1 Krungchakuüa15
1David dow aia vüi Jerusalem marow kowi krawi thawp kim sangrum khai. Nami kung kowi dow Thurai kowh sangbowk laitawm tawkpla towk müa kamrüt pe arah lowk khai. Now nami arah kowi dow aia khup pe tangbung khai.2Nami kung kowi David tek mih, “Thurai kowh sangbowk laitawm tawkpla dow Leviuüa klen kowi miapaw naia kawt kown nadowi. Tawngplawng kowchow panow CHAKRAMANG kowh sangbowk laitawm tawkpla nakawt kownkow hai chowngchowng saksakma CHAKRAMANG kowh lup nachang kownkow Leviuüa kowi dow CHAKRAMANG lang klota khowk chekhai,” pakhai.3CHAKRAMANG kowh sangbowk laitawm tawkpla vüi aia kamrütta mih arah re-e nauang pawla sangbowk laitawm tawkpla kownkow Israeluüa maten kowi arasang David kuaah lawmah khai.4Aia kuaah lawmah mih Arawn krungchak hai Leviuüa dow5Kohat krungchakuüa hownia 120 ia; amatni kowh aluchow dow Uriel chekhai.6Merari krungchakuüa hownia 220 ia; amatni kowh aluchow dow Asaia chekhai.7Gersawn krungchakuüa hownia 130 ia; amatni kowh aluchow dow Joel chekhai.8Elizafan krungchakuüa hownia 200 ia; amatni kowh aluchow dow Semaia chekhai.9Hebrawn krungchakuüa hownia 80 ia; amatni kowh aluchow dow Eliel chekhai.10Uziel krungchakuüa hownia 112 ia; amatni kowh aluchow dow Aminadab chekhai.11Nami kung kowi dow mang David mih uamow Zadawk hai Abiathar iüah hailawm Levi chenchap Uriel, Asaia, Joel, Semaia, Eliel hai Aminadab büah tut-e kowchin maru hanow amatni kowi uang hawla khai.12Now naiawngün maru-uüa kowi mang David tek pe mih, “Enni dow Levi krungchak chowlowkkow machak kowi kowh aluchowuüa chekhai. Enni hai enni tainau Leviuüa mih CHAKRAMANG vüi tachim tasai büa diah. Nahanow ang kamrütta mih arah kowi dow CHAKRAMANG Israeluüa kowh Thurai sangbowk laitawm tawkpla mih enni nauang ia pawla kown.13Auown khe nami sangbowk laitawm tawkpla enni uang pawla dowi rakowi CHAKRAMANG a-i kowh Thurai dow a-i luk kowi lainowmma kunmarau khai. Now aia kowh ana pek iawng tawng iawng chow nami sangbowk laitawm tawkpla nauang pawla kown mih paw aia kowi a-i lüntaah dowi chekhai,” pakhai.14Naiawng rakowi uamowuüa hai Leviuüa dow CHAKRAMANG Israeluüa kowh Thurai sangbowk laitawm tawkpla nauang ia pawla kownkow CHAKRAMANG vüi kowmatia kowi tachim tasai büah khai.15Now Leviuüa dow Mosi kowi CHAKRAMANG peah ana iawng Thurai kowh sangbowk laitawm tawkpla mih akawtlawng hown kawtla büah khai.16Now Leviuüa kowh aluchowuüa kowi amatni kowh tainau-uüa pungmadawng hownia tingteng, taraw hai klingchow tepla se natekla awmrawm meng kownkow meng sarauüa kowi naruiah kown mih David tek pe khai.17Naiawng rakowi Leviuüa dow Joel kowh chapa Heman, Berekia kowh chapa Asaf hai Kusaia kowh chapa Ethan kowi ruiah büah khai. Asaf dow Heman krungchakuüa hownia kowh chekhai, now Ethan dow Merari krungchakuüa kowh hownia chekhai.18Naiawngün meng sarauüa kowh akhowng miuüa dow Zekaria, Jaziel, Semiramawt, Jehiel, Uni, Eliab, Benaia, Maseia, Matithia, Elifelehu, Mikneia büah hai kimplawt chawng mih Obed-Edawm hai Jeiel iüah chekhai.19Now kri hown kowh klingchow tep miuüa dow meng sara Heman, Asaf hai Ethan büah chekhai.20Tingteng tep miuüa dow Zekaria, Aziel, Semiramawt, Jehiel, Uni, Eliab, Maseia hai Benaia büah chekhai.21Taraw tep miuüa dow Matithia, Elifelehu, Mikneia, Obed-Edawm, Jeiel hai Azazia büah chekhai.22Meng krui mih dow Levi krungchak kowi kowh aluchow Kenania chekhai. Aia dow meng tukma rakowi aia luk kowi nami kurdik peah khai.23Now sangbowk laitawm tawkpla chawng miuüa dow Berekia, Elkana, Obed-Edawm hai Jehia büah chekhai. Now Thurai kowh sangbowk laitawm tawkpla pur kowi narik tum baw kown miuüa dow uamow Sebania, Josafat, Nethanel, Amasai, Zekaria, Benaia hai Eliezer büah chekhai.25Nami kung kowi dow mang David, Israel lawngtang aluchowuüa hai athawng aiawng siphai aluchowuüa mih Obed-Edawm kim hownia CHAKRAMANG kowh sangbowk laitawm tawkpla nauang pawla kownkow apiaw apama hown tarü büah khai.26CHAKRAMANG kowh sangbowk laitawm tawkpla kawt mih Leviuüa kowi dow Thurai tawi khowngah reng chekhai. Naiawng rakowi amatni dow chiala ranit pum hai ruapur ranit pum Thurai vüi phuchuaah büah khai.27Sangbowk laitawm tawkpla kawt mih Leviuüa, meng sarauüa hai meng tek mih thum kowi kowh meng krui mih Kenania büah dow adipükchow mih la hown kowh tawnguat khupma kangowh chekhai. Now mang David paw adipükchow mih la hown kowh tawnguat hai adipükchow mih la hown kowh ephawd kowrmow khupma chekhai.28Maiawng hai Israeluüa maten dow tumla nang hai baw se, tepla klingchow, tingteng, taraw hai howla sawmlawm se CHAKRAMANG kowh sangbowk laitawm tawkpla mih Jerusalem marow kowi uang pawla büah khai.29Jerusalem marow kowi CHAKRAMANG kowh sangbowk laitawm tawkpla uang kupla mih khin khe Sawl kowh chama Mika dow tawngpawk hownia David kowi hawt tang müah krowrow khai. Now aia dow naiawng mang David plai mih hai awmrawm mih khita hanow sakdawng kowi David kowi suiah khai.
The Seed Company