1 Krungchakuüa11
1Akung kowi Israeluüa maten mih Hebrawn marow kowi David tut-e kowkowi khai. Now David kowi kowtek pe mih, “A-i dow pabuk panga chak maru chekhai.2Sawl chowm mang reng tak khe khowm padow cham dowk tasen rah kowi Israel siphaiuüa kowi en chowtaih kruitownla mih paw anging tuk. Now Israeluüa kowi naming nakhet kown mih hai Israeluüa luk kowi en nauowi aluchow kown mih paw CHAKRAMANG en kowh Thurai mih tek en chekhai,” pakhai.3Naiawng David tut-e Hebrawn marow kowi lawngtang aluchowuüa uang mih khin khe mang David dow CHAKRAMANG pur kowi amatni hown tatow sangbowk laitawm khai. Now Samuel hownia kowh CHAKRAMANG tekah mih laiklow iawng amatni dow Israel pren kowi nachowm mang kownkow David kowi nümnapah khai.4Akung kowi mang David hai Israeluüa maten mih Jebusuüa uowi rah Jebus marow kowi kowkowi khai. (Jebus marow dow Jerusalem marow chekhai).5Nakhowk khe David kowi Jebusuüa tek pe mih, “Makowi en nauang ia kup kown nadowi,” pakhai. Nachenganchepaw David dow Jerusalem marow mih kowpowngta khai; aia dow Zaiawn kowi kowh akhawtma mih kangchawngra kim powngta pe khai. Naiawng rakowi akung kowi Zaiawn kowi dow David marow pahai maru chap pe ming khai.6Jebusuüa kowi kowsenah khe David tek mih, “Mia iawng mih maru chow Jebusuüa kowi kowrik sen mih dow siphai aluchowuüa kowi kowh lang kri mih nachowng kown,” pakhai. Nahanow Zerui kowh chapa Joab mih Jebusuüa kowi kowrik sen khai. Naiawng rakowi Joab kowi siphai aluchowuüa kowi kowh lang kri mih arah David peah khai.7Nami kung kowi dow David mih nami akhawtma mih kangchawngra kim kowi kowuowi khai, now nami dow David marow pahai chap pe ming khai.8Aia dow nami marow satlawt prakowi thiaah mih arah hownia uown raw marow khai, now David krawi rawla dowi mih arah dow Joab mih krawi raw khai.9Lang kri lang kraing mih CHAKRAMANG dow aia tut-e tawi uowi reng chekhai. Naiawng rakowi David dow uang lang kür ngamlam khai.10CHAKRAMANG kowh laikham iawng paprenma luk kowi David mih naia changla alow kownkow aia kowh akürma miuüa pungmadawng kowi kowh lang kri miuüa dow Israeluüa maten hown tabawngah hanow David prakowi tawi tangi khai, now David kowh mang chowm rah mih akhawtma changah büah khai.11Naiawngün akürma mih maru-uüa pungmadawng kowi lowk ia mih dow Jasobeam chekhai. Jasobeam dow Hakmoni kowh chapa chekhai. Jasobeam dow Sum pami tasen kiakma mih thum kowi kowh aluchow chekhai. Pakat tasen sang aia kowh reh hown aia mih maru iun 300 ia kowi saita khai.12Now alowk mih dow Eleazar chekhai. Aia dow Aho krungchak Dodo kowh chapa chekhai. Aia paw Sum pami tasen kiakma mih thumchakuüa pungmadawng kowi kowh lowk ia chekhai.13Aia dow Filistin siphaiuüa nauang piak iakmow khang kownkow Pas-Damim kowi takua talawm khe David tut-e tawi uowi khai. Nakhowk khe akeng mih Israel siphaiuüa dow iakmow khang re-e Filistinuüa pur hownia powt bowk khai.14Nachenganchepaw David hai Eleazar iüah dow nami iakmow khang dawnglang kowi iowngah hanow Filistinuüa kowi senah khai. Naiawng hai amatchi dow Filistin siphaiuüa kowi kowngta bowk khai. Nami ni khe CHAKRAMANG mih amatni kowi lawngah khai, now pe awngah khai.15Now akat khe dow Hiareng 30 ia hownia sum ia mih Adulam puk re-e kowh huamang re-e David tut-e uang khai. Nakhowk khe Filistin siphaiuüa dow Refaim lawngrawi kowi khup tangbung büah khai.16Nami khin khe David dow süngrüp süngkangma kowi kowh akhawtma mih kangchawngra kim kowi uowi khai, now Filistin siphaiuüa dow Bethlehem marow kowi uowi büah khai.17Nami khin khe David dow lainowmma tui sakkrai khai. Naiawng rakowi aia tek pe mih, “Bethlehem marow tapplawt re-e kowh tuikuam hownia mia iawng mih chü kowpaw ang tui ditchow dit panü,” pakhai.18Naiawng rakowi tasen kiakma mih maru sum