1 Manguüa15
1Juda pren kowi Abija chowm mang mih dow Israel pren kowi Nebat kowh chapa Jeroboam chowm mang mih lairaiat ning khe chekhai.2Abija mih Jerusalem marow kowi sum ning mowr chowm mang khai. A-u dow Abisalawm kowh chama Maka chekhai.3Aia dow a-pa changah mih lup ngak maten tawi chang reng chekhai. Aia kowh sak dow a-pu David kowh sak iawng nadowi; aia dow CHAKRAMANG aia kowh Thurai kaah sakowm iawng uowi dowi chekhai.4Nachenganchepaw CHAKRAMANG mih David tut-e kowh aia takhamta mih laiklow tuakla rakowi Jerusalem marow kowi nachowm mang kownkow hai nami marow natownah reng kownkow Abija kowi peah chapa lowk ia khai.5Tawngplawng kowchow panow David dow CHAKRAMANG mik kowi aiungma mih lup chang reng chekhai. Hit chenchap Uria kowh masi hown chang iang mih klen kowi David dow CHAKRAMANG kowh ana pek chün dowi mih lowk paw uowi dowi chekhai.6Rehoboam hai Jeroboam iüah uownla mih tasen dow Abija chowng kowi pachowng mowr uowi reng tak chekhai.7Abija kowh akeng mih lup lawnguan maten dow “Juda Manguüa Lawnguan” pami bowih kowi arui uowi bowk. Abija hai Jeroboam iüah dow tasen reng chekhai.8Akung kowi Abija dow kowng hanow David marow kowi maru dupah khai. Aia takcha kowi dow achapa Asa mih ta chowm mang khai.9Juda pren kowi Asa chowm mang mih dow Israel pren kowi Jeroboam chowm mang mih pirmi ning khe chekhai.10Aia dow 41 ning mowr Jerusalem marow kowi chowmla mang khai. A-pa kowh u dow Abisalawm kowh chama Maka chekhai.11Asa dow a-pu David iawng CHAKRAMANG mik kowi aiungma mih lup chang reng chekhai.12Aia dow aia pren kowi kowh akeng thuraiuüa chup kim kowi chang chawkkrawma lup mih masiuüa hai kachakuüa maten kowi prütta bowk khai, now aia pipu-uüa thawpla mih arup maten paw piakta bowk khai.13Nami klen kowi aia dow a-pa kowh u Maka kowi khowm padow mang u arah hownia klata khai. Tawngplawng kowchow panow Maka mih suiiai kaniaima mih Asera limpu thawp lowk chekhai. Nami limpu dow kripta hanow Asa mih Kidrawn lawngrawi kowi cham pawla hanow cham tikah khai.14Arah kroma mih kowi kowh chupiiara maten piakta bowk dowi chepaw Asa dow chownglawng prat aia kowh sak mih CHAKRAMANG kaah sakowmma uowi khai.15Aia dow CHAKRAMANG vüi kowi kowh a-pa matchi lang kraah mih kuh, tai hai akeng mih uanh maten CHAKRAMANG kim kowi kowpawla khai.16Aia chowm mang mowr mih Asa dow Israel mang Basa hown hing tasenta hüah chekhai.17Akat khe Israel mang Basa mih Judauüa kowi kowsenah now Rama marow mih kowpowngta pe khai. Now aia dow Rama marow kowi Judauüa ia kup lawtla dowi kownkow aia kowh siphaiuüa kowi towah khai.18Naiawng rakowi Asa mih aia kim kowi kowh hai Thurai chup kim kowi kowh kuh hai tai maten pawah hanow aia kowh maru iukuüa rut kowi peah khai, now Siria pren mang Ben-Hadad tut-e kowchinah khai. Ben-Hadad kowh pa dow Tabrimawn chekhai, now Tabrimawn kowh pa dow Heziawn chekhai. Nakhowk khe Ben-Hadad chowm mang mih dow Damaska marow kowi chekhai. Ben-Hadad kowi Asa krawi tek pe mih,19“Chu, apa hai en pa iüah iawng