'O KOLOSE1
1Tabea Riadodoto ma Jou ma Dutu awi 'awaha 'o Kolose ma bendaro'a, nage tatapu niohingounu de niorimoi de ma Kristus Yesus. Ngoi 'o Paulus ma Kristus Yesus awi hu-hulo'o, ngoi todadi 'o hu-hulo'o hababu ma Jou ma Dutu awi mau. Ngoi totulihi 'o hurata neena, de ngoi de nanga riadodoto 'o Timotius miohidingoto ngini'a. Ngomi miogaaho'o ma Jou ma Dutu'a, to ngone nanga Dea, la tanu niwi'ula ngini'a 'o bara'ati de 'o hanaanga.3Ngomi mioiheno'au na'o ngini nionga'u ma Yesus Kristusi'a de nio'idora ma Jou ma Dutu awi 'awaha moi-moi. Geenau ho ngomi aitauri'a minidahaubayanga de miohaubayanga ma noimi miotemo 'amaowa'a ma Jou ma Dutu'a, ma Yesus Kristus to ngone nanga Jou awi Dea.5Ngini niwinga'u o Yesus de nio'idora ma Jou ma Dutu awi awaha, hababu ngini niongano-nganono o 'iau naga nage ma Jou ma Dutu niwihi'adiai'u'au o horoga'a. Ngini nioiheno'au geena, ma oraha ma di-dihila'a 'ihingahu ngini'a o Habari ma Owa nage itiai.6Ma Habari ma Owa geena itagi o dunia yatamuno'au de 'ihowo'o ma ngale 'ihidadi 'o nyawa manga wowango irahai, 'ogeenali nage idadio'au ngini'a 'a ma hilahi hiadono neena wa'utu nioihene ma Jou ma Dutu awi hininga ma owa de niana'o itiai.7Ma Habari ma Owa geena nanga riadodoto o Epafras winihingahu. O Epafras una geena mimahida'a-'arajaanga womatengo amiwihiboho-bohono. Una geena ma Kristus awi gilaongo nage wohingou-ngounu, nage wo'arajaanga ma ngale niwiduhunu.8O Epafras wohingahu ngomino bali ngini duru nima'adora ma ngale Omaha 'Iofi-ofi ma 'uaha.9Geenau ho nage mioiheno'au moi-moi geena, de aitauri'a minidahaubayanga. Ngomi miogaaho'o ma Jou ma Dutu'a la o Omaha 'Iofi-ofi ni'ula o barija de inidiai niomangariti mangale ma Jou ma Dutu la niana'o itiai ma Jou ma Dutu awi mau.10De geenau ngini idadi niowango yadaene imote'e o nyawa nage yonga'uo'au ma Jou'a de Awi hininga niahanaanga hababu aitauri'a niadiai yaowa-owa. De ngini aha 'aidogo monga niwina'o ma Jou ma Dutu.11Ngomi miohaubayanga tanu ma Jou ma Dutu de awi uaha nage duru ma amo'o, niwihi'uata ngini'a la ma igou-goungu niaa'unu niodaali 'o hangihara 'irupa-rupa'a de niotongohono, de ngini nia hininga tatapu ihananga.12De togaaho'oli nanga Dea'a geenala ma Jou ma Dutu'a la niotemo 'amaowa'a Una, hababu Unau wadiai ngini la yadaene niama'e 'o'iau naga nage wohidiai'u'au awi pareta'a o daraanga o'a ma ngale awi awaha.13'Una wonahihupuo'au o 'uaha 'italu-taluhino, de wonaaha to Una awi Ngoa'a wihiboho-bohono awi pareta ma hidogorona'a.14Ma Jou ma Dutu awi Ngoa'ou guuna watuuhu nanga baradoha, geena ma mangariti ma Jou ma Dutu wonaapongo nanga baradoha.15Ri-riadodoto, 'amoiwa o nyawa nage idadi wima'e ma Jou ma Dutu'a, ma wa'utu powima'e ma Yesus Kristusi'a, geena 'aimatero de ngone powima'e'au ma Jou ma Dutu'a de pana'o'au awi hininga de awi 'uaha. Wa'utu o diwanga de o dunia 'a idadiwahi, o Yesus Kristus de Una'au. Ho o Yesus Kristus guuna nage awi 'uaha iholoi idaduie de hagala moi-moi nage ma Jou ma Dutu wadiai'u'au.16Hababu ma nge'omo Unau ma Jou ma Dutu wohidadi moi-moi 'o horoga'a de 'o dunia'a, nage 'aidadi pama'e de