ia dow Filistin siphaiuüa kowi senla se Bethlehem marow tapplawt re-e kowh tuikuam kowi kowkowi khai, now nami tuikuam hownia towngla tui hanow David kowi uang pawla pe khai. Nachenganchepaw nami tui mih David khamah dowi chekhai. Nami tui dow CHAKRAMANG kowi ap-ah mih iawng hai aia khükta khai.19Aia tek mih, “Aw Thurai, mami tui mih mapaw ang nakham kown nadowi. Mami tui ang kham hanow mami tui kowtowng ang miuüa kowh vi ang kham mih hown tatu chekhai,” pakhai. Tawngplawng kowchow panow nami tui kowtowng miuüa dow singsing kowngkowng amatni kowh sak uam pe kowh kowtowng tui mih chekhai. Nami aming anang uowima mih Sum pami tasen kiakma mih thumchakuüa kowh lup dow naiawng chekhai.20Now aming anang uowima mih sum ia luk kowi kowh lang kri mih dow Joab kowh naumow Abisai chekhai. Aia dow aia kowh reh hown maru iun 300 ia kowi senah now saita bowk khai. Naiawng rakowi aia paw sum ia mih iawng aming anang uowima chekhai.21Aia dow Süngkawm pami tasen kiakma mih thum kowi aming anang lang paw khai. Now aia dow nami thumchak kowi kowh aluchow chekhai. Nachenganchepaw aia dow Sum pami tasen kiakma mih thum kowi kowh maru nadowi chekhai.22Kabzel marow hownia kowh Jehoiada chapa Benaia dow tasen kiakma chekhai. Aia paw akraing akraingma mih lup chang khai. Aia dow Moab chenchap kowi kowh tasen kiakma mih siphai pre ia kowi kowngta khai. Akat khe paw nangkhe kla mih khin khe aia dow krangsi kuam kowi kowdowm hanow kowkowngta krangsi apum khai.23Nami klen kowi akro ranit muk ngia mih Aigupta maru kowi paw aia saita lowk ia khai. Nami Aigupta maru rut kowi dow pawngpai khowt mih reh uowi apung chekhai. Nachenganchepaw aia dow dowkla müa lowk now nami Aigupta maru prakowi kowtarü khai. Aia dow nami Aigupta maru rut kowi kowh reh rupta pe hanow nami reh hown aia kowi sawtah now kowngta khai.24Jehoiada kowh chapa Benaia kowh lup dow naiawng chekhai. Aia paw Sum pami tasen kiakma mih thumchakuüa iawng aming anang uowima chekhai.25Aia kowi dow Sum pami tasen kiakma mih thum kowi klowkla dowi chepaw aia dow Süngkawm pami tasen kiakma mih thumchakuüa lak-e lang ka ringkawra chekhai. Benaia kowi dow aia kowh kangchawng miuüa kowi kowh aluchow David thawpah khai.26David kowh tasen kiakma mih maru-uüa dow Joab kowh naumow Asahel, Bethlehem hownia kowh Dodo chapa Elhanan,27Harawd hownia kowh Sama, Pelawn hownia kowh Helez,28Tekoa hownia kowh Ikes chapa Ira, Anathawt hownia kowh Abiezer,29Husa hownia kowh Sibekai, Aho hownia kowh Ilai,30Netofa hownia kowh Maharai, Nefofa hownia kowh Bana chapa Heled,31Benjamin süng kowi kowh Gibeah hownia Ribai chapa Ithai, Pirathawn hownia kowh Benaia,32Gas hungh re-e kowh lawngrawi hownia Hurai, Araba hownia kowh Abiel,33Baharum hownia kowh Azmavet, Salbawn hownia kowh Eliaba,34Gizawn hownia kowh Hasem chapauüa, Harar hownia kowh Sake chapa Jonathan,35Harar hownia kowh Sakhar chapa Ahiam, Ur kowh chapa Elifal,36Mekerat hownia kowh Hefer, Pelawn hownia kowh Ahija,37Karmel hownia kowh Hezro, Ezbai kowh chapa Narai,38Nathan kowh naumow Joel, Hakri kowh chapa Mibhar,39Amawn hownia kowh Zelek, Joab kowh tasen müa rutchün khawkleng dowk mih Berawt hownia kowh Naharai,40Jatir hownia kowh Ira hai Gareb,41Betseba kowh hua Hit chenchap Uria, Ahlai kowh chapa Zabad,42Siza kowh chapa Adina; aia dow Reuben krungchakuüa kowh aluchow chekhai, now aia hown dow siphai uowi 30 ia chekhai.43Maka kowh chapa Hanan, Mitna hownia kowh Josafat,44Astarawt hownia kowh Uzia, Aroer hownia kowh Hotham chapa Sama hai Jeiel,45Simri kowh chapa Jediael hai Tiz hownia kowh anaumow Joha,46Mahava hownia kowh Eliel, Elnaam kowh chapa Jeribai hai Josavia, Moab hownia kowh Itma,47Eliel hai Obed, now Zoba hownia Jasiel büah chekhai.
The Seed Company