1 Manguüa16
1Naiawng Israel pren kowi Basa chowm mang mih khin khe Basa lawnguan kowi Hanani chapa risi Jehu tut-e CHAKRAMANG kowh laiklow uang ting khai.2CHAKRAMANG tek mih, “Aw Basa, en dow asung uowi dowi mih maru taih diah. Nachenganchepaw ang maru Israeluüa kowh aluchow ang thawp en khai. Tawkche Jeroboam iawng en tawi chang lup ngak khai, now ang maru Israeluüa kowi mih en pe changah lup ngak khai. Naiawng hai en towk ang kunmarau khai.3Naiawng rakowi en hai en krungchakuüa kowi ang napiakah kown. En krungchakuüa kowi dow Nebat chapa Jeroboam kowh krungchakuüa kowi iawng ang nachangah kown.4Marow kowi kowh kowng mih en kowh maru-uüa uak dow kui nachaah kown, now marow uat kowi kowh cham kowng miuüa uak dow uakling uaber hawmh nachaah kown,” pakhai.5Basa kowh akeng mih lup hai tasen awng mih lawnguan dow “Israel Manguüa Lawnguan” pami bowih kowi arui uowi bowk chekhai.6Akung kowi Basa dow kowng hanow Tirza marow kowi maru dupah khai. Aia takcha dow achapa Ela mih ta chowm mang khai.7Basa hai aia krungchakuüa dow Jeroboam krungchakuüa iawng CHAKRAMANG mik kowi angakma mih lup chang khai, now Jeroboam krungchak kowi paw amatni dow saita khai. Basa hai aia krungchakuüa kowi kingküala mih CHAKRAMANG kowh laiklow Hanani chapa Jehu tut-e uang towm mih dow nami rakowi chekhai8Israel pren kowi Basa chapa Ela chowm mang mih dow Juda pren kowi Asa chowm mang mih 26 ning khe chekhai. Ela dow Tirza marow kowi pre ning mowr chowmla mang khai.9Aia kowh dow Zimri pami siphai aluchow uowi lowk ia chekhai. Zimri dow aia kowi nasaiah kownkow sangkrang khai. Ela dow aia kowh kawrnga kari maten kowi dawnglang mih Zimri kowi pe mingkhetah khai. Now akat khe Tirza marow kowi kowh mang kim mingkhet mih Arza kim kowi Ela kowkham rak khai.10Nami khin khe Zimri mih nami kim lak kowi kowkupah hanow Ela kowi kowsaita khai, now aia mih ta chowm mang khai. Aia ta chowm mang mih dow Juda pren kowi Asa chowm mang mih 27 ning khe chekhai.11Zimri dow uown chowm mang hown krowksang Basa krungchak maten kowi saita bowk khai. Aia dow Basa kowh tasin taken mih kachakuüa hai kachakuüa auiuauüa kowi saita bowk khai.12Basa kowi CHAKRAMANG kingküaah mih laiklow risi Jehu kowi kowh tek pe iawng Zimri mih Basa krungchakuüa kowi saita bowk khai.13Tawngplawng kowchow panow Basa hai achapa Ela iüah dow lainowmma chang lup ngak khai. Amatchi dow Israeluüa kowi pe changah lup ngak khai, now asung uowi dowi mih arup kowi paw pe chupah khai. Naiawng hai amatchi dow CHAKRAMANG Israeluüa kowh Thurai kowi towkah kunmarau khai.14Ela changah mih lup maten dow “Israel Manguüa Lawnguan” pami bowih kowi arui uowi bowk chekhai.15Israel pren kowi Zimri chowm mang mih dow Juda pren kowi Asa chowm mang mih 27 ning khe chekhai. Aia dow ranit ni mowr Tirza marow kowi chowmla mang khai. Nami khin khe Israel siphai hawmh dow Filistinuüa kowh Gibethawn marow kowrum khai.16Naiawng tangbung khupra kowi uowi büah thüm khe Israel siphaiuüa mih mang Ela kowi Zimri saita mih satang ta khai. Nami satang ta mih ni khe amatni dow tangbung khupra kowi siphai aluchow Awmri kowi thawpah Israel pren mang büah khai.17Nakhowk khe Awmri hai aia tut-e kowh Israeluüa maten mih Gebethawn marow hownia plan hanow Tirza marow mih