achi paw tatow sangbowk laitawm diah sik. Naiawngün kuh hai tai dow awmrawm sung iawng hai ang krawi sa en mih chekhai. Israel pren mang Basa hown kowh en tatowah mih sangbowk laitawm kawmat piakta diah, nahanow aia dow ang hownia napowt kown towbowt,” pakhai.20Juda pren mang Asa kowh laiklow tata hanow Ben-Hadad dow nauta khai. Aia dow aia kowh siphai aluchowuüa kowi Israeluüa kowi nakrawi sen kownkow krawi chinah khai. Nami khin khe amatni dow Ijawn marow, Dan marow, Abel-Bet-Maka marow, Galili kanh riaret kowi kowh süng maten hai Naptali süng maten krawi powngta khai.21Nami satang tata hanow Israel mang Basa mih Rama marow kowi akhawtma nachangah kown mih lup towta hanow Tirza marow kowi kowpowt khai.22Nami kung kowi dow Rama marow akhawtma changla kownkow Basa tawngah mih hua hai singh nakowkawt kown mih Juda prenchakuüa maten kowi Asa peah ana khai. Now naiawngün singh hai hua maten hown Asa mih Mizpa kua hai Benjamin süng kowi kowh Geba marow akhawtma changah khai.23Asa kowh akeng mih lup lawnguan, aia cham awng tasen mih lawnguan hai aia krawi thawpla marow sar mih lawnguan maten “Juda Manguüa Lawnguan” pami bowih kowi arui uowi bowk chekhai. Tawkche alawngtangma khowk khe Asa kowh dow khawk kowi rawka phaw achap chekhai.24Akung kowi Asa dow kowng hanow David marow kowi maru dupah khai. Nami kung kowi aia takcha achapa Jehosafat mih ta chowm mang khai.25Israel pren kowi Jeroboam kowh chapa Nadab chowm mang mih dow Juda pren kowi Asa chowm mang mih pre ning khe chekhai. Aia dow Israel pren kowi pre ning mowr chowmla mang khai.26Aia dow CHAKRAMANG mik kowi angakma mih lup chang khai. Aia dow a-pa Jeroboam iawng Israeluüa kowi pe changla angak khai.27Isakar krungchak Ahija kowh chapa Basa mih Nadab kowi nasaita kownkow sangkrang khai. Aia dow Nadab hai Israel siphaiuüa mih Filistinuüa kowh Gibethawn marow kowi kowsenah khe Gibethawn marow kowi Nadab kowi saiah khai.28Juda pren kowi Asa chowm mang mih sum ning khe Basa mih Nadab kowi saita khai, now aia takcha kowi dow Basa mih ta chowm mang khai.29Aia dow chowm mang hanow Jeroboam kowh kimchakuüa maten kowi saita bowk khai. Naiawng Jeroboam kimchakuüa kowi Basa saita bowk mih dow Silo marowchak risi Ahija tekah mih laiklow uang tachi mih chekhai.30Jeroboam dow aiamat chang lup ngak mih klen kowi Israeluüa kowi paw pe changah lup ngak khai. Naiawng aia chang rakowi CHAKRAMANG Israeluüa kowh Thurai mih lainowmma kunmarau khai.31Nadab changla mih lup lawnguan maten dow “Israel Manguüa Lawnguan” pami bowih kowi arui uowi bowk chekhai.32Juda pren mang Asa hai Israel pren mang Basa iüah dow amatchi chowm mang mowr mih hing tasenta hüah chekhai.33Israel pren kowi Ahija kowh chapa Basa chowm mang mih dow Juda pren kowi Asa chowm mang mih sum ning khe chekhai. Aia dow Tirza marow kowi 24 ning mowr chowmla mang khai.34Aia dow CHAKRAMANG mik kowi angakma mih lup chang khai. Aia paw Jeroboam iawng dow Israeluüa kowi pe changah lup ngak reng chekhai.
The Seed Company