1 Krungchakuüa18
1Akung kowi David dow Filistinuüa kowi senah hanow nowngta khai. Now Filistinuüa kowh Gat marow hai ariaret kowi kowh kua maten aia powngta pe khai.2David dow Moabuüa kowi senah hanow nowngta khai. Nahanow Moabuüa dow David kowh nar chowng hanow aia kowi peah mangmu büah khai.3Nami klen kowi mang David dow mang Hadadezer kowi Hamat marow kowi senah hanow nowngta khai. Naiawng David senah mih dow Iufratis aw re-e kowh aia kowh krawng bawn nakrawi plan powng iawk kownkow mang Hadadezer uang tarü mih khin khe chekhai. Mang Hadadezer dow Siria pren kowi kowh Zoba marow mang chekhai.4David dow mang Hadadezer kowh kawrnga kari 1,000, kawrnga kowi kowh chowm mih 7,000 ia siphaiuüa hai khawk hown kowh mang mih 20,000 ia siphaiuüa kowi hawt khümta khai. Aia dow amatni kowh kawrnga kari pungmadawng hownia 100 klüng towah khai, now akeng mih kawrnga maten kowi dow tüngta pe uowntüng sa bowk khai.5Nami khin khe Damaska marow kowi kowh Siriauüa dow mang Hadadezer kowi uang tawi khowngah tasen kownkow uang büah khai. Nakhowk khe David dow amatni kowh maru iun 22,000 ia kowi hawt saita pe khai.6Now Siria pren kowi kowh Damaska marow kowi David tow pe siphai hawmh khai. Nahanow Siriauüa dow David kowh nar chowng hanow aia kowi peah mangmu büah khai. CHAKRAMANG dow David cham kowi rah towng kowi pe awngah reng chekhai.7David mih mang Hadadezer kowh maru iukuüa kowh kuh kawngma ün Jerusalem marow kowi uang pawla khai.8Now Hadadezer kowh Teba hai Kun marow hownia paw mang David mih kri ahuma uang pawla khai. Naiawngün kri hown mang Sawlawmawn mih puh aiukma mih, kimchüng hai akeng mih uanh thawpla khai.9Hamat marow mang Tawi hai mang Hadadezer iüah dow ransu chekhai. Amatchi dow khin khin tadowk tasen reng. Naiawng rakowi Hadadezer kowh siphaiuüa maten kowi David saita mih satang tata hanow mang Tawi dow awmrawm khai. Naiawng rakowi David kowi nauang kiowriah kownkow mang Tawi dow achapa Hadoram kowi David tut-e uang chinah khai. Now Hadoram dow David vüi kuh uanh, tai uanh hai kri uanh ün uang pawla pe khai.11Now mang David mih Edawmuüa, Moabuüa, Amawnuüa, Filistinuüa hai Amalekuüa hownia kowh kaah mih kuh hai tai maten paw CHAKRAMANG vüi lang kraah khai.12Zerui kowh chapa Abisai dow Awisa lawngrawi kowi Edawmuüa kowi saita 18,000 ia chekhai.13Edawm pren kowi kowh arah sangrum kowi David mih tow pe siphai hawmh khai. Nahanow Edawmuüa maten dow David kowh nar chowng khai bowt. CHAKRAMANG dow David cham kowi rah towng kowi pe awngah reng chekhai.14David dow Israeluüa pren paprenma luk kowi chowm mang khai. Aia dow aia kowh maru-uüa luk kowi tara nowm chet pe reng, now aiungma kruitownah reng chekhai.15Zerui kowh chapa Joab dow David kowh siphai lang kri mih chekhai. Now Ahilud kowh chapa Jehosafat dow mang kowh chownglawng lawnguan rui mih chekhai.16Ahitub kowh chapa Zadawk hai Abiathar kowh chapa Ahimelek iüah dow uamow chekhai. Now Seraia dow cha rui mih chekhai.17Mang chawng mih kowi kowh lang kri mih dow Jehoiada chapa Benaia chekhai. Now David kowh chapauüa dow mang kowh lang kri mih aluchowuüa chekhai.
The Seed Company