nage 'a idadiwa pama'e, geena dau ma doda'a 'o hagala omaha ma diiha nage 'i'u-'uaha de 'ipa-pareta ma. O hagala moi-moi ma Kristus wohidadi'u de ma dumutu Una ma hirete.17O hagala moi-moi 'a idadiwahi ena ma Kristus geena de Una'au. De hababu unau ma ho 'o hagala moi-moi naga to 'ena ma ngiio'a.18Harage de o hae'e yaaturu ma roehi'a, Ma Kristusou wo'iaturu o jama'ata. Una geena o jama'ata manga wowango ma tititi hababu Unau geena 'ihila-hila ma Jou ma Dutu wihimomi'i o hongenino, la 'una 'iholoi wodaduie de 'o hagala moi-moi.19Hababu harage de moi-moi nage naga ma Jou ma Dutuo'a, awi Ngoa'a ma 'ogeenali, imote'e ma Jou ma Dutu awi mau.20De ma nge'omo awi Ngoa'ou, ma Jou ma Dutu wodiai o hagala moi-moi nage o dunia'a de o horoga'a la yoma'aaha irahaioli de Una. Ma Jou ma Dutu 'ogeena wodiai, ma nge'omo awi Ngoa'a awi 'aunu 'ipoa ma oraha wohonenge o salipo'a.21Ma wa'utu 'ipaha-paha'a nage ngini 'a nionga'uwahi ma Kristusi'a, ngini nimahitinga'a ma Jou ma Dutuo'a de niwihaturuu Una'a, hababu nia hininga de nia di-dibanga itiiha harage de nage nihimaito'au nia go'oie de niagogelu'u.22Ma ma Jou ma Dutu wadiai ngini nima'aaha irahaioli de Una, ma nge'omo Awi Ngoa'a nage womadiai o nyawa de wohonengo'au. Ma Jou ma Dutu 'ogeena wadiai la ngini nia hala de nia baradoha 'a ma ile ma 'oiwau Awi biono'a.23Ma ngini halingou tatapu nimahiga-gao nia ngo-nga'uo'a, de tatapu niotongohono nia ngonga'uo'a. Uwa hiadono niapidili nia ngonganono o Habari ma Owano nage nioiheno'au. Ma Habari ma Owa geena 'ihingahuo'au o dunia yatamunu'u'au, de ngoi neena 'o Paulus nage tohingahu-ngahu 'o Habari ma Owa.24Neena ngoi togarago hababu tohangihara mangale tiniduhunu. Hababu 'ai roehe 'ihangihara la tohitotomo o hangihara nage ma Kristus wohitatapuo'au mangale ngoi, geena harage tomadegehe o do'u Awi hangihara ma doda'a mangale waduhunu Awi jama'ata. To Una awi jama'ata geena harage de 'a Awi roehe mahirete.25Ma Jou ma Dutu woihigagao o 'arajaanga moi mangale toleleani awi jama'ata de geena ma doda'a dau halingou tohingahu ngini'a o habari moi-moi ma Jou ma Dutuno,26geena la o habari nage ma hila ma taunu 'iratu-ratuhou, ma Jou ma Dutu 'a wohingahuwahi o nyawa'a moi-moi, ma neena wo'i'o'ihupuo'au Awi 'awaha'a moi-moi.27Ma Jou ma Dutu womau la awi awaha yana'o 'o'iau nage 'a wohihupu-hupuwahi geena duru 'ao rahai ho 'apohida-daiana, neena naga wohihupu geena moi-moi o hagala nyawa'a. Nage 'a wohihupu-hupuwahi geena la: Ma Kristus naga nia hininga'a, de ma hababu Una ho ngone pomahinganono pohigou-goungu, na'o ngone aha powango de ma Jou ma Dutu o ngiio'a nage 'i'u-'umatio'a.28Ma Kristusou guuna nage ngomi miohingahu-ngahu awi habari o nyawa'a moi-moi. De o hagala barija, ngomi mio'ihitiari de mio'idoto'o ona moi-moi. 'Ogeena miodiai, la idadi mio'iaha o nyawa moi-moi yotaali ma Jou ma Dutu'a de manga ngonga'u i'uato'au ma ile ma 'a i'urangua hababu yorimoi de ma Kristus.29Ma ngale geenau ho ngoi duru tomaduhunu to'arajaanga. Ngoi tomaduhunu imote'e 'o uaha nage duru ma guato'a ma Kristusino nage 'i'arajaanga ngoio'a.
The Seed Company