uang umta lut khai.18Nakhowk khe Tirza marow mih Awmri thumchakuüa powngta kown towbowt pami tuk hanow Zimri dow mang kim kowi kowh akhawtma mih kim kowi kowkowi khai, now mang kim dow aia krawi towkta bowk khai, now nami maih kowi aia dow tawi hing tasat khai.19Naiawng aia kowng mih dow aia ngak rakowi chekhai. Tawngplawng kowchow panow aia dow CHAKRAMANG mik kowi angakma mih lup chang khai. Aia dow Jeroboam iawng Israeluüa kowi pe changah lup ngak khai.20Zimri kowh akeng mih lup hai aia kowh kingküa lawnguan dow “Israel Manguüa Lawnguan” pami bowih kowi arui uowi bowk chekhai.21Nami kung kowi dow Israeluüa mih tabak prut hanow phaw pre thum khai. Pathum mih maru-uüa dow Ginat kowh chapa Tibni kowi pe chowmah mang kown mih nau, now alowk mih thumchak dow Awmri kowi pe chowmah mang kown mih nau khai.22Tawkche Awmri thumchakuüa mih Tibni thumchakuüa kowi nowngta khai. Naiawng rakowi Tibni kowi saita hanow Awmri mih ta chowm mang khai.23Israel pren kowi Awmri chowm mang mih dow Juda pren kowi Asa chowm mang mih 31 ning khe chekhai. Israeluüa kowi aia kruitownla mih dow laipre ning chekhai. Aia rik chowm mang mih taruk ning mowr dow Tirza marow hownia chekhai.24Nami kung kowi tai 70 set hown Semer hownia Samari chut mih aia ran lowk chekhai. Nami chut luk kowi dow aia thawp marow khai. Now nami chut ming dow aia ranah dowi rawn khe kowh chut iah Semer ming iawng Samari pahai aia chap pe khai.25Awmri dow CHAKRAMANG mik kowi angakma mih lup chang khai. Aia dow aia dowi rawn khe kowh manguüa lak-e lang chang lup ngak khai.26Aia dow Nebat kowh chapa Jeroboam iawng rowprowp Israeluüa kowi pe changah lup ngak khai. Naiawng rakowi Israeluüa mih asung uowi dowi mih arup aren kowi chup hai CHAKRAMANG amatni kowh Thurai kowi towkah kunmarau khai.27Awmri kowh akeng mih lup hai tasen awng mih lawnguan dow “Israel Manguüa Lawnguan” pami bowih kowi arui uowi bowk chekhai.28Akung kowi Awmri dow kowng hanow Samari marow kowi maru dupah khai. Now aia takcha kowi achapa Ahab mih ta chowm mang khai.29Israel pren kowi Awmri chapa Ahab chowm mang mih dow Juda pren kowi Asa chowm mang mih 38 ning khe chekhai. Aia dow 22 ning mowr Samari marow kowi chowmla mang khai.30Awmri kowh chapa Ahab dow CHAKRAMANG mik kowi angakma mih lup chang khai. Aia dow aia dowi rawn khe kowh manguüa lak-e lang chang lup ngak khai.31Nebat kowh chapa Jeroboam changah mih lup ngak dow Ahab tut-e a-echow taih tak chekhai. Aia dow Sidawn marow mang Etbal chama Jezebel hown tachawng khai, now Baal thurai kowi tawi chupiia khai.32Aia dow Baal thurai vüi Samari marow kowi thawp pe chup kim lowk khai, now phuchuara paw thawp pe lowk khai.33Now aia dow Asera limpu paw thawp lowk khai. Aia dowi rawn khe kowh Israel pren kowi rik chowm mang miuüa CHAKRAMANG amatni kowh Thurai kowi towkah kunmarau mih lak-e aia mih lang towkah kunmarau khai.34Ahab chowm mang mih khin khe Bethel marowchak Hiel mih Jeriko marow plan thawpah khai. Tawkche naiawng aia uown phük marow chüng mih khin khe dow aia chapa ta Abiram mih kowng khai, now aia thawp marow plawt khe paw aia chapa sawi Segub mih kowng khai. Naiawng achapa kowng mih dow Nun chapa Josua tut-e kowh CHAKRAMANG tekta iawng uang phaw mih chekhai.
The Seed Company