1 Krungchakuüa21
1Akat khe Setan dow Israeluüa kowi natowkah krat kownkow Israeluüa kowi narüaah kown mih saktuak David kowi peah khai.2Nakhowk khe Joab hai siphai aluchowuüa kowi David tek pe mih, “Ber-Seba marow hownia Dan marow mowr mih Israeluüa kowi rüaah büa diah. Now maru iun mün khowt chow uowi mih ang natukla kownkow enni ki rüa khowk now uang tek ang büah,” pakhai.3Nachenganchepaw Joab klangah mih, “Aw mangkri, CHAKRAMANG en kowh Thurai dow Israeluüa kowh maru iun kawmat kowh lak-e 100 phow mowr pacham huah lah. Israeluüa dow en kowh nar kangowh chekhai. Nachenganchepaw naiawng mih lup nachang kown mih tawngplawng kowchow en tuk nau khai? Tawngplawng kowchow Israel pachenma nachang lup ngak kown mih lup en tuk chang khai?” pape khai.4Nachenganchepaw aia tekta iawng nachang kownkow Joab kowi David peah ana khai. Naiawng rakowi Joab dow Israel pren paprenma kowi krawi lenla hanow Jerusalem marow kowi uang plan khai.5Now tasen uang mih maru iun mut David kowi aia uang peah khai. Tasen uang mih nget Israel pren paprenma kowi 1,100,000 ia chekhai, now Juda pren paprenma kowi 470,000 ia chekhai.6Naiawng khowt mih maru iun dawng kowi Benjamin krungchakuüa hai Levi krungchakuüa kowi dow Joab klowkla dowi chekhai. Tawngplawng kowchow panow mang David kowh ana pek mih aia tut-e dow angakma chekhai.7Nami ana pek dow Thurai mik kowi paw angakma chekhai. Naiawng rakowi Thurai mih Israeluüa kowi ripah khai.8Nakhowk khe Thurai kowi David tek pe mih, “Mami lup ang chang mih lainowmma ang changta angak khai bowt. Nachenganchepaw sakrauma hown en nar kowh angak lawtta pe diah. Tawngplawng kowchow panow ang dow abualama mih iawng ang changta lup khai bowt,” pakhai.9Nakhowk khe David kowh risi Gad kowi CHAKRAMANG tek pe mih,10“David tut-e kowkowi diah, now aia vüi ang khowmta pe sum chap mih ripra kowtek pe diah. Nami sum chap mih hownia aia pacham ruiah pachap lah. Now aia ruiah mih iawng aia kowi dow ang nachang pe kown,” pakhai.11Nakhowk khe Gad dow David tut-e kowkowiah now kowtek pe mih, “Ripra sum chap mih hownia en nau mih narui pachap kownkow CHAKRAMANG tek en khai.12Sum ning mowr khown kuak mih bow en nau? Dowdow ransu-uüa tut-e sum kowh sum la mowr cham powt mih bow en nau? Dowdow sum ni mowr pren kowi CHAKRAMANG hownia kowh kowng hawi uang kla mih bow en nau? Nami sum ni mowr mih CHAKRAMANG kowh kramamu mih Israel pren kowi kowh arah maten kowi nakrawi piak kown. Kawmat mih en tek ang diah, uang chin ang mih kowi tawng iawng chow ang kowtek pe kown?” pakhai.13Nakhowk khe Gad kowi David tek pe mih, “Ang kla phih mih chowbowt lowmow! Maru rut kowi dow ang mih hang pacham kla lah, CHAKRAMANG rut kowi phai ang pacham kla lah. Tawngplawng kowchow panow CHAKRAMANG kowh dow saksing sanara achur uowi dowi chekhai,” pakhai.14Nahanow CHAKRAMANG dow Israel pren kowi kowng hawi uang pe tingah khai. Nami kowng hawi hown dow Israeluüa mih 70,000 ia kowng khai.15Jerusalem marow kowi napiakah kownkow CHAKRAMANG mih kramamu lowk ia kowi kowchinah khai. Nachenganchepaw naiawng kramamu kowchang kown chowbowt khe rip chamang naripah kown mih saktuak CHAKRAMANG mih plan leta khai. Nami kramamu kowi CHAKRAMANG tek pe mih, “Na khowk tak! Taingta bowt diah!” pakhai. Nami khin khe CHAKRAMANG kowh kramamu