1 Krungchakuüa12
1David dow Kis chapa Sawl hownia cham powt hanow Ziklak marow kowi kowuowi khai. Nakowi aia uowi khe aia cham tasen khe kowh tawi khowngah reng mih tasen kiakma mih siphaiuüa dow aia hown uang tabawng khai.2Naiawngün siphai hawmh dow Benjamin krungchak hownia kowh Sawl chuprek chaprekuüa chekhai. Amatni dow hawmlawm lakuai hown salangba ap akiakma kangowh, now uiah mih ba kuak paw akiakma chekhai.3Amatni kowh siphai aluchow dow Gibeah marowchak Semas chapa Ahiezer chekhai, now Ahiezer dak kowi dow Joas chekhai. Now siphaiuüa dow Azmaet kowh chapa Jeziel hai Pelet, Beraka, Anathawt marowchak Jehu;4Gibeawn marowchak Ismaia, aia dow Hiareng 30 ia kowi kowh aluchow; Gedera marowchak Jeremia, Jahaziel, Johanan, Jozabad;5Haruf marowchak Eluzai, Jerimawt, Bealia, Semaria, Sefatia;6Kora krungchak Elkana, Isia, Azarel, Joezer, Jasobeam,7now Gedawr marowchak Jeroham kowh chapa Joela hai Zebadia chekhai.8Süngrüp süngkangma kowi kowh akhawtma mih kangchawngra kim kowi David uowi khe Gad krungchakuüa tasen kiakma miuüa amatni thum hownia lang taprai now David hown uang tabawng ne khai. Amatni dow kawngma hai reh hown tasen kiakma kangowh chekhai. Amatni dow krangsi iawng akürma, now hungh kowi kowh naki iawng iowm lenma chekhai.9Amatni lailowk ia kowi kowh aluchow dow Ezer chekhai. Now siphaiuüa dow Obadia, Eliab, Mismana, Jeremia, Atai, Eliel, Johanan, Elzabad, alowk mih Jeremia hai Makbanai büah chekhai.14Amatni dow siphai aluchow kangowh chekhai. Amatni pungmadawng kowi kowh tasen lang kiak dowi nowm nowm mih khowm padow maru iun 100 ia kowi nowng chekhai, now amatni pungmadawng kowi kowh tasen lang kiak nowm nowm mih dow maru iun 1,000 ia nowng mih chekhai.15Naiawngün siphaiuüa dow nami ning kowi kowh la uown khe pown Jawrdan aw büah khai. Nami la kowi dow aw kowi mih tui atekma chekhai. Amatni dow haipown Jawrdan aw hanow satlawt pra lawngrawi hai satkup pra lawngrawi kowi kowh uowi miuüa kowi kowprütta khai.16Benjamin krungchak hai Juda krungchak hownia kowh akeng mih siphaiuüa dow David kowh akhawtma mih kangchawngra kim kowi uang khai.17Nakhowk khe David dow amatni hown kowtakrum hanow tek pe mih, “Nauang khowng kownkow saktuak iungma hown enni uang mih chekhai hanow auiua asinma ang natuak enni kown. Tawkche tawngpaw ang chang enni angak dowi kowi ransu-uüa rut kowi naap ang kownkow enni uang kuan ang mih chekhai kowh chalow hanow Thurai tuk, now aia narip enni kown taih,” pakhai.18Nakhowk khe Hiareng 30 ia kowi kowh aluchow Amasai luk kowi dow CHAKRAMANG kowh lümla uang towm khai. Aia tek mih,“Aw David, anging dow en kowh towbowt;Jese chapa, en hown anging tawi tabawng kown nau.En hai khowng en miuüa dow pacham awng lah.Tawngplawng kowchow panow en kowh Thurai chowtaih khowng en tasen khai,” pape khai.Nahanow David dow naiawngün siphaiuüa kowi bawngla khai. Now amatni kowi dow aia kowh siphaiuüa luk kowi thawpah aluchow khai.19Sawl kowi kowsen kownkow Filistinuüa hown David tarü mih khin khe Israel siphai thum hownia powt hanow Manase krungchak mih David tut-e kowtawi tabawng ne khai. Tawkche David hai aia maru-uüa dow Filistinuüa kowi tawi khowngah dowi chekhai. Tawngplawng kowchow panow David nakuanah kown mih ka tuak rakowi Filistin kruitown miuüa mih David kowi pe mangta khai. Amatni tatek mih, “David napowtta a-i hanow a-pu Sawl hown natawi tabawng kown chekhai, now nakowngta a-i bowk kown chekhai,” pabüah khai.20Now Ziklak marow prakowi David plan mih khin khe Manase krungchak hownia kowh David tut-e tawi tabawng miuüa dow Adnak, Jozabad, Jediael, Mikael, Jozabad, Elihu hai Zilethai büah chekhai. Amatni dow Manase krungchak kowi kowh siphai 1,000 ia