1 Manguüa5
1Tura marow mang Hiram dow David hown auiua sinma chekhai. Aia dow David kowh chapa Sawlawmawn ta chowm mang mih satang tawi tata hanow aia kowh maru iukuüa kowi Sawlawmawn tut-e kowchinah khai.2Now naiawngün maru iukuüa kowi Sawlawmawn krawi plan tek pe mih,3“Apa David kowi dow ariaret kowi kowh ransu-uüa uang kingküaah hanow uang senah rengreng chekhai. Naiawng rakowi aia dow aia kowh ransu-uüa kowi nowngta bowk dowi mowr CHAKRAMANG aia kowh Thurai vüi ia thawp Thurai chup kim dowi chekhai. Nami lawnguan kowi en paw tuk bowk towbowt.4Nachenganchepaw kawmat dow CHAKRAMANG ang kowh Thurai mih pren maten hownia pe ang thaulangra khai bowt. Kawmat dow tawng iawng mih ransu paw ang kowh uowi dowi, now tawng iawng mih phih paw uang ting dowi bowt chekhai.5Naiawng rakowi CHAKRAMANG ang kowh Thurai kowi nachupiiala kownkow ang nathawp pe chup kim lowk kown ang nau. Tawngplawng kowchow panow apa David kowi CHAKRAMANG tek pe mih, ‘En kowh mang chowm rah kowi en kowh chapa kowi ang nape chowmah kown. Aia dow nachupiiala ang kownkow ang vüi nathawp ang chup kim kown,’ pakhai.6“Naiawng rakowi Lebanawn hungh kowi kowh sidar singh ang vüi nakowtu ang kownkow en kowh maru-uüa kowi peah ana diah. En kowh maru-uüa hown ang kowh maru-uüa paw natawi uowi ngengche kown taih, now sukkri kha mih en khowmta bowkta iawng en kowh maru-uüa kowi ang napeah kown taih. Sing tuk prakowi dow Sidawnuüa iawng akiakma mih anging pungmadawng kowi miapaw uowi dowi mih en aiawng tuk chekhai,” pakhai.7Nami satang tata hanow mang Hiram dow lainowmma awmrawm khai. Naiawng rakowi aia tek mih, “Ani mih CHAKRAMANG dow akiow pacham uowi lah. Tawngplawng kowchow panow maiawng kri kraingma mih chenchapuüa luk kowi nachowm mang kownkow aia dow mang David kowi chapa chanlaima mih peah lowk ia khai,” pakhai.8Now Hiram uang chin pe maru now Sawlawmawn kowi tek pe mih, “En uang krawi phowng ang mih satang ang ta khowk, now en krawi tek ang iawng ang nachang en kown taih. Sidar singh hai karpowng singh dow ang nauang krawi sa en kown taih.9Naiawngün singh dow ang kowh maru-uüa mih Lebanawn hungh hownia Mediteranean sata mowr naiu klala kown. Nami kung kowi dow naiawngün singh mih pan iawng nathawpah büah hanow en tekah mih arah kowi nauang pawla en kown towbowt. Now ang kim kowi kowh maru-uüa vüi chakkham tarapdow en krawi kram ang panü ang nau chowdiah,” pape khai.10Naiawng hai Hiram mih Sawlawmawn nau iawng sidar singh hai karpowng singh maten krawi sa pe khai.11Now Sawlawmawn paw Hiram kim kowi kowh maru-uüa vüi krawi kram pe chakkham reng chekhai. Aia dow Hiram kowh maru-uüa chak müa paning kowi püm 50,000 mawn, now kanrawn sau achangma mih 4,800 set chi krawi sa pe reng chekhai.12Now CHAKRAMANG mih aia takhamta iawng Sawlawmawn kowi peah chanlaira khai. Hiram hai Sawlawmawn iüah dow thaulangma uowi khai, now amatchi dow tatow sangbowk laitawm khai.13Mang Sawlawmawn mih Israel pren paprenma hownia maru iun 30,000 ia kowi kür hown pe changah nar lup khai.14Amatni pungmadawng kowi mang mih pala kowi 10,000 ia chi Lebanawn hungh kowi kowchinah khai. Amatni dow pala chi Lebanawn hungh kowi uowi khai, now pre la dow kowmatia kim kowi uowi büah khai. Naiawngün maru-uüa kowh lup chang namü kown mih kurdik dow Adoniram luk kowi chekhai.15Mang Sawlawmawn nimkrüa kowi kowh kurdik lup chang mih maru iun dow 70,000 ia chekhai, now hungh kowi kowh hua bawp mih maru iun dow 80,000 ia chekhai.16Naiawngün lup chang miuüa kowi kowh mingkhet mih dow maru iun 3,300 ia chekhai.17Amatni dow mang ana pek iawng Thurai chup kim vüi nachangla kimchüng kownkow aiuk aiukma panow asung khakma mih hua chaing cham krawi bawp hanow uang pawla büah reng chekhai.18Now nachangla Thurai chup kim kownkow naiawngün hua dow Sawlawmawn hai Hiram kowh laksmauüa hai Gebal marowchakuüa hown klangiungma bawpah khai, now singh ün paw klangiungma kamrütah büah khai.
The Seed Company