O FILIPI4
1Hababu geena Ri-riadodoto tinihiboho-bohono, nia wowango ma hidogorona'a halingou niohigou-goungu'u nionga'u ma Jou'a. Ngoi 'a tinihi-hininga tomau poma'ama'e! Nginiou geena ho 'ai hingina 'ihanaanga, de idadi tomagarago mangale 'ai leleani.2Ee bilanga Euodia de o ngo Sintikeli, ngoi togaaho'o duru tohigou-goungu la ngini 'a o hingina moi hababu ngini nionga'u-nga'u ma Jou'a.3De ngona 'ai manai pomahida'a-'arajaanga , nage nohigou-goungu'u no'arajaanga! Ngoi togaaho'o tanu ngona no'iduhunu no'ihi'atiai o ngewe'a yamididi goona. Ona de de ngoi mio'arajaango'au duru mimaduhunu ma ngale miohihabari o Habari ma Owa ma Jou ma Dutuno, harage o Klemen de ma homoali moi-moi nage yomahida'a-'arajaanga. Nage 'iduhu-duhuno'au goona, to ona manga ronga-ronga naga 'itulihu'u o Nyawa Yama'e-ma'e o Wowango 'Ahiado-adoni'a ma Bo'uo'a.4Ngini moi-moi halingou 'anioga-garago hababu ngini niorimoio'au de ma Jou. Ma moiohi tinihingahu: Halingou niogarago!5Ngoi tomau tinihidemo ngini'a: Nia go'oie de nia gogelu'u, halingou o nyawa moi-moi yana'o na'o nia hingina 'irahai. Hababu 'aitaaowau de ma Jou woboau.6Uwa niododato o 'o'iau hona bato. Ma o hagala moi-moio'a ngini halingou nimadahaubayanga de niohingahu nia ga-gaaho'o ma Jou ma Dutu'a. 'O'iau naga nioparaluu, geena halingou 'aitauri'a niohingahu ma Jou ma Dutu'a, ma de nio'amaowa'a.7La ma Jou ma Dutu aha wo'ula o dame de o hanaanga nage ngone o nyawa 'apaa'unua pomangariti. O dame de o hanaanga geena aha yagoana nia hingina de nia di-dibanga, hababu niorimoio'au de ma Kristus Yesus.8Ma baha'u Ri-riadodoto, halingou niatiba-tibanga o hagala moi-moi nage 'iba-baraguna, de nage yadaaene yo'ihoromati. Geena la 'o'ia hona nage iti-tiai, 'i'u-'umati, 'iadi-adili, 'iofi-ofi, nage ira-rahai de o nyawa yaigo-igo.9Niadiai 'o'iau naga nage nimadoto'o'au ngoio'a de nianoa nia hingina'a, harage de cara'iau naga nage tohidemo-demo'au bolo tadi-diaio'au. La ma Jou ma Dutu nage nanga hingina wohiha-hanaanga aha naga de de ngini.10Ngoi tamao duru tohanaanga de towipuji ma Jou, hababu ngini ma moiohi nia gegelo 'ai paraluu. Ngini geena 'a ma hilahi ma 'anipidilua ngoi, duga nia wa'utu 'a'oiwa ma ngale niduhunu ngoino.11Ngoi 'oneena totemo geena 'a ma mangaritiwa na'o hababu 'ihidu'uranga, hababu ngoi tomadoto'o'au ma ngale 'o'iau naga demaena geena tamao'u yaowa'au.12Ngoi tamao'au towango 'ihidu'urangu'u, de toboloi'u ma. Ma oraha cara'iau naga bato, 'ipunuhu'u bolo 'ihawinu'u, toholoi'u bolo 'ihidu'urangu'u, ngoi tana'o'au cara'iau ma nge'omo todaali.13De o 'uaha nage ma Kristus woi'ulano, ho ngoi taa'unu todaali ngaro cara'iau naga bato.14Ma ngini niduhuno'au ma orahi ngoi tohuha'u 'o'iau naga niodiaio'au geena duru ma rahai.15Ri-riadodoto o Filipi ma nyawa! Ma hila nage ngoi tohingahu o Habari ma Owa ma di-dihila'a o Makedonia ma daeraa'a, de nage ngoi tamada o Makedonia, ngini ma hirete niana'o 'igou-goungu duga 'a ngini o jama'ata moi niduhu-dunu ngoino de 'a ngini o pipi ma ni'ula ngoino.16De 'ageenawa duga bato. Wa'utu ngoi o Tesalonika ma bendaro'a ngini ma niohidi-digali nidingoto ma ngale to ngoi 'ai paraluu.17Ma 'ai ma'uhutua la ngini nio'ulali nia duduhunu ngoino, ma ngoi tomau nia wowango'a 'iholoioli ma bara'ati 'iamo'o hababu niduhunu ngoino.18Ngoi tadawongo'au moi-moi geena, de geena 'iholoio'au ma ngale 'ai paraluu moi-moi nage niohidingo-dingoto geena o Epafroditus wo'ula'au ngoino. Ho ma oraha neena nage topa-paraluu moi-moi demaenau. Moi-moi nage nio'ula-'ula ngoino geena harage de o huhuba moi ma bounu ihemo-hemo, nage ma Jou ma Dutu awi hingina yadae-daene.19De ma Jou ma Dutu nage towihuba-huba, nage duru wo'aya, aha wohi'o'itotomo ti ngini nia paraluu ma nge'omo ma Yesus Kristus.20Ino, powihiie nanga Dea ma Jou ma Dutu 'aihi'ado-'adoni'a! 'Igoungu.21Niohingahu'a 'ai tabea ma Jou ma Dutu awi 'awaha moi-moi'a, nage yorimoio'au de ma Kristus Yesus. De nage nanga riadodoto nengo'a dau ona ma yohidingoto manga tabea ngini'a.22Ma Jou ma Dutu awi 'awaha moi-moi ma bendaro'a neena de iholoioli nage yo'a-'arajanga o Kaisar awi 'adato'a, ona ma manga tabea yohidingoto ngini'a.23Tanu ma Jou Yesus Kristus niwihibara'ati Ria dodoto moi-moi.
Ngoi o Paulus de o Timotius, minitabea!
Ngoi o Paulus de o Timotius, minitabea!
The Seed Company