1 Krungchakuüa13
1David mih siphai aluchowuüa maten hown tapaw prengia khai. Naiawngün aluchowuüa dow siphai 100 ia kowi kowh aluchow, now tawngbak mih dow siphai 1,000 ia kowi kowh aluchow chekhai.2Nami kung kowi dow Israeluüa maten kowi aia tek pe mih, “Enni tuak kowi che iung hai CHAKRAMANG naukrang chekhai hanow chu, Israel pren kowi kowh arah maten kowi a-i krawi phowng satang diah sik. A-i kowh tainau-uüa maten hai amatni tut-e kowh uowi mih uamowuüa hai Leviuüa maten a-i hown nauang tabawng kownkow a-i krawi chia diah sik.3Now a-i kowh Thurai sangbowk laitawm tawkpla mih a-i tut-e a-i uang pawla diah sik. Sawl chowm mang mih khin khe dow nami sangbowk laitawm tawkpla lawnguan kowi a-i pe ching dowi chekhai,” pakhai.4Naiawng nachang kown takla pami ka tuak büah bowk khai. Naiawng rakowi naiawng nachang kown mih Israeluüa maten nauta khai.5Naiawng rakowi Kiriat-Jearim marow hownia Thurai sangbowk laitawm tawkpla nauang pawla kownkow David mih Aigupta pren kowi kowh Sihawr aw hownia Lebo-Hamat marow mowr kowi kowh Israeluüa uowi mih maten kowi kuaah lawmah khai.6Now David hai Israeluüa maten dow CHAKRAMANG kowh sangbowk laitawm tawkpla nakowpaw kownkow Juda pren kowi kowh Kiriat-Jearim marow kowi kowkowi khai bowt. (Kiriat-Jearim marow kowi dow Bala marow pah paw tek pe khai). Israeluüa dow nami sangbowk laitawm tawkpla küm luk kowi kowh Cherup rup takra kowi CHAKRAMANG uowi pahai owmah chekhai.7Amatni dow Abinadab kim hownia Thurai sangbowk laitawm tawkpla mih uang lawtla hanow chia kari sar kowi uang towah khai. Nakhowk khe kowh nami chia kari te mih dow Uza hai Ahiaw iüah chekhai.8Nakhowk khe David hai Israeluüa maten dow Thurai pur kowi kür uowi srui plai se plai se tek meng khai, now prui, tingteng, taraw, sawkchow, towmmow chah hai baw ün tumla büah khai.9Nachenganchepaw Kidawn kowh cha thuara re-e uang ting büah khe küngla kari mih chiala pre pum trui mih tatheu khai. Nakhowk khe Thurai kowh sangbowk laitawm tawkpla nadowh pakowh Uza mih haidowkta khai.10Naiawng sangbowk laitawm tawkpla awr dowkta khai rakowi CHAKRAMANG dow Uza kowi lainowmma kunmarauah khai. Naiawng rakowi aia kowi dow CHAKRAMANG pawta pe asak khai. Nahanow Uza dow Thurai pur kowi hing kowng khai.11Naiawng Uza kowi CHAKRAMANG pawta pe asak khai rakowi David dow kunmarau khai. Naiawng rakowi nami arah ming dow Perez-Uza pahai aia chap pe khai. (Perez-Uza pami dow “Uza kowh piakra” pami chekhai). Nami arah ming dow kawmat paw Perez-Uza chowreng tak chekhai.12Nami ni khe David mih Thurai kowi lainowmma kramah khai. Aia tek mih, “Tawng iawng chow Thurai kowh sangbowk laitawm tawkpla ang tut-e ang uang ia pawla kown chow?” pakhai.13Naiawng rakowi sangbowk laitawm tawkpla mih David marow kowi aia tut-e pawla dowi bowt chekhai. Aia dow nami sangbowk laitawm tawkpla mih Gat marowchak Obed-Edawm pami kowh kim kowi towah khai.14Nami sangbowk laitawm tawkpla dow sum la mowr Obed-Edawm kim kowi uowi khai. Nakhowk khe Obed-Edawm kimchakuüa kowi hai aia kowh uowi mih maten luk kowi CHAKRAMANG peah prasi khai.
The Seed Company