1 Krungchakuüa22
1Nami kung kowi mang David tek mih, “CHAKRAMANG Thurai kim hai Israeluüa kowh tikah mih uanap chang müa phuchuara dow makowi naphaw ngengche kown,” pakhai.2Now mang David dow Israel pren kowi kowh uowi mih prenlang maru-uüa maten kowi arasang kuaah lawmah kownkow lawt ana khai. Now naiawngünuüa pungmadawng hownia aia dow Thurai kim chang müa hua naia bawpla kownkow maru mih ruiah khai.3Now mang David dow tapplawt maten kowi kowh abüng tak müa khir vüi hai aklia müa vüi lawngha ahuma pe khai. Now aia peah mih kri dow hu lai bowt rakowi adik ia khaiah dowi bowt chekhai.4Nami klen kowi sidar singh paw ahuma aia pe khai. Tawngplawng kowchow panow aia kowi dow Sidawnuüa hai Turauüa mih sidar singh ahuma uang pawla pe khai.5Now David tek mih, “Ang chapa Sawlawmawn dow ning diachow reng tak, now chanlaira paw khowt pat uowi dowi tak chekhai. Nachenganchepaw CHAKRAMANG vüi aia nathawpah kown mih kim dow pren towng maru-uüa tut-e aming anang pacham uowi lah, klangiungma pacham phaw lah, now akiow pacham uowi lah. Naiawng rakowi aia vüi dow achap kawm ang nakamrütla pe bowk kown,” pakhai. Naiawng hai mang David dow aia kowng dowi rawn uanh ahuma kamrütla pe khai.6Nami kung kowi aia dow achapa Sawlawmawn kowi hawah hanow CHAKRAMANG Israeluüa kowh Thurai kim nachang kown mih kurdik peah khai.7David tek pe Sawlawmawn mih, “Pa, CHAKRAMANG ang kowh Thurai kowi natüngla ringkawra kownkow nathawp Thurai chup kim lowk kown mih ang sak kowi uowi chowdiah.8Tawkchedow CHAKRAMANG tek ang mih, ‘En saita maru mih ahuma khowk chekhai, now en cham tasen mih paw ahuma khowk chekhai. Ang pur kowi en saita maru mih hu lai bowt. Naiawng rakowi ang vüi en naia thawp kim kown nadowi.9Nachenganchepaw en naka chapa lowk ia kown; aia dow thaulangma mih maru naown kown. Aia riaret kowi kowh ransu-uüa hownia aia kowi dow thaulangma ang natowah kown. Aia kowh ming dow Sawlawmawn naown kown. (Sawlawmawn pami dow “Thaulangma” pami chekhai). Tawngplawng kowchow panow aia chowm mang mih khin khe Israeluüa kowi dow thaulangma hai aiungma ang natowah kown.10Aia dow ang vüi nathawp ang kim lowk kown. Aia dow ang kowh chapa nachowng kown, now ang dow aia kowh pa nachowng kown. Israeluüa luk kowi aia kowh mang chowm rah dow chowngchowng saksakma ang nape uowiah kown,’ pakhai.11“Pa, kawmat mih en tut-e CHAKRAMANG pacham tawi uowi reng lah. CHAKRAMANG tek iawng nachang kown mih en kowh lup pacham chawn lah.12Israeluüa kowi naming nakhet kown mih kurdik en ka mih khin khe CHAKRAMANG en kowh Thurai ari aiang en naia chün kownkow CHAKRAMANG dow prengia hai tukra pacham pe en lah.13Mosi hownia kowh Israeluüa kowi CHAKRAMANG peah mih ari arow hai ari aiang dow kaneuma chünah diah, nahanow en lup nachawn kown. Saktuak khawtma hai sakkraingma uowiah diah. Hangkow kram diah, now sak paw hangkow nen diah.14“Akrat pusama hown CHAKRAMANG kim vüi kuh 100,000 mawn hai tai 1,000,000 mawn ang kramla khai. Nami klen kowi kri hai lawngha dow hu lai bowt rakowi adik nowng khaiah dowi bowt chekhai. Now singh hai hua paw ang kamrütla hüah khowk. Nami kowi en paw ia kamrüt ne tak kown taih.15En kowh dow hua bawp sara, singh hai hua hown kowh uanh thawp sarauüa ün akawmma chekhai. Nami klen kowi kuh, tai, kri hai lawngha hown kowh achap akawm tuk chang lup mih sarauüa paw akawmma chekhai. Naiawng rakowi kawmat nachang lup kown mih tarowng bowt. CHAKRAMANG dow en tut-e pacham tawi uowi reng lah,” pape khai.17Nami kung kowi mang David dow achapa Sawlawmawn kowi natawi khowngah kim chang kownkow Israeluüa kowh aluchow maten kowi peah ana khai. David tek pe mih,18“CHAKRAMANG enni kowh Thurai enni tut-e tawi uowila enni reng nadowi bow? Aia dow bowkbowk prakowi rip enni reng nadowi bow? CHAKRAMANG dow mami prenchak maru-uüa kowi ang rut kowi ap ang khai, now nami pren dow CHAKRAMANG hai aia kowh maru-uüa kowh uang chowng khai.19Kawmat CHAKRAMANG enni kowh Thurai kowi nacham kownkow enni kowh sak maiow anikma towah büa diah. Now CHAKRAMANG kowh sangbowk laitawm tawkpla hai Thurai kowh chimsaima mih uanh ün naia towla kownkow tarowng thawp Thurai chup kim büa diah. Nami kim dow CHAKRAMANG kowi natüngla ringkawra kownkow chimsaima mih kim chekhai,” pakhai.
The Seed Company