pum, dowm kowi kowh thingah mih chia 20 pum hai ruapur 100 pum chekhai. Nami klen kowi naki, ngaia, ngahiu, ua hai umpai ün paw uowi tak chekhai.24Sawlawmawn mih Iufratis aw satkup pra kowh pren Tifsa hownia Gaza marow mowr krawi kruitownla khai. Aia kruitownah mih pren maten dow thaulangma chekhai.25Sawlawmawn chowng khe dow Juda hai Israel pren kowi kowh uowi mih maten thaulangma uowi khai; Dan marow hownia Ber-Seba marow mowr kowi kowh uowi miuüa maten kowh dow grep krum hai uidut khang uowi bowk chekhai.26Sawlawmawn kowh kawrnga kari küng mih kawrnga maten vüi kim uowi 40,000 chekhai, now siphaiuüa chowmah mih kawrnga uowi 12,000 chekhai.27Pren kruitown miuüa dow amatni takhowmta iawng la towng mang Sawlawmawn hai aia kowh pawitang kowi tawi cha tawi kham miuüa vüi krawi kram pe chakkham reng chekhai. Amatni dow tawngpaw akhawr nauowila dowi kownkow pela ching reng khai.28Amatni dow kawrnga kari küng mih kawrnga hawmh vüi hai akeng mih kawrnga hawmh vüi paw chowlowkkow chak rah re-e uang tow pe iakmow hai chahau reng chekhai.29Mang Sawlawmawn kowi dow prengia, chanlaira hai tukra mih sata kowi kowh sema iawng ahuma Thurai peah khai.30Satlawt pra kowh pren hai Aigupta pren kowi kowh chanlaima mih maru-uüa maten lak-e Sawlawmawn kowh dow chanlaira lang hu chekhai.31Aia dow maru maten lak-e lang chanlai chekhai. Aia dow Ezrahit kowi kowh Ethan, Heman, Kalko hai Mahawl kowh chapa Darda lak-e paw lang chanlai chekhai. Aia kowh ming iung nang iung dow aria aret kowi kowh chenchapuüa maten tut-e krawi tauet khai.32Aia dow chanlai lawng tekla 3,000 chap chekhai, now meng paw thawnla 1,005 klüng chekhai.33Aia dow Lebanawn hungh kowi kowh sidar singh hownia uownah now tap kowi kowh awm mih lawngthow pawi mowr singh uowi mih maten lawnguan kowi tekla khai. Nami klen kowi aia dow asadua, uakling uaber, kam hai sowr mih kaurawng uaramchak hai sawng dam lawnguan kowi paw tekla khai.34Now palusama hownia kowh manguüa mih mang Sawlawmawn kowh chanlaira lawnguan kowi tawi ta miuüa dow Sawlawmawn kowh chanlaira atekma mih laiklow nape süntaah kownkow uang chin maru reng chekhai. Naiawng hai chenchap maten mih mang Sawlawmawn tut-e uang reng chekhai.
The Seed Company