1 Manguüa17
1Gilead süng kowi kowh Tisbe marow kowi dow aming Elija pami risi uowi lowk ia. Akat khe aia tek pe mang Ahab mih, “Ang chang pe lup reng mih CHAKRAMANG Israeluüa kowh masing Thurai ming lüklau se ang tek khowk. Ang tek dowi mowr pre sum ning mowr mih nang paw nakla kown nadowi, now uang paw nauang kown nadowi,” pakhai.2Nami kung kowi CHAKRAMANG tek pe Elija mih,3“Mami marow hownia lawt hanow satlawt prakowi kowpowt diah, now Jawrdan aw satlawt pra kowh tui hawr dawilawi mih Kerit pami awchawng kowi kowtapet diah.4Nakowi dow nami awchawng tui en nakham kown, now nakowi nauang pe en chakkham kownkow uaak hawmh kowi ang khowmta hüah khowk,” pakhai.5Naiawng rakowi CHAKRAMANG tek pe iawng Elija dow chang khai. Aia dow Jawrdan aw satlawt prakowi kowh tui hawr dawilawi mih Kerit pami awchawng kowi kowuowi khai bowt.6Now uaak hawmh mih rau-e hai iak prakowi aia vüi kawmpah hai chaknga uang sa pe reng chekhai, now tui dow nami awchawng tui aia kham khai.7Pren kowi uang uang dowi rakowi pre sum ni kung kowi dow nami awchawng tui mih kang khai.8Nakhowk khe Elija tut-e mih CHAKRAMANG kowh laiklow maiawng uang towm khai:9“Kawmat dow Sidawn marow re-e kowh Zarefat marow kowi kowuowi diah. Nakrawi kram en chakkham kownkow nakowi kowh mamaimow kowi ang khowmta en lowk ia khowk,” pakhai.10Naiawng rakowi risi Elija mih Zarefat marow kowi kowkowi khai. Now nami marow tapplawt re-e hawt paw sawp mih mamaimow kowi aia khi lowk ia khai. Nami mamaimow kowi hawah now aia tek pe mih, “Sakrauma hown ang khamah kown mih vüi bia hown uang pawla ang tui ditchow dit snow,” pakhai.11Nami mamaimow tarü mih khin khe krawi hawah now aia krawi plan tek pe mih, “Sakrauma hown kawmpah paw uang pawla ang apachow dit ba,” pakhai.12Nakhowk khe nami mamaimow klangah mih, “CHAKRAMANG en kowh masing Thurai ming lüklau se ang tek khowk, ang tut-e apachow paw kawm uowi dowi chekhai. Puh kowi kawmdi uowi pachawmchow taih, now kanrawn sau paw uowi ditchow towbowt. Ang krawi paw sawp mih dow kim kowi napawla kownkow chekhai. Nami sawp hown ang hai ang chapa vüi ang naengla kawm kown. Nami kawm chala now angching uchow dow nakowng kown towbowt,” pape khai.13Nachenganchepaw nami mamaimow kowi Elija tek pe mih, “Hangkow kram diah. Kim kowi kowmang now en tek iawng kowchang diah. Tawkchedow en kowh kawmdi hown chalachow ang vüi kowrik thawp kawmpah apah diah, now nami dow ang tut-e uang pawla diah. Nami kung kowi phai en hai en chapa vüi kawmpah thawp iang.14CHAKRAMANG Israeluüa kowh Thurai tek mih, ‘Uang kowi ang pe uangah dowi mowr kawmdi puh hai sau towk müa natakhaw kown nadowi,’ pakhai,” pape khai.15Nahanow nami mamaimow dow risi Elija krawi tek pe iawng kowchang khai. Now Elija, nami mamaimow hai achapa büah dow akhin krama mowr ka cha chakkham khai bowt.16Elija kowi kowh CHAKRAMANG krawi tek pe iawng kawmdi puh paw takhaw dowi chekhai, now sau towk müa paw takhaw dowi chekhai.17Pre sum ni kung kowi dow mamaimow kowh chapa mih arau uowi khai. Now achapa dow arau di lai rakowi hing kowng khai.18Nakhowk khe nami mamaimow tek pe risi Elija mih, “Aw Thurai maru, tawng angak chow ang changta en khai? Ang kowh angak nauang tüng ang kownkow hai ang chapa kowi nauang kowngta kownkow en uang mih bow?” pakhai.19Nakhowk khe Elija klangah mih, “En kowh chapa kowi uaipe ang madiah,” pape khai. Nahanow risi Elija dow nami mamaimow buk hownia achapa kowi haipawah hanow aluk krowng kowi aia uowiah mih towklak kowi kowpawla khai, now mamaimow kowh chapa kowi mih aia kowh mawk rah kowi iüah khai.20Nami kung kowi Elija tek pe CHAKRAMANG mih, “Aw CHAKRAMANG ang kowh Thurai, ang uowiah mih kim iah mamaimow kowh chapa kowi en kowngta pe hanow tawngplawng kowchow maiawng mih kawm kratra aia luk kowi en uang tuk pawla pe khai?” pakhai.21Nami kung kowi aia dow nami mamaimow kowh chapa luk kowi iu tamaw sum kat hanow CHAKRAMANG kowi awr tek mih, “Aw CHAKRAMANG ang kowh Thurai, mami ngeuüa kowh asak uang singta pe diah,” pakhai.22Now CHAKRAMANG dow Elija kowh laiklow hawt sünta pe khai. Nahanow nami ngeuüa kowh asak dow uang sing khai, now aia dow awr ching khai bowt.23Nakhowk khe dow Elija mih aia uowi rah hownia nami ngeuüa kowi krowngla hanow adak krowng kowi a-u tut-e kowpawla khai. Now a-u kowi aia tek pe mih, “Mow, en kowh chapa sing reng tak,” pakhai.24Nakhowk khe nami mamaimow tek pe Elija mih, “En Thurai maru pami kawmat dow ang tuk khowk, now CHAKRAMANG tek en mih maten paw anowmma chekhai,” pape khai.
The Seed Company