iowng mih dow Jebus chenchap Arauna kowh cha thuara kowi chekhai.16Nakhowk khe David mih kuang prakowi awr tau hanow iowng dawnglawng se Jerusalem marow prakowi CHAKRAMANG lek saidawng mih awr khi khai. Nami khita hanow David hai lawngtang aluchowuüa mih khup sala uan hanow krawng kowi tabawk krawm se CHAKRAMANG kowi chupah khai.17Nakhowk khe Thurai kowi David tek pe mih, “Narüa maru iun kown mih ana ang nadowi bow pe? Changta angak mih hai tawita mata mih dow ang chowtaih. Naiawngün maru kawmuüa dow ruapur iawng angak uowi dowi chekhai. Tawng chow amatni changta khai? Ang hai ang kimchakuüa kowi phai pe anging ripra diah. Nachenganchepaw mami kowng hawi dow en maru-uüa luk kowi hang pacham uowi tham bowt lah,” pakhai.18Nakhowk khe Jebus chenchap Arauna kowh cha thuara kowi CHAKRAMANG vüi David kowi nape thawpah phuchuara lowk kownkow CHAKRAMANG kowh kramamu mih Gad kowi peah ana khai.19Now CHAKRAMANG ming hown aia kowi Gad uang tek pe mih laiklow iawng khawlawt dowi kowi David mih Arauna kowh cha thuara kowi kowkowi khai.20Nami khin khe Arauna hai achapa tali ia dow iap püm thüm chekhai. Nakhowk khe CHAKRAMANG kowh kramamu kowi khita hanow achapauüa dow cham tapet khai.21Nami khin khe David dow haimang hanow aia kowi Arauna hawt khita khai. Now Arauna mih aia kowh cha thuara towla kowh David pur kowi kowkowiah now krawng kowi tabawk krawm se chupah khai.22Arauna kowi David tek pe mih, “En kowh cha thuara kim pe ang diah. Kowng hawi narimla bowt kownkow nami kim re-e CHAKRAMANG vüi ang nathawp phuchuara lowk kown. Nami arah dow sum ang diah; asung chima ang nape en kown taih,” pakhai.23Nakhowk khe David kowi Arauna tek pe mih, “Mangkri, en tut-e iung iawng paw hanow chang phuchua diah. Mow, nachangla tikah mih uanap kownkow phuchuaah kown mih chiala ün uowi chow. Now nachangla sawp kown mih vüi paw cha thua müa uanh hai laithawn tim ün uowi chow. Nami klen kowi nachangla kawmdi uanap kown mih vüi paw püm uowi chow. Maiawngün dow ang peta en bowk mih chowbowt,” pape khai.24Nachenganchepaw Arauna kowi David klangah mih, “Naiawng e nadowi. Maiawngün dow asung chima hown ang naranah ngengche kown. Aiawng kaah mih uanh hown CHAKRAMANG ang kowh Thurai vüi ang nachang tikah mih uanap kown nadowi,” pakhai.25Nahanow David dow nami cha thuara kim sung kuh tanga set Arauna kowi peah khai.26Now nami arah kowi David mih thawp phuchuara lowk khai, now tikah mih uanap hai taking tasangra uanap paw changla khai. Aia dow CHAKRAMANG kowi awr hawah khai, now CHAKRAMANG mih maiawng uang klangah khai: aia dow tikah mih uanap luk kowi mukuang pren hownia uang chin pe maih khai.27Nami kung kowi dow aia kowh saidawng akawp kowi naphangta kownkow kramamu kowi CHAKRAMANG peah ana khai.28Nami khin khe Arauna kowh cha thuara re-e aia kowi CHAKRAMANG klangah mih khita hanow David dow nami re-e tikah mih uanap kutplan changla ne tak chekhai.29Nami khin khe süngrüp süngkangma kowi kowh CHAKRAMANG vüi Mosi thawpah mih taklowp taklangra te hai tikah mih uanap chang müa phuchuara dow Gibeawn kowi kowh Thurai chup rah alowngma mih arah kowi chekhai.30Nachenganchepaw CHAKRAMANG kowh kramamu saidawng kowi kram rakowi David mih Thurai naukrang natukla kownkow nami phuchuara pur kowi kowuam kowi dowi chekhai.
The Seed Company