1 Krungchakuüa17
1Aiamat kowh kim kowi aia uowi khe akat dow risi Nathan kowi David tek pe mih, “Kawmat ang dow sidar singh hown kowh thawpah mih kim kowi ang uowi khai. Nachenganchepaw CHAKRAMANG kowh sangbowk laitawm tawkpla uowi mih dow tangbung kowi chekhai,” pakhai.2Nakhowk khe risi Nathan klangah mih, “En sak kowi uowi iawng chang diah; Thurai tawi uowila en reng chekhai,” pape khai.3Nachenganchepaw nami iak dow CHAKRAMANG uang tek pe Nathan mih,4“Ang kowh nar David tut-e kowkowiah now en natek pe kown mih, ‘Ang kowh uowi rah en nathawp kown nadowi.5Aigupta pren hownia Israeluüa kowi ang uang lawtla mih ni hownia ani mowr tawng iawng mih kim kowi paw ang uowi dowi chekhai. Akeng kowi ang cham süt mih khin khe paw ang uowi mih dow tangbung kowi hai taklowp taklangra te kowi chowtaih.6Ang kowh maru Israeluüa cham kowi rah towng kowi amatni hown ang tawi uowi reng chekhai. Nachenganchepaw Israeluüa kowi naming nakhetah kownkow ang peah kurdik mih tara chet miuüa kowi dow, “Tawngplawng kowchow sidar singh hown ang uowi rah kim enni thawp ang dowi?” pami katpaw ang tek pe dowi chekhai,’ pape diah,” pakhai.7Nami klen kowi risi Nathan kowi CHAKRAMANG tek pe mih, “Kawmat mih ang kowh nar David tut-e kowkowiah now tek pe kown mih, ‘En kowi dow dowm kowi kowh ruapur thing rah hownia ang uang pawla en khai, now ang kowh maru Israeluüa luk kowi kruitown miia ang thawp en khai.8En cham kowiah mih arah maten kowi paw ang tawi uowila en reng chekhai, now en kowh ransu-uüa maten kowi dow en pur hownia ang piakta en khai. En kowi dow lusa kowi kowh ming nang iukma mih maru iawng kri kraingma ang nachang en kown.9Ang kowh maru Israeluüa vüi dow ang tow pe kruitown mih khowk chowdiah. Tawkche nami khin khe dow maru ngakuüa mih amatni kowi changah anowng apowng khai. Nachenganchepaw kawmat dow amatni luk kowi naiawng naphaw kown nadowi bowt. Tawngplawng kowchow panow ang kowh maru Israeluüa vüi dow ang lang khowmta pe uowi rah parah khowk chekhai. Nakowi dow athaulangma amatni naia uowi bowt kown, now amatni kowi miapaw naia changah anowng apowng kown nadowi bowt. Now amatni kowh ransu-uüa maten kowi dow ang nape sumah bowt kown.11En kowng kowh en kowh pipu-uüa tadupra kowi dup en mih khin khe en krungchak hownia en matia chapa kowi ang nape chowmah mang kown, now aia kowh mangra dow anikma ang natow pe kown.12Nami en kowh chapa mih ang vüi nathawp ang kim kown, now aia kowh mangra dow chowngchowng saksakma anikma ang nachang pe kown.13Ang dow aia kowh pa nachowng kown, now aia dow ang kowh chapa nachowng kown. Now en dowi rawn kowh chowm mang mih kowi iawng ang kowh achur uowi dowi mih sakraura aia luk hownia dow mapaw ang napawta pe kown nadowi.14Ang kowh kim kowi hai ang kowh pren kowi chowngchowng saksakma anikma aia kowi dow ang natowah kown, now aia kowh mang chowm rah dow chowngchowng saksakma nauowi reng kown,’ pape diah,” pakhai.15Now mukmang kowi kowh nami laiklow maten dow risi Nathan mih David kowi tek pe bowk khai.16Naiawngün laiklow tata now mang David mih takrumra te lak kowi kowkup khai. Now CHAKRAMANG pur kowi chowm se tek mih, “Aw CHAKRAMANG Thurai, ang hai ang kimchakuüa dow tawngpaw asung uowi dowi mih maru chowtaih. Nachenganchepaw ang vüi kowi ahuma en chang ang khai.17Aw Thurai, anging vüi naiawng khowt en chang anging khowk chepaw en nachang anging küng kown mih en nau khai. En dow pur prakowi kowh ang kowh krungchakuüa vüi paw en khamla lai khai. Aw CHAKRAMANG Thurai, kri kraingma mih maru iawng en mü ang khai.18“Aw CHAKRAMANG, tawng tak chow ang natek en kown! En kowh nar kowi dow en tuk mih towbowt. Nachenganchepaw en pe ang ringkawra khai.19Aw CHAKRAMANG, en kowh nar vüi en nau iawng kri kraingma mih lup en chang pe khai, now en kowh nar kowi en pe tukah khai.20“Aw CHAKRAMANG, en iawng mih miapaw uowi dowi chekhai, now en klen kowi tawng iawng mih Thurai paw uowi dowi bowt pami anging matia param hown anging ta chekhai.21Nami klen kowi en kowh maru Israel chenchap iawng mih dow lusa kowi mia iawng mih chenchap paw lang uowi dowi bowt. Amatni kowi dow en kowh maru en nachangla kownkow Aigupta pren kowi kowh nar lup changra hownia en uang lawngla khai. Naiawng en uang lawngla mih khin khe amatni naring nakaw en kownkow amatni pur kowi dow akri kraingma mih lup hai kramra uowima mih lup en chang pe khai. En kowh maru Israeluüa vüi amatni pur hownia akeng mih chenchapuüa kowi en prütta pe khai.22Israeluüa kowi dow chowngchowng saksakma vüi en kowh maru en changla khai. Aw CHAKRAMANG, en dow amatni kowh Thurai en chowng khai.23“Now kawmat mih aw CHAKRAMANG, en kowh nar ang hai ang krungchakuüa lawnguan kowi kowh en takhamta mih chowngchowng saksakma townah reng diah. Nami dow en takhamta mih iawng changah diah.24Nahanow en kowh ming dow chowngchowng saksakma akri akraingma naown kown towbowt. Now maru-uüa mih, ‘Lang kri lang kraing mih CHAKRAMANG chowtaih Israel kowh Thurai,’ padow natek kown. Now en pur kowi dow en kowh nar David krungchakuüa mih anikma nauowi bowt kown.25Aw ang kowh Thurai, ang krungchak hownia mang nauang uowi kown mih en phuang ang khai. Naiawng rakowi maiawng en tut-e ang uam lü mih chekhai.26Aw CHAKRAMANG, en chowtaih Thurai. Mami aiungma mih laikham dow ang tut-e en khamah khai.27En pur kowi chowngchowng saksakma ang kowh krungchakuüa naia uowila reng kownkow peah prasi khai. Aw CHAKRAMANG, mami krungchakuüa kowi en matia ngengche peah prasi khowk chedow mami krungchakuüa dow chowngchowng saksakma naka prasi kown towbowt,” pakhai.
The Seed Company