1 Krungchakuüa16
1Maru kawmuüa dow David thawpah mih Thurai kowh sangbowk laitawm tawkpla towk müa tangbung lak kowi sangbowk laitawm tawkpla mih uang towah khai. Nami kung kowi dow Thurai vüi tikah mih uanap hai taking tasangra uanap chang büah khai.2Naiawngün uanap pawi ki chang kung kowi dow CHAKRAMANG ming hown maru kawmuüa kowi David peah prasi khai.3Now Israel chenchap masiuüa hai kachakuüa maten kowi dow kawm apah, chaknga asek hai grep uih keu kawm apah chi aia peah khai.4CHAKRAMANG kowh sangbowk laitawm tawkpla pur kowi uang chupiia Thurai miuüa kowi nakruitown kownkow David mih Levi chenchap hownia tow maru sangrum khai. Naiawngün maru-uüa kowh lup dow naawr chup Thurai kown mih, awr tek awmrawm lai kown mih hai CHAKRAMANG Israeluüa kowh Thurai kowi nakiow kown mih chekhai.5Nami thumchak kowi kowh aluchow dow Asaf chekhai, now akhowng mih dow Zekaria chekhai. Asaf kowh thumchakuüa dow Jeiel, Semiramawt, Jehiel, Matithia, Eliab, Benaia, Obed-Edawm hai Jeiel büah chekhai. Naiawngünuüa dow tingteng hai taraw tep mih, Asaf dow klingchow tep mih,6now uamow Benaia hai Jahaziel iüah dow Thurai sangbowk laitawm tawkpla pur kowi akhin towng tum baw reng mih chekhai7Nami ni khe dow mami Thurai kowi tekla awmrawm lai mih meng Asaf hai aia thumchakuüa kowi David pe tekah khai.8CHAKRAMANG tut-e tek awmrawm lai büa diah;aia kri kraing mih lawnguan phuang büa diah,now aia changah mih lup maten chen towng chap towng tut-e phuang büa diah.9Aia vüi kowi tek meng diah, aia kiow meng tek büa diah;aia changah mih awdara lup lawnguan maten krawi phuang büa diah.10Aia ming chimsaima mih kowi kiow büa diah;CHAKRAMANG kowi cham miuüa dow pacham piaw lah!11CHAKRAMANG kowi owmsak büa diah;aia kowh kür kowi owmsak büa diah,now atungma aia kowi cham büa diah.12Aw CHAKRAMANG kowh nar Jakawb krungchakuüa,aw Thurai kloah mih Israel krungchakuüa,aia changah mih awdara lup tuakah reng büa diah,aia kowh tara laiklow sak kowi towah reng büa diah.14CHAKRAMANG dow a-i kowh Thurai chekhai,aia kowh ana pek dow chen towng chap towng vüi chekhai.15Thurai kowh ana pek dow chowngchowng saksakma sak kowi towah diah,aia kowh sangbowk laitawm mih katpaw hangkow tamata diah.16Nami sangbowk laitawm dow Abraham hown kowh aia tatowah mih chekhai,Isak tut-e kowh aia khamah mih sangbowk laitawm paw nami chekhai.17CHAKRAMANG dow Jakawb hown tatow sangbowk laitawm khai,nami sangbowk laitawm dow Israeluüa tut-e chowngchowng saksakma vüi chekhai.18Aia tek mih, “Ang nape en Kanan pren kown.Nami dow en kowh dawngthawnguan naown kown,” pakhai.19Nami khin khe a-i kowh pipu-uüa dow maru iun a-echow chekhai.Nakhowk khe amatni dow Kanan pren kowi prenlang maru chowreng tak.20Amatni dow pachen süng hownia akeng mih chen süng kowi cham lenla pang khai,papren hownia akeng mih pren kowi cham mangla pang khai.21Nachenganchepaw amatni luk kowi dow mia iawng mih kowi paw aia pe changah nowng dowi;amatni kowi nalawngah kownkow manguüa kowi Thurai hangah reng chekhai.22Aia tek pe mih, “Ang lang kloah mih maru-uüa kowi enni naia kak kown nadowi,ang kowh risiuüa kowi paw enni naia piak kown nadowi,” pakhai.23Aw palusama maru, CHAKRAMANG vüi tek meng