O FILIPI2
1Ngini nia hininga i'uata hababu niorimoi de ma Kristus, de ngini nia hininga 'a ihuhawau hababu ma Kristus niwidora ngini'a! Ngini niorimoi de o Omaha 'Iofi-ofi, de nima'adora de nima'atu-tumu moi de moi.2Hababu moi-moi geena ho, niohitotomou 'ai hingina ma hanaanga de oneena: Niowango 'a o hingina moi de nia dora 'aimatero, nia di-dibanga 'a moi, de nia dumutu 'a moi.3Uwa niodiai o ia naga geena hababu duga 'a to ngini ma hirete nia paraluu, e'ola hababu 'a nimahiie, ma halingou de nia hingina niohitipo'o'u uwa niohilamo-lamo'o 'a tingini mahirete nia roehe halingou to nyawa ma homoa niohitihila.4Halingou nio'itaila'o o nyawa ma homoa'a manga paraluu, uwa duga 'a tingini ma hirete.5Halingou ti ngini nia hininga de nia di-dibanga 'aimatero de ma Yesus Kristus:6Ngaro o hagala moi-moio'a o Yesus una 'aimatero de ma Jou ma Dutu,ma Una 'a wadali'awa na'o Una halingou waga-gao Awi gogele 'i'a'ulie harage de ma Jou ma Dutu.7Ma duga wamada moi-moi geenade womadiai harage de o gilaongo moi.Una womadiai o nyawade wowango harage de o nyawa.8De womahidaduu'u,de wihingounu ma Jou ma Dutu'a hiadono wohonengo'au,geena la wohonenge o salipo'a.9Ma hababu geenau ho ma Jou ma Dutu Wigoa'a wihi'a-'a'ulie,de wi'ula o 'uaha nage 'iholoi 'iamo'o de o 'uaha moi-moi'a.10Ma Jou ma Dutu wodiai 'ogeena, la o Yesus wihoromati,moi-moi nage o horogaa'a, o dunia'ade dau yohone-honenge manga ngiio'aaha wihuba Una'a.11De ona moi-moi aha yotemo na'o ma Yesus Kristus una geena ma Jou;de geenau ho ma Jou ma Dutu to ngone nanga Dea wihiie.12Hababu geena Ri-riadodoto tinihiboho-bohono! Ma oraha ngoi tomanoa de de ngini, ngini 'aitauri'a niohingounu ma Jou'a, 'iholoioli oraha neena nage ngone poma'atinga'i'a, ngini halingou tatapu niohingounu ma Jou'a. Ngini ma Jou ma Dutu niwihihalamato'au, ho nimaduhunu uwa nimatogumu niodiai o'iau nage yadae-daene harage de o nyawa yohalamato'au. De halingou niodiai geena de niwihoromati de igou-goungu niwihingounu ma Jou ma Dutu'a.13Hababu ma Jou ma Dutu ma hirete wo'arajaanga nginio'a, la ngini niomode'e de niaa'unu niodiai o 'iau hona nihihanaanga ma Jou ma Dutu awi hingina.14Nio'arajaanga o hagala moi-moi geena uwa niota-taleana bolo nima'ari-ributu,15la ngini niohimaiti na'o ngini geena ma Jou ma Dutu awi ngoa-ngoa'a nage nia ronga ma diiha 'a'oiwa, nage niowango de nia hingina 'ibe-berehi de iti-tiai o nyawa yoti-tingi'ai de yohala-hala manga hidogorona'a. Ona manga hidogorona'a ngini halingou nima'e'a nia wowango itiai, de ngini ma nimahiga-gao o Habari ma Owa'a nage 'inahiwango-wango. La niodadi harage o daraanga nage yodihiwa o dunia'a. Na'o ngini niowango 'ogeena, geena done aha ngoi 'ai garago ma titi demaena ma ngale ngini, ma oraha ma Yesus Kristus woboali. Na'o ngini niowango 'ogeena geena ma nyo-nyata na'o ngoi to'arajaanga geena 'a iparahajawa de tomaduhunu geena de ma hasilo'a.17Poelua ngoi done aha 'itooma, de 'ai aunu imadadi harage de o anggur nage yohituragi nia huhuba'u, geena ma mangariti ngini niohigiama ma hoato'au nia wowango ma jou ma Dutu'a, hababu nionga'u Una'a. Na'o idadi 'ogeena ngoino, geena ngoi totemo 'amaowa'a de togarago de de ngini.18De ngini ma halingou niamao niohanaanga de niogaragoli de de ngoi.19Ngoi tonga'u ma Jou Yesus ma raio'au woduhunu, ho 'aitaaowa de ngoi aha towihulo'o o Timotius wotagi ngini'a. Geena'a de wa'utu wolionoli ngoino, 'ai hingina idadi wohi'uata de o habari ma ngale ngini.20Duga 'a o Timotius guuna nage 'a o hingina moi de de ngoi, de 'igou-goungu niwitibanga womau niwiduhunu ngini'a.21Hababu ma regu ona yauruhu 'a to ona ma hirete manga paraluu, ho to ma Yesus Kristus awi mau, 'a'ouwa.22Ngini ma hirete niama'e'au ma nyo-nyata na'o o Timotius geena wo'arajaanga wohigou-goungu'u. Una de de ngoi mio'arajaanga miohingahu o Habari ma Owa, de mimahida'arajaanga duru mimaduhunu harage de o dea de o ngoa'ou.23Ho ma oraha tana'o 'ai haala ma butuhu, iduangino aha de tonganono itaiti la towihulo'ou wotagi ngini'a.24Ngoi tonga'u na'o ma Jou aha woiduhunu, ngoi ma hirete ma aha 'aitaaowa de tai'a ngini'a.25Mangale nanga riadodoto o Epafroditus nage 'a o ngo-nga'u moi de de ngone, nage una wo'arajaango'au de de ngoi de duru mima'aduhunu, nage niwihulo'o'au waino ngoino ma ngale woiduhunu. De neena naga ngoi tamao'u una halingou towihulo'o wolioli ngini'a.26Hababu una duru womau nima'ama'eli de de ngini moi-moi, de duga awi hininga ihuha hababu ngini nioiheno'au na'o una wopanya'e.27'Igoungu una wopanya'e hali'i wohongenou, duga ma Jou ma Dutu wohimaiti awi dora una'a, de 'a una'awa duga ma de ngoi'ali, la 'ai hininga ma huha uwa 'aidogo monga.28Geenau ma hababu ho duru taigo towihulo'o o Epafroditus wolio ngini'a, la ngini niogaragoli nage nima'ama'e de de una, la uwau to dodato.29Ho niwidawongo de nia hininga 'iha-hanaanga, hababu una geena nanga riadodoto hababu porimoi de ma Jou. De halingou nio'ihoromati o nyawa moi-moi nage yo'a-'arajaanga harage una.30Ma ngale wadiai ma Kristus awi 'arajaanga, una 'awodaali'awa awi wowango, hiadono ma du-dubehi de hali'i wohongene. Una wadiai geena moi-moi, hababu niwialiti ngini ma ngale woiduhunu ngoi.
The Seed Company