luk kowi kowh aluchow kangowh chekhai.21Naiawngün siphaiuüa dow akeng mih ransu-uüa hown David cham tasen mih khin khe tawi khowngah khai. Amatni dow tasen kiakma kangowh chekhai. Akung kowi amatni dow siphai aluchow mih rah ka büah khai.22Naiawng hai maru kawmuüa mih David kowi nauang khowngah kownkow pani kowh pani David hown uang tabawng ngamlam khai. Nahanow David kowh siphai hawmh kawm krang dow Thurai kowh siphai hawmh iawng uang phaw khai bowt.23Maiawngün dow Hebrawn marow kowi David hown uang tawi tabawng mih maru iun mut chekhai. Amatni uang mih dow CHAKRAMANG laiklow iawng Sawl takcha Israel pren kowi David nachowm mang kown mih kowi uang tawi khowngah kownkow chekhai.24Juda krungchak hownia kawngma hai reh hown tasen kiakma mih siphaiuüa uang mih dow 6,800 ia.25Simiawn krungchak hownia tasen kiakma mih siphaiuüa uang mih dow 7,000 ia.26Levi krungchak hownia uang mih dow 4,600 ia.27Naiawngün pungmadawng kowi dow Arawn krungchak kowi kowh aluchow Jehoiada hai aia dak kowi kowh uowi mih siphai 3,700 ia paw tawi uowi chekhai.28Now sakkraingma mih klanguüa tasen kiakma mih Zadawk hai aia krungchak kowi kowh maru iuk 22 ia paw tawi uowi chekhai.29Sawl hown pakrungchak mih Benjamin krungchak hownia uang mih dow 3,000 ia. Tawkche David tut-e uang tabawng dowi rawn dow Benjamin krungchakuüa mih Sawl kimchakuüa prakowi lang tangi chekhai.30Efraim krungchak hownia chowlowkkow chen kowi kowh tasen kürma mih siphaiuüa uang mih dow 20,800 ia.31Jawrdan aw satkup pra kowh Manase krungchak dawnglang hownia uang mih dow 18,000 ia chekhai. Naiawngün maru-uüa dow David kowi nape chowngah mang kownkow nauang khowngah kown mih amatni kowh aluchowuüa ruiah mih chekhai.32Isakar krungchak hownia aluchowuüa uang mih dow 200 ia. Amatni dow prengia uowima kangowh, now tawng mih khin kowi tawng chow Israeluüa achang takla mih tuk büah reng chekhai. Amatni hown dow amatni kowh tasin taken miuüa paw uang tawi chekhai.33Zebulun krungchak hownia tasen kiakma mih siphaiuüa uang mih dow 50,000 ia. Amatni dow tasen müa rutchün khawkleng chap maiow hown cham tasen reng chekhai. Amatni mih kaah sakowmma hown David kowi kaneuma tawi khowngah kownkow uang mih chekhai.34Naptali krungchak hownia siphai aluchowuüa uang mih dow 1,000 ia. Amatni tut-e dow kawngma hai reh hown tasen kiakma mih siphaiuüa paw uang tawi 37,000 ia.35Dan krungchak hownia tasen kiakma mih siphaiuüa uang mih dow 28,600 ia.36Aser krungchak hownia tasen kiakma mih siphaiuüa uang mih dow 40,000 ia.37Jawrdan aw satlawt pra kowh Reuben krungchak, Gad krungchak hai Manase krungchak dawnglang hownia uang mih dow 120,000 ia. Amatni dow tasen müa rutchün khawkleng chap maten uang pawla khai.38Hebrawn marow kowi naiawngün maru kawmuüa uang mih dow amatni kowh nau rah pachapchow mih rakowi chekhai. Nami dow amatni Israeluüa luk kowi David kowi nape chowmah mang kown mih chekhai. Now akeng mih Israeluüa maten paw David kowi nape chowmah mang kown mih nauta bowk chekhai.39Naiawngün maru kawmuüa dow nakowi sum ni mowr David hown taiua cha taiua kham khai. Amatni kowi hawt peah chakkham mih dow nakowi kowh uowi mih amatni kowh tainau-uüa chekhai.40Nami klen kowi alakma kowi kowh uowi mih Isakar krungchakuüa, Zebulun krungchakuüa hai Naptali krungchakuüa paw kawrngaramchük, ut, kawrnga hai chiala luk kowi tangla now maru kawmuüa nacha nakhamah kown mih uang pawla chakkham khai. Amatni dow kawmdi ün, uidut uih ün, grep keu ün, grep tui ün hai kanrawn sau ün ahuma uang pawla khai. Now nangenah kown mih vüi paw chia, rua hai ruapur paw uang pawla büah khai. Naiawng hai Israel paprenma kowi kowh maru-uüa dow lainowmma piaw büah khai.
The Seed Company