diah!Aia lawng a-i mih laiklow ni towng ni towng phuang büa diah.24Aia kowh kraingra dow chen towng chap towng tut-e phuang büa diah;aia changah mih awdara lup lawnguan maru maten tut-e tek büa diah.25CHAKRAMANG dow kri kraingma, aia dow ahuma kiowri kak taing chekhai,aia dow akeng mih thuraiuüa lak-e paw kramra lang uowi chekhai.26Akeng chenchapuüa kowh thuraiuüa dow arup krowngchow taih.Nachenganchepaw CHAKRAMANG dow mukuang thawp miia chekhai.27CHAKRAMANG kowi ringkaw hai rowsi büa diah;aia uowi rah kowi dow kürra hai piawra atekma chekhai.28Aw chen towng chap towng maru-uüa, CHAKRAMANG kowi kiow büa diah,aia kowh kiowrira hai kür kowi kiow büa diah.29Aia ming kri kraingma mih kowi kiow büa diah,uanap hown aia pur kowi uang büa diah.CHAKRAMANG dow chimsaima rakowi chupiia büa diah.30Aw palusama maru maten,aia pur kowi chür büa diah,nowng chüah dowi pat lusa mih khikhawtma aia thawpah khai.31Mukuang hai lusa dow pacham piaw lah.CHAKRAMANG dow mang chekhai pami chenchapuüa tut-e pacham phuang büah lah.32Sata hai sata kowi kowh uowi mih maten dow aia kowi pacham kiow lah,dowm hai dowm kowi kowh luprak maten dow pacham piaw lah.33Kaurawng kowi kowh singh kau maten awmrawmma hown pacham tek meng lah.Tawngplawng kowchow panow aia dow lusa kowi nauang chet tara kownkow uang khowk.34CHAKRAMANG kowi tek pe awmrawm lai diah.Tawngplawng kowchow panow aia dow aiungma chekhai.Aia kowh achur uowi dowi mih sakraura dow chowngchowng saksakma anikma chekhai.35Maiawng tek büa diah, “Aw anging kowh lawng miia Thurai, uang lawng anging diah,arasang kua anging hanow akeng chenchap hownia lawng anging diah.Nahanow en ming chimsaima mih vüi anging natek awmrawm lai kown,now apiawma hown anging naia tek en rowsi meng kown.36CHAKRAMANG Israeluüa kowh Thurai dow akiow pauowi lah,aia dow achük alai hownia chowngchowng saksakma akiow pauowi reng lah,” pakhai.Nami kung kowi dow maru kawmuüa tek mih, “Amen,” pakhai. Now maru-uüa mih Thurai kowi kiowah khai.37CHAKRAMANG kowh sangbowk laitawm tawkpla pur kowi lakke takla mih lup ni towng nachang kownkow Asaf hai aia thumchakuüa kowi David towah khai.38Naiawngün maru-uüa kowi natawi khowngah kownkow Obed-Edawm hai aia thumchak 68 ia kowi paw David tow pe khai. Hosa hai Jeduthun kowh chapa Obed-Edawm iüah dow kangchawng mih chekhai.39Gibeawn marow kowi kowh chupiiara kowi CHAKRAMANG kowh taklowp taklangra te pur kowi nachang lup kownkow uamow Zadawk hai aia hown kowh uamowuüa kowi David towah khai.40Nahanow amatni dow Israeluüa kowi kowh Mosi peah mih ana iawng rau towng iak towng nami phuchuara kowi CHAKRAMANG vüi tikah mih uanap chang büah khai.41Nami klen kowi Heman, Jeduthun hai ruiah mih akeng miuüa kowi dow CHAKRAMANG kowh achur uowi dowi mih sakraura rakowi natek rowsi meng kownkow David towah khai.42Thurai rowsi meng tek mih khin khe kowh baw tum mih, klingchow tep mih hai akeng mih tünteu chang mih dow Heman hai Jeduthun iüah chekhai. Now kangchawng mih dow Jeduthun kowh chapauüa chekhai.43Nami kung kowi dow maru kawm maten mih chowlowkkow kim prakowi mang khai, now David paw aia kimchakuüa kowi kowpe prasi kownkow aia kim kowi uang mang khai.
The Seed Company