1 Krungchakuüa19
1Nami kung kowi Amawnuüa kowh mang Nahas dow kowng khai bowt. Now achapa Hanun dow aia takcha kowi ta chowm mang khai.2David tek mih, “Hanun kowh pa Nahas ang luk kowi kaah sakowmma uowi iawng achapa Hanun luk kowi paw kaah sakowmma ang nauowi pe kown,” pakhai. Naiawng rakowi Hanun kowh pa kowng mih lawnguan kowi nauang tawi tek pe sakklamra laiklow kownkow David mih aia kowh maru iukuüa kowi uang chin pe pre sum ia khai. Nahanow David kowh maru iukuüa dow Hanun kowi nakowtek pe sakklamra laiklow kownkow Amawnuüa pren kowi kowkowi khai bowt.3Nachenganchepaw nakhowk khe mang Hanun kowi Amawnuüa kowh aluchowuüa uang tek pe mih, “En pa kowi ringkawah rakowi nauang tek en sakklamra laiklow kownkow naiawngün maru-uüa kowi David uang chinah mih pabow en ka tuak? Naiawngünuüa kowi David uang chinah mih dow a-i kowh pren krawi kumüla hanow akung kowi uang ta sen a-i kownkow chowbowt,” pakhai.4Naiawng rakowi Hanun dow David kowh maru-uüa kowi hawt khümah khai. Now amatni kowi dow khaita pe mawmpawi khai, now kowrmow athawngma mih paw kelang mowr chi kepta pe bowk khai. Mang Hanun dow naiawng amatni kowi peah rukrai hanow chinta khai bowt.5Nakhowk khe amatni dow kim kowi kowmang kown mih lainowmma rukrai khai bowt. Naiawngün lawnguan dow David kowi maru kowtek pe khai. Now David dow naiawngün maru hown nauang takrum kownkow kowchin pe maru pre sum ia khai. Nakhowk khe David krawi tek pe mih, “Enni kowh mawmpawi adawngma awr awm dowi mowr Jeriko marow kowi uowi büah diah towbowt. Nami kung kowi phai uang mang büah iang,” pape khai.6Now Amawnuüa dow amatni kowi lainowmma David kunmarauah mih tuk khai bowt. Naiawng rakowi Hanun hai Amawn chapauüa mih Aram-Naharaim, Aram-Maka hai Zoba büah hownia kawrnga kari hai kawrnga kari te miuüa kowi nauang ngala kownkow tai 34,000 set krawi sa pe khai.7Amatni dow kawrnga kari 32,000 klüng hai siphaiuüa hailawm mang Maka kowi mih ngaah büah khai. Nahanow mang Maka hai aia siphaiuüa dow Medeba marow re-e uang khup tangbung khai. Now Amawnuüa paw natasen kownkow takua talawm hanow amatni chowlowkkow marow hownia uang lawt khai, now Medeba marow kowi kowkowi khai.8Nami satang tata hanow David dow Amawnuüa kowi nakowsenah kownkow Joab hai aia kowh siphaiuüa maten kowi kowchinah khai.9Amawnuüa kowh siphai hawmh dow natasen kownkow uang lawt hanow marow tapplawt kowi uang uowi büah khai. Now akeng hownia kowh uang mih manguüa dow dowm kowi uowi büah khai.10Now Joab dow aia pur prakowi hai kung prakowi Siria siphaiuüa uowi mih khita khai. Naiawng rakowi aia dow aia siphaiuüa kowi ruiah sangrum hanow Siria siphaiuüa kowi nasenah kownkow towah khai.11Now akeng mih siphaiuüa kowi dow ataimow Abisai rut kowi ap pe khai. Now amatni kowi dow Amawnuüa kowi nasenah kownkow towah khai.12Joab tek pe ataimow mih, “Siriauüa che ang lak-e lang kür khai hanow en nauang khowng ang kown takla. Now Amawnuüa che en lak-e lang kür khai hanow ang nauang khowng en kown taih.13Sakkraingma hown a-i uowi diah sik! Now a-i kowh maru-uüa vüi hai a-i kowh Thurai kowh marow maten vüi sakkraingma hown a-i dowk tasen diah sik. CHAKRAMANG dow aia tut-e iung iawng nachangla kownkow ang nachup a-i Thurai kown taih,” pakhai.14Nahanow Joab dow aia kowh siphaiuüa hown Siriauüa kowi nakowsenah kownkow tarü khai bowt. Nakhowk khe Siriauüa dow amatni pur hownia powt khai.15Naiawng Siriauüa powt mih khita hanow Amawnuüa paw Joab kowh naumow Abisai pur hownia powt khai, now amatni dow marow kowi kowkup khai. Nami kung kowi dow Joab mih Jerusalem marow kowi plan khai.16Siriauüa dow Israeluüa kowi nowng dowi bowt mih tuk khai. Now amatni dow Iufratis aw paipra pown kowi kowh uowi mih Siriauüa kowi nauang hawla kownkow kowchin maru hanow uang hawla khai. Now uang hawla mih maru-uüa luk kowi chang aluchow mih dow mang Hadadezer kowh siphai aluchow Sobak chekhai.17Nami satang tata kung kowi David dow Israel siphaiuüa maten kowi kuaah lawmah khai. Now amatni dow haipown Jawrdan aw hanow Siriauüa kowi nakrawi kingküaah kownkow tarü khai. Now Siriauüa kowi nasenah kownkow amatni pur kowi mang David mih aia kowh siphaiuüa kowi towah khai. Nami kung kowi amatni dow Siriauüa hown tasen khai.18Nachenganchepaw Siriauüa dow Israeluüa pur hownia plan powt khai iawk. Nakhowk khe David dow amatni kowh kawrnga kari te mih maru 7,000 ia kowi hai khawk hown kowh mang mih siphai 40,000 ia kowi saita khai. Now amatni kowh siphai aluchow Sobak kowi paw aia saita khai.19Now amatni dow Israeluüa tut-e sum mih chowbowt pami Hadadezer nimkrüa kowi kowh uowi mih manguüa tuk khai bowt, now Israeluüa hown taking tasangra laikham tatow büah khai bowt. Nahanow amatni dow Israeluüa kowh nar chowng khai bowt. Nami hownia bowt now Siriauüa dow Amawnuüa kowi natawi khowngah kown mih nauta dowi bowt chekhai.
The Seed Company