O FILIPI3
1Ri-riadodoto nage nionga'u-nga'u ma Kristusi'a! Demaenahi tohiade-ade, togaaho'o ngini halingou niogarago hababu niorimoio'au de ma Jou! Ngoi 'ai hingina 'aitubuhowa tohingahuoli ngini'a 'o'iau naga nage tatuliho'au, hababu geena mangale inigoana.2Nimahitiari o nyawa-nyawa'a nage yodi-diai 'o'iau hona iti-tiiha, nage yadae-daene monga yo'ihironga o 'aho. Ona yohige-gegoto yomau yo'ihuna o nyawa yonga'u-nga'u ma Jou'a.3'Ena momongo ngoneu nage podadio'au ma Jou ma Dutu awi 'awaha nage harage 'inahuna'au. Ngoneu nage powihuba ma Jou ma Dutu hababu to Una awi o Omaha ma hirete 'inahiaha, de pamao pogarago hababu ngone powango porimoio'au de ma Kristus Yesus. Ngone pomahinganonua 'ia'a nage o nyawa yadiai'u harage de o huna, hababu geena inahihalamatua.4Ngoi tanu 'aidadi tomahinganono geena'a. Hababu na'o moi'ani yotemo na'o ona yaa'unu yomahinganono geena'a, geena ngoi ma 'iholoioli.5Ngoi 'ai umuru ma oraha aha o wange tuangele de ihuna. Ngoi 'atomabo'anohi ena o Israelou ma nyawa, 'ai suku o Benyamin; ngoi o Ibrani ma dutu. Mangale o hingounu o Musa awi Hu'umi'a, ngoi neena duru tohingounu hababu ngoi o Farisio'a.6De ngoi duru topeleeha tohi'uata o Yahudio'a ma agama, hiadono o nyawa yonga'u-nga'u ma Kristusi'a to'ihangihara. Na'o 'ai wowango yohi'agelelo de o Musa awi Hu'umu, ngoi neena 'ai hala 'a'oiwa.7Duga hababu ma Kristus, ho moi-moi nage ma hila tamao'u 'ihiutumu, neena tamao'u 'ihirugi.8De 'ageenawa duga, ma ena 'o'iau hona moi-moi nage tadi-diaio'au geena tamao'u 'aihirugi duga. Hababu neena naga ngoi idadi towina'o igou-goungo'au ma Kristus Yesusi'a to ngone nanga Jou, de geena iholoioli 'irahai. Ma Hababu Una, ho ngoi ta'o'imada moi-moi geena, nage tamao'u harage de 'a o geneo ma haidaa 'a'oiwa, la idadi towina'o ma Kristus,9de 'igou-goungu miorimoi de de Una. De ma hababuwa tohingounu o Musa awi Hu'umu ho 'ai wowango idadi itiai ma Jou ma Dutu awi biono'a, Ma 'ai wowango itiai ma Jou ma Dutu awi biono'a geena duga hababu ngoi tonga'u ma Kristusi'a. Ho o rimoi ma owa geena ma Jou ma Dutuno, ma titi ponga'u ma Yesus Kristusi'a.10Ma oraha neena, nage tomau-mau geena, ngoi tomau towina'o igou-goungu ma Yesus Kristusi'a, de tamao awi 'uaha 'ai wowango'a. O 'uaha geena harage de ma Jou ma Dutu awi 'uaha nage idadi Wihimomi'oli o honengino. Ngoi tomau mimahidahangihara de ngoi tohingounu hiadono tohonenge harage de 'a Unali.11De 'ogeena, na'o tohonenge, ngoi to nga'u Una aha wohiwangoli.12Ngoi 'atotemowa na'o tomadama'e'au neena bolo tomadototomo'au, duga ngoi 'atohigila-gila tomaduhunu ma ngale tomau tama'e o hewa nage ma Kristus wohidiai'u'au. Ma ngale geenau ho ngoi neena woiili'o'au todadi to Una awi nyawa ma oraha tonga'u Una'a.13Ri-riadodoto, Ngoi'igou-goungu ngoi 'a tamaowa bali ngoi tama'e'au o hewa geena. Duga ngoi moi tadiai, geena la 'a tada-danganonuau 'o'iau naga nage tadi-diaio'au 'a ma hilahi, de tomaduhunu taadono 'o'iau neena nage 'ai bioni'a.14Ngoi harage de 'atomapa-litana tohi'ai'a 'ai dumuti'a la tomadama'e o hewa, geena la towango o horogaa'a. Hababu geena ma Jou ma Dutu wonaaho'o porimoi de ma Yesus Kristus.15Ngone moi-moi nage po'uato'au nanga ngonga'uo'a, ngone halingou nanga di-dibanga 'ogeena. Ma na'o nginio'a naga munu'a manga di-dibanga ma homoa'a, geena done ma Jou ma Dutu aha woade-ade ngini'a.16Duga halingou nioda-danganono neena: Ngone halingou powango 'imote'e o do-doto'o iti-tiai nage ngone pani'o'au hiadono neena.17Ri-riadodoto! Nianii'i harage to ngoi 'ai di-diai. Ngomi miohimaito'au cara'iau powango itiai, ho nio'itaila'o niohidi-diai o nyawa nage yanii 'o'au harage de to ngomi mia wowango.18Hababu naga manga lepe manga go'oie de manga gogelu'u, 'a yohironga ma diiha ma Kristus wohongene o salipo'a ma mangariti. 'O'iau naga nage tohidemo-demo neena, geena 'ika de tinihidemo'au, de neena tinihidemoli ma tamao'u 'ai hingina ihuha ho tohigali-gali.19O nyawa 'ogeena done aha yo'ihu'umu ho yomurutuo'a. Ona ayodini'uau ma Jou ma Dutu awi mau, iti 'a yohilamo-lamo'o to ona manga roehe ma nyahihuu. 'O'iau hona nage poda-damae'e, de geenau yohilamo-lamo'o. Hababu ona yatibangu'u 'a o 'iau hona nage o nyawa o dunia'a yohiha-hanaanga yadiai.20Ma ngone neena podadio'au o horoga'a ma pareta ma nyawa-nyawa. Geena'au de waino nage Wohiha-halamata geena la ma Jou Yesus Kristus, Unau guuna powida-damaa nage done aha woboali.21To ngone nanga roehe neena 'ai'uatua ho 'aiwedelo'a, aha ma Kristus wadiai harage to una ma hirete awi roehe nage duru de ma rahaio'a! Una idadi wadiai geena hababu una'a wouaha ma ngale wapareta o hagala moi-moi.